Nayoshua 22
22
Attu o makosho o unosha nchuwa anoohokolhiacha uwannyaya
1Paahi, Nayoshua aheehanacha attu o makosho a Narobeni, ni Nagadi ni attu nusu yo attu o nikosho ni East Namanase 2nkayeerelha, “Mwaatti nhottwara malhove onkhaye a ashinna Musa, karumiya a Apwiiya Nlhuku, aalhehenre aya wiira mpange, nkamwaakirumelhelha. 3Ni mena khamwaahiilhe ashilhoko inyu mahuku menchi onkhaye ayo mpaka lhelho nna, nansho nhottwara wo irusho malhehero a Apwiiya Nlhuku, Nlhuku inyu. 4Vano etu, Apwiiya Nlhuku, Nlhuku inyu ahaavara ashilhoko inyu mpuha, thoko chenre aya wo ulheha. Paahi nhokolhieke etu umawannyu wiilhaponi mwaavahiye inyu ni ashinna Musa karumiya a Apwiiya Nlhuku, ikhalhe yawinyu yaani ukhopelhelhe wo mwoolhoko wo Uyorodani. 5Nhiishiuke, nvarechesheke malhehero a ashinna Musa karumiya a Apwiiya Nlhuku, chalhehenre aya wo wiira: Mwaattuneke Apwiiya Nlhuku, Nlhuku inyu, mpangeke ittu inothanana aya ni uvarechesha malhehero aya; wiira nhalhe vamoka ni ayo ni waakavihera wo nrima wonkhaye ni wo nnepa wonkhaye.” 6Paahi Nayoshua ahaavahacha ibarakha ni waahiya arwaache yeerelhaka, 7“wo inusu nikosho ni Namanase ahovahiya yo bashani idhahabu, ishaaba, iyuuma ni ikuwo chinchi. Nkawanacheke ni ashilhoko inyu nhakhu mwaavanre inyu mateeka ukhuma wa amalhaponi inyu.”
Ashinna Musa ari anaavahilhe nusu ya attu o nikosho ni Namanase ilhapo aya Ubashani uwo. 8Ni ayo Nayoshua nkaavaha inusu yo nayelhi iyo nenno nikosho nno mpata aya uneelha nchuwa mwoolhoko wo Uyorodani uwo, thoko chaavanhe aya attu o makosho makina alhe.
9Paahi, attu o nikosho ni Narobeni, Nagadi ni nusu yo nikosho ni Namanase ahomwalhaana ni attu o makosho makina a attu o Uisraeli wowo Ushilo uwo, Ukanaani, nkayaahokolhiacha uwannyaya, ilhapo yo Ugileadi, ilhapo aya ashinene, yaavahiye aya wo malhehero a Apwiiya Nlhuku thoko chaalhehenre aya ashinna Musa.
Madhubahu o Uyorodani
10Kaanyuma yo ikatema yo ilhapo ya Narubeni Nagadi ni inusu ina manase Geliloth mwoolhoko o Uyorodani anari baado wiilhaponi Ukanaani, ahotheka madhubahu molhupalhe chinene vakhiviru mwoolhoko uyo. 11Paahi, nttenga nkawaaphiyelha attu o makosho makina a attu o Uisraeli wiira attu o makosho a Narobeni, Nagadi ni inusu yo nikosho ni Namanase ahotheka madhubahu molhupalhe vakhiviru mwoolhoko wo Uyorodani ilhapo yo Ukanaani, yaani awehaka vakittu waya. 12Yeewekeru chiicho, attu o Uisraeli ahokumaana onkhaye Ushilo uwo wiira arwee aatakane ikhoto ni attu o yayo makosho o unosha nchuwa ayo.
13Paahi attu o Uisraeli nkayaaruma Nafiniasi, anaaya opochera ishaani Naeleazari, Ugileadi uwo wa attu o makosho a Narobeni, Nagadi ni nusu yo nikosho ni Namanase. 14Nafiniasi ahothama vamoka ni ashulhupalhe khumi, kila mmoka nari o weemelhelha ashilhoko awe o unikoshoni wawe. 15Ni ayo ahorwaa wa attu o makosho a Narobeni, Nagadi ni nusu yo nikosho ni East Namanase, Ugileadi uwo, ni weerelha wiira, 16nlhoko wonkhaye wa Apwiiya Nlhuku unokoha wiira, “Uthephiacha waani upangilhe inyu wa Nlhuku a ttu o israeli? Woonaka nhaahiya Apwiiya Nlhuku vathekilhe inyu alha madhubahu alha? 17Chani, uwonya waawonyilhe ihu Peori khawaathoshilhe? Khannoona wiira baado khanineehapiha ni ntwarusho waya baado unoohiviha nlhoko wa Apwiiya Nlhuku? 18Chani etu, woonaka nhohiya utwara iphiro cha Apwiiya Nlhuku? Mwaahiyaka Apwiiya Nlhuku lhelho, meelho anoothunalhelha chinene nlhoko wonkhaye wa attu o Uisraeli. 19Haya, yakhalhaka ilhapo inyun kinrumelhelhi aya, mmweeke etu wiilhaponi wa Apwiiya Nlhuku urii nihema naya, mmwe mwaakusha nipuro wowo vamoka ni hii, nansho etu nhaahiye Apwiiya Nlhuku, ni uphanga hii onkhaye va noonie wiira nihaahiya wo utheka madhubahu ahiri a Apwiiya Nlhuku, Nlhuku ihu. 20Chani, Naakani anaaya Nazera vaattenke aya ni uhiya uvarechesha malheheriyo, urushiya wa Apwiiya Nlhuku uwo khawawulhuwenlhe nlhoko wonkhaye wa attu o Uisraeli? Tho, Naakani khaakhwilhe vekha ayaru, wo nlhatu wo uwonya waya.”
