Namalaki 3
3
1Apwiiya Nlhuku o machiri onkhaye aneera, “Mmweheke, kinonruma namittenga aka akihoolhelhe wiira akilhimelhe iphiro. Athithi nnaavia inyu anoowa wo uthuthuwelha wo nlhatu no Inupa aya. Namittenga nnommweherera inyu chinene uyo noowa ni uhimiacha malhehano aka.”
2Nansho phi mpani nohalha uvilhelha nihuku ninohalha awe uwa nno? Phi mpani nooria weemelha vanohalha awe ukhumelhelha vawo? Ukhalhawaya yoyo nookhalha thoko mooro wa ntu o uhana iyuuma ama thoko sabuni a ntu nopuputta ikuwo. 3Yayo anoowa uuhukumulhani thoko ntu chinohapiha awe ni ureriha isiliva. Nowaattukuriacha ayari a Nalawi, thoko ntu chinohapiha awe idhahabu ama isiliva, mpaka anrweehelhe Nlhuku isadaka chinottuniya. 4Wo chiichammo, isadaka cha attu o Uyuda ni o Uyerusalemu chinowiiha aya wa Apwiiya Nlhuku chinonteelhiha, thoko chaari aya isadaka cha attu o khalhayi.
5Apwiiya Nlhuku o machiri onkhaye aneera, “Kinookhumelhelha munlhokoni mwinyu kiwe kaahukumulha, ni kinoohimiechesha mwaha unaacha akhwiri, ni attu o ulhavalhava, ni attu o woothacha, ni attu anaanyenga anamitheko aya, ni attu anaakha alheto vamoka ni attu ahinokithimicha.
Ukumiha ikikhumi vamoka ni isadaka
6“Mii phi Apwiiya Nlhuku, kihinorukunuwa. Nansho inyu ayari a Nayakhobo khannorimelhihiya. 7Nansho mwattiva nri thoko manyaapwiiya inyu, nhorukunuwacha nkamwaahiya malhehero aka, mena khanvarilhe. Paahi vano, nkihokolheelheke mii, ni mii kinouhokolheelhani. Nansho, nnookoha, ‘Niuhokolhelhekeni chani?’ 8Ni mii kinoukohani inyuva, chani inoolhoka ntu unthephiacha Nlhuku? Mena, nansho mwaattiva nnookithepiacha. Ni tho nnookikoha, ‘Ninouthephiani chani?’ Nnokithepiacha wo mwaha wo ikikhumi vamoka ni isadaka chinyu. 9Nholhavachiya mwaattiva vamoka ni ilhapo inyu yonkhaye wo nlhatu no ukithephiacha. 10Mmwiiheke isadaka chonkhaye unikhuphini waka, wiira unupani waka ukhalhe ni yoolhia yinchi. Nkilhikacheke, mwoone chinohalha aka uhulha madirisha o wiirimu ni uuvahani nnema mwinchi. 11Mena akinaahiya ashimweettu o uhilhoka atanganye choolhia chinyu. Ni miri chinyu cho mizabibu chinooyara chinene. 12Ni attu o ilhapo chonkhaye anowiihanani attu avahiye nnema, ukhalhawaya attu o ilhapo inyu anooshangarara. Mii Apwiiya Nlhuku, Nlhuku muulhupalhe kiheera.”
Nlhuku noolhelha mwaha wo ikiriri
13Apwiiya Nlhuku aneera wiira, “Nhokuulhumachera malhove o uhilhoka,” Ni inakhalhaka chiicho nnookoha wiira, “Nuulhumachire malhoveni o uhilhoka ‘Nuwaachakani inyuva?’ 14Mwaattiva nhohimia wiira, ‘Ata nanthimichaka Nlhuku khanimpatta ittu. Ninohalha upattani ata navaraka malhehero aya Apwiiya Nlhuku o machiri, ama nakhoromaka umihoolho waya wooniha nihotteka ni weeta thoko attu anonlha? 15Hii ninoona wiira, attu o itiamaru phi nokhalha ni mpuha mahuku onkhaye. Ni attu o uhilhoka, nahiyaka ushichira waya, nansho ata vanonlhikacha aya Nlhuku khanottwarushiya.’ ”
16Paahi attu anaathimicha Apwiiya Nlhuku ahaakhulhana ashineeneru, ni Apwiiya Nlhuku aheewa waakhulhana waya. Paahi nkayeeshiya ikitabu yaalhepiye chittu cho wuupuwelhiya cha attu anonthimicha Nlhuku umihoolho waya. 17Ikitabu iyo yaalhepiye cho, “Yayo anookhalhacha attu aka. Anookhalha phi nhakhu aka wo uhiyeriya nihuku ninohalha aka upanga chittu chilhakenlhe aka. Mena akinaapangelha ittu iriyoothe thoko manyanaangoro chinaapangelha aya achishaana aya anaakhulhuvelha. 18Vavawo phi nohalha inyu uchuwelha tho uhilhikaana wa attu anolhoka ni attu o uhilhoka, ama ntu nonthimicha Nlhuku ni ntu hinonthimicha Nlhuku.”
The Bible Version in Makua @The Word for The World International and Makua Language translators. All rights reserved.