Nayoshua 14
14
Ukawanihiya ilhapo yo Kanaani
1Chilha phi ilhapo chaavahiye aya attu o Uisraeli wiilhaponi Ukanaani. opochera ishaani Naeliazari ni Nayoshua, anaaya Nanuni, vamoka ni aholhelhi o mahimo a attu o Uisraeli, ahaameelha attu o Uisraeli. 2Yaakawaninhe ilhapo chiyo wo woopiya ikhura thoko chaalhehenre aya Apwiiya Nlhuku wa ashinna Musa, wiira aavahe makosho tisa ni nusu alhe. 3Ashinna Musa ari anaavahilhe makosho meelhi ni nusu ayo ilhapo aya yo unoosha nchuwa mwoolhoko wo Uyorodani, nansho Aalawi khaavahiye ilhapo vamoka ni ayo. 4Ayari a Nayusufu ari makosho meelhi: Namanase ni Naefraimu. Nikosho ni Alawi khanaavahiye mpata uriyoothe wo ilhapo, chaahikhalhe iwani cho ukhalha ni imata cho ulhihera mihuwo chaya, ni cho ulhima choolhia chaya. 5Paahi etu, attu o Uisraeli ahomianiha ilhapo thoko Apwiiya Nlhuku chaalhehenre aya ashinna Musa.
Nakalebu anoovahiya iwani yo Uhebroni
6Nihuku nimoka, attu o nikosho ni Nayuda ahorwaa u Nayoshua Ugilgali uwo. Nakalebu anaaya Nayefune, ntu o Ukenizi, nkoolhumacha wa Nayoshua wo wiira, “Kinochuwelha wiira nnoowupuwelha Apwiiya Nlhuku cheerenlhe aya ashinna Musa, ntu a Nlhuku, mwaha unokaacha mii ni inyuva vaari ihu Ukadeshbarnea: 7Kaari ntu o malhipa o iyaakha makhumi ncheshe, ashinna Musa, karumiya a Nlhuku vaakirumilhe aya ukhuma Ukadeshbarnea, wiira kirwee kahotelhe ilhapo. Vaahokolhelhe aka, kahaahimeria mwaha unaacha wowo, thoko chaachuwelha aka munrimani waka, 8uno ashikhunanaka aattukanne aka alhe aahelhaka attu ichuku cho ukwiilha mirima, nansho mii kahaatwara Apwiiya Nlhuku, Nlhuku aka wo nrima wo ukhulhuvelhiya. 9Wo yoyo nlhatu uyo etu, ashinna Musa ahokilhupelhelha wo wiira, ‘Wo ikekhiaye, ilhapo inyikanlhe inyu iyo inokhalha yawinyu, vamoka ni achishana inyu, mahuku o uhimalha. Ukhalhawaya nhooniha nrima wo ukhulhuvelhiya umihoolho wa Apwiiya Nlhuku, Nlhuku inyu’. 10Nansho vano mwooneke etu! Chihophiya iyaakha makhumi ncheshe ni nthanu, toka Apwiiya Nlhuku volhumanne aya ashinna Musa, mahuku attu o Uisraeli vaari aya munkwahani uthakoni. Toka vavawo, Apwiiya Nlhuku vaalhenhe aya, ahokishunga kirii nkumi mpaka lhelho nna, ni vano mii ki ntu o iyaakha makhumi nane ni nthanu. 11Naansho ihinaya ki ntu o machiri thoko vaari aka ikatema yaakirumme aya ashinna Musa. Ata vano nna, kihanaa machiri o wooria waatakana ikhoto ama o uvara ntheko nkina uriyoothe. 12Vano etu, kinolhepelha wiira nkivaheke ilha ilhapo yo miako ilha, yaakilhenhe aya Apwiiya Nlhuku, nenne nihuku nne. Inyuva mwaanene mwaheewa nenne nihuku nne wiira, Aanaki aakhalhacha wowo, wi iwani chirukurerihiye mangome; veekinaka etu, Apwiiya Nlhuku anokihoolhelha, ni mii kinokowoomolhacha thoko Apwiiya Nlhuku chenre aya wo wulhumacha.”
13Phi vavawo Nayoshua vaavanhe aya ibarakha Nakalebu anaaya Nayefune ni waavaha iwani yo Uhebroni ukhalha yawaya. 14Paahi etu, iwani yo Uhebroni phi yawaya achishana a Nakalebu anaaya Nayefune, ntu o Ukenizi mpaka lhelho nna, ukhalhawaya Nakalebu ahooniha nrima wo ukhulhuvelhiya umihoolho wa Apwiiya Nlhuku, Nlhuku a attu o Uisraeli wo nrima awe wonkhaye. 15Iwani yo Uhebroni khalhai vawo yeehaniya Kiriatharba. Maana aya iwani yo Ariba. Naarba ari ntu o uchuwania waapwaha attu onkhaye munlhokoni mwa Aanaki.
Ilhapo yonkhaye nkayaakhalha umpuhani, wo uhaatakaniya ikhoto.
Currently Selected:
Nayoshua 14: MOT
Highlight
Share
Copy
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