21Vavawo attu o makosho a Narobeni ni Nagadi ni nusu yo nikosho ni Namanase yahaakhulha aashulhupalhe o milhoko cha attu o Uisraeli, 22“Nlhuku o milhuku phi Apwiiya Nlhuku! Nlhuku o milhuku phi Apwiiya Nlhuku! Yayo ahochuwelha nlhatu waani hii noopanga chommo. Ni attu o Uisraeli onkhaye ahochuwelha chiicho! Yakhalhaka chommo phi waahiya ama uhaarumelhelha Apwiiya Nlhuku, paahi ahiyeke unookholha lhelho. 23Yakhalha nihaahiya Apwiiya Nlhuku nkanaatheka madhubahu ihu naashinene wiira nikumihe isadaka cho upahiya mooro, cho choolhia ama cho uwiiha mpuha, paahi Apwiiya Nlhuku anilhivihereke. 24Nansho kihena chiicho. Naathenke wo woova wiira veekinaka mahuku anowa ayo, achishana inyu anowaahimeria achishana ihu wiira, ‘Mwaatti khannothananiya waathimicha Apwiiya Nlhuku, Nlhuku a attu o Uisraeli. 25Khannoona wiira Apwiiya Nlhuku aheesha mwoolhoko wo Uyorodani ukhalhe mwiinano variyari ihu ni inyu mwaatti? Mwaatti o makosho a Narobeni ni o nikosho ni Nagadi khanrina nifungu nirinoothe nawinyu wa Apwiiya Nlhuku.’ Paahi achishana inyu aanooria kaanyuma vawo waakukureha achishana ihu, nkayaahiya waathimicha Apwiiya Nlhuku. 26Phi nlhatu etu, nahotheka madhubahu alha, nansho kuhii wo nlhatu no ukumuhera vachulhu vawo isadaka wala uhelha ipepa, 27nansho naathananne madhubahu alha ahimiecheshe variyari ihu ni inyu mwaatti ni iyari chihu chinowa wiira hii nihanaa nipesha no uvara mitheko cha Apwiiya Nlhuku wo isadaka chihu cho upahiya mooro ni isadaka chihu chikina, ni wo isadaka chihu cho uwiiha mpuha, wiira achishana inyu ahiwe yeerelha achishana ihu wiira, khaarina nifungu nirinoothe nawaya umihoolho wa Apwiiya Nlhuku. 28Tho, nahoopuwelha wiira yakhalhaka yoyo mwaha uyo woolhumelhelhi aka unaacha hii, ama wa achishana ihu mahuku anowa ayo, ninowa neera, ‘Mwooneke madhubahu a Apwiiya Nlhuku aathekilhe aya manyaapwiiya ihu; kuhii wo nlhatu no ukumihera vachulhu waya isadaka ama uhelha ipepa, nansho ukhalha phi uhimiechesha variyari ihu ni inyu mwaatti’. 29Hii khanaarina nnikwa wo waahiya Apwiiya Nlhuku, ata vakani, ni waahiya wo utheka madhubahu o ukumihera isadaka cho upahiya mooro ama isadaka cho ipepa ama cho ulhapelhelhiya. Khaninttuna ukumihera isadaka vakittu vakina yaahikhalhe vachulhu madhubahu a Apwiiya Nlhuku, Nlhuku ihu ari uholho wo nipuro naya.”
30Opochera ishaani Nafiniasi, ashulhupalhe o milhoko cha attu o Uisraeli vaari aya vawo, weewa aya malhove a attu o makosho a Narobeni ni Nagadi ni nusu yo nikosho ni Namanase, nkayawoona. 31Ni Nafiniasi anaaya opochera ishaani Naeliazari, nkayeerelha attu o makosho a Narobeni ni Nagadi ni nusu yo nikosho ni Namanase wiira, “Lhelho nihochuwelha wiira Apwiiya Nlhuku ari munlhokoni ukhalhawaya khanapangelhe Nlhuku. Vano nhookholha attu o Uisraeli wiira ahitwarushiye ni Apwiiya Nlhuku.”
32Paahi Nafiniasi anaaya opochera ishaani Naeliazari vamoka ni aholhelhi nanaya ahaakawaniha attu o makosho a Narobeni ni Nagadi nkayaathama wiilhaponi Ugileadi, nkayaahokolhia Ukanaani wa Aisraeli ni waahimeria mwaha uyo. 33Yoyo mwaha uyo wahaateelhiha attu o Uisraeli, nkayaashukuru Apwiiya Nlhuku, ni uhiya mwaha wo uthanana waatakana ikhoto, mwaha wo uthanana uhararia ilhapo ya attu o makosho a Narobeni ni Nagadi.
34Attu o makosho a Narobeni ni Nagadi nkayehana yayo madhubahu ayo, o “Uhimiechesha” kwaani yeera, “Madhubahu alha phi uhimiechesha wihu wonkhaye umihoolho wa Apwiiya Nlhuku phi Nlhuku ihu.”
Currently Selected:
Nayoshua 22: MOT
Highlight
Share
Copy

Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.