Namalaki 2
2
1Apwiiya Nlhuku o mphingo aneerelha opochera ishaani wiira, “Kinouhimeriani mwattiva opochera ishaani wiira, 2nkithimicheke mii wo mitheko chinyu. Mwahikiiwelhelheke, kinoulhavani vamoka ni kila ittu irina inyu. Ni wo ikehiaye kihomalha ulhavacha, ukhalhawaya khannolhoha malhehero aka. 3Kinoutwarushani mwaattiva vamoka ni achishaana inyu wo nlhatu no uwonya winyu, ni kinouhikani mavi a ashinama inyu wiitho. Ni kinowoomolhachani vamoka ni isadaka chinyu. 4Ni wo yoyo nlhatu uyo nnoochuwelha wiira kihouvahani nlhehero nna wiira malhehano apangilhe aka ni nihimo ni Nalawi nilhokelhe.
5“Nhina mwo malhehano ayo, kaalhohupelha waavaha ukumi vamoka ni mpuha, wiira akithimiche. Ni yayo mahuku ayo ahokithimicha ni ukoova. 6Ahettuchiha ittu yaani iri yo ikekheene, kuhiwe yo uhilhoka. Kahaakhalhana rata, mena khayoottilhe, mii vamoka ni attu ayo nahokhalhacha wo mpuha. Kaheena wo nlhatu wiira no upanga momboone tu, nansho aheettuchihacha attu akina upanga chittu cho uhilhoka. 7Phi ntheko wa opochera ishaani weettuchiha attu irusho cho unchuwelha Nlhuku. Attu arwaacheke wiittuchiha malhehero aka uwannyaya, ukhalhawaya opochera ishaani phi anamittenga a Apwiiya Nlhuku o machiri.
8“Nansho mwaattiva opochera ishaani nhorukunuwacha ni uhiya iphiro yo ikekhiaye. Ni meettuchiho inyu ahaapanga attu enchi upanga chittu cho uhilhoka. Ni nhontha nlhehano kipangilhe aka ni inyu mwaatti. 9Ni mii kinoupangani nhittuniye mena ulhohiya na attu o Uisraeli, ukhalhawaya khanttwanre iphiro chaka, ni vaneettuchiha inyu attu aka khannaalhoha onkhaye, naalhoha vakani.”
Attu ahinokhulhuvelhiya wa Nlhuku
10Chani, hiyaano athumwanihu kaheena mmoka? Chani, khanuupiye ni Nlhuku mmoka? Woonaka etu khaninokhulhuvelhana ashineeneru, ni khaninlhoha nlhehano apangilhe aya Apwiiya Nlhuku vamoka ni manyaapwiiya ihu? 11Attu o Uyuda khanokhulhuvelhiya umihoolho wa Nlhuku ni ahopangacha chittu cho urushiha wiilhaponi Uisraeli vamoka ni iwaani yo Uyerusalemu. Ni ahonanarihacha Inupa ya Apwiiya Nlhuku inottuna aya. Ni ahaathelhakacha manyaathiyana anothimicha milhuku chilheto. 12Apwiiya Nlhuku aathamihacheke attu anopanga chittu thoko chechiyo munlhokoni mwa ayari a Nayakhobo. Mena ahihimiecheshe mena ahiwiihache isadaka umihoolho wa Apwiiya Nlhuku o machiri.
13Ilha phi ittu ikina inopanga inyu. Nnootapwiha madhubahu a Apwiiya Nlhuku wo miithori chinyu, nnowunlha ni wuupuruwacha wo nlhatu no uhirumelhelha isadaka chinaawiihera inyu chiyo. 14Nnookoha wiira, woonaka khanorumelhelha isadaka chihu? Iri ukhalhawaya Apwiiya Nlhuku khanottuna urumelhelha ukhalhawaya nhontha malhehano inyu wa ahanu inyu mwaathenlhe inyu vaari inyu amirawo. Yayo phi aari akavihi inyu, ni inyu nhontha malhehano inyu uwannyaya, inakhalhaka mwaholhupelha umihoolho wa Nlhuku wiira nnookhalha o ukhulhuvelhiya wa ahanu inyu. 15Chani, Nlhuku khoopangilheni nkhalhe o iruttu imoka ni iphumu imoka? Chani upanga chiicho aalhakenlhe ittu yaani? Aapangilhe chiicho wiira naayareke ashaana anohalha ukhalha attu a Nlhuku. Wo chiichammo etu, mwooneke wiira kila mmoka khanontha malhehano wa ahanu awe. 16Apwiiya Nlhuku, Nlhuku o Uisraeli anohimia wiira, “Akinonttuna ntu naapangelha ushilhilhi ahanu awe. Nansho mwooneke wiira khannontha malhehano inyu o ukhalha o ukhulhuvelhiya wa ahanu inyu.”
Nihuku no uhukumulhiya nihaatameria
17Nhoocheesha Apwiiya Nlhuku wo malhove inyu yo uhilhoka ayo. Ata inakhalhaka chiicho, nnookoha, nneera, “Noochenhe chani?” Nhoocheeha vaneera inyu, “Apwiiya Nlhuku anowaalhoha attu ahinopanga momboone, woona phi attu omboone, ni anowaattuna.” Ama vanokoha inyu, “Ri vayi Nlhuku o ikekhiaye ulhe?”
The Bible Version in Makua @The Word for The World International and Makua Language translators. All rights reserved.