Nayoshua 13
13
Ilhapo yaari ihinavariya
1Yeyo ikatema iyo Nayoshua ari anolhuvanlhe o iyaakha chinchi. Paahi Apwiiya Nlhuku nkayeerelha wiira, “Inyuva vano nhoolhuvalha, o iyaakha chinchi, ni chihohalha ilhapo yulhupalhe ihinakushiya. 2Chechiyo ilhapo chiyo phi, ilhapo yonkhaye ya Afilisti ni ilhapo yonkhaye ya Ageshuri, 3yaani ilhapo inochuwania wiira ya attu o Ukanaani, uchokholhelha nshepa no Ushihori mmwiinanoni mwo Umisri mpaka ilhapo yo Uekroni mpata wo uchawani. Ilhapo yonkhaye ya atawara athanu o ilhapo yo Ufilisti: Gaza, Ashidodi, Ashkeloni, Gathi, ni Ekroni vamoka ni ilhapo ya Avi mpata o uchawa. 4mpata wo uchulhu. Chiichammo ilhapo cha attu o Ukanaani uchokholhelha Uara ya Asidoni mpaka Uafeki mmwiinanoni mwa Aamori, 5tho chiichammo ilhapo cho Ugebai ni Lebanoni unoshelha nchuwa Lebanoni, wuuthi mwaako wo Uhermoni mpaka Ulebo Uhamathi, 6chiicho ilhapo yo umiakoni variyari wo Lebanoni ni Umisrefothmaimu, yaakhalhiya ni anenchi aakhalha Usidoni. ikadiri Aisreali anothepacha urwaa umihoolho wo chechiyo ilhapo chiyo, miyaano kimwanene kinowoomolha attu o chechiyo ilhapo chiyo ashinene oonaka. Ni inyu mwaakawelheke attu o Uisraeli mpatta wo chechiyo ilhapo chiyo, wo woopa ikhura thoko chinre aka wo ulheherani. 7Mwaakawelheke chechiyo ilhapo chiyo makosho tisa ni nusu yo nikosho ni Namanase ahinapatta ittu ayo.”
Umianihia mpata unoshelha nchuwa mwoolhoko wo Uyorodani
8Makosho a Narobeni, Nagadi, ni nusu ikina yo makosho a Namanase ahovahiya ilhapo irii mpata wo vathi wo mwoolhoko wo Uyorodani, thoko Apwiiya Nlhuku chaalhehenre aya Ashinna Musa, karumiya aya. 9Ilhapo aya yaari uchokholhelha Uaroeri nchereshere nshepa no Uarnoni ni iwani yaari variyari nshepa, ni ilhapo yonkhaye yo uhikhalhe miako ukhuma Umadeba mpaka Udiboni, 10vamoka ni iwani ya amwene Nasihoni o Uamori yaatawanre Uheshboni mpaka umwiinanoni mwa attu o Uamoni, 11vamoka ni ilhapo cho Ugileadi, ilhapo ya Ageshuri ni ya Aamaakhathi, mwaako wo Uhermoni ni ilhapo yonkhaye yo Ubashani mpaka Usaleka, 12ni umwene wonkhaye u Naoga mmoka a Arefai yaahalhenlhe, yaatawanre Uashtarothi uwo, ni Uedrei, Ubashani. Ashinna Musa ahaakottolha yayo onkhaye ayo ni ukusha ilhapo aya. 13Ata chiicho Ageshauri Aisraeli khayoomolhiye ni Amaaka, nansho anokhalha munlhokokoni helho nna.
14Ashinna Musa khayaavanhe attu o nikosho na Alawi ilhapo iriyoothe. Nansho isadaka chaakumiheriye aya Apwiiya Nlhuku o Uisraeli wo upahiya vamooroni. Chechiyo phi ari chawaya thoko Apwiiya Nlhuku cheerenlhe ashinna Musa.
Iwani chaavahiye attu o nikosho ni Narobeni
15Mpatta wo ilhapo ashinna Musa yaavanhe aya attu o nikosho na Narobeni wo ulhikaana ni manyaalhoko aya, 16yaari uchokolhelha Uaroeri nchereshere nshepa no Uarnoni ni iwani yaari nenno nshepa nno vamoka ni ilhapo yonkhaye ihirii yo miako yo Umedeba. 17Yaari chiicho vamoka ni Uheshboni ni iwani chaya chonkhaye chaari uhiri yo miako, yaani Udiboni, Ubamothbaali, Ubethbaali meoni, 18Uyahasa, Ukedemothi, Umefaathi, 19Ukiriathaimu, Usibma, Userethshahari, umiakoni uhito uwo, 20Ubethpeori, unokhuruwelha mwaako wo Upisga, Ubeth yeshimothi, 21ni iwani chonkhaye chihiri cho miako, ilhapo yonkhaye ya amwene Nashihoni a Aamori aatawara Uheshboni uwo, ashinna Musa ahaakottolha Nasihoni vamoka ni ahoolhelhi o Umidiani, Uavi, Urekemu, Usuri, Uhuri, ni Ureba, aatawara ilhapo vakittu va amwene Nasihoni. 22mmoka a attu eeviye ni attu o Uisraeli ari Nabalaamu, ntu o ulhohera chittu, anaaya Nabeori. 23Mwiinano wo ilhapo yo nikosho ni Narobeni mpata uneelha nchuwa waari mwoolhoko wo Uyorodani. Iwani ni ittoko chiromolhiye va, phi chiyo chaavahiye aya attu o makosho a Narobeni.
Iwani chaavahiye attu o nikosho ni Nagadi
24Ilhapo ashinna Musa yaavanhe aya attu o nikosho ni Nagadi wo ulhikaana ni makosho aya, 25yaari Uazeri, iwani chonkhaye cho Ugileadi ni nusu yo ilhapo ya attu o Uamoni mpaka Uaroeri irii vakiviru uwani o Uaraba, 26tho uchokholha Uheshboni mpaka Uramathmizpe, Ubetonimu, ni ukhuma Mahanaimu mpaka Udebiri, 27tho iwani chaari unikoote no Ubethharamu, Ubethnimra, Usukothi ni Uzafoni, ni ilhapo yaahanlhe irii ya amwene Nasihoni o Uheshboni, yeyo ilhapo iyo yaari mpata uneelha nchuwa mwoolhoko wo Uyorodani ni ukhalha mpata awe no nttiya no Ugalilaya. 28Chechiyo iwani ni ittoko chiyo phi chiyo chaavahiye aya attu o nikosho ni Nagadi wo utwaraana ni mahimo aya.
Iwani chaavahiye attu o nikosho ni Namanase
29Tho, ashinna Musa ahaavara inusu attu o nikosho ni Namanase wo utwaraana ni mahimo aya, 30ilhapo uchokholha Mahanaimu mpaka ukelhelha ilhapo yonkhaye yaari ya amwene Naoga, Ubashani, vamoka ni iwani makhumi sita cho Yairi, 31nusu yo Ugileadi, Uashtarothi, Uedrei, iwani yuulhupalhe yaakhalha aya amwene Naoga o Ubashani, mwommo mwonkhaye mmo aavahiye inusu ayari a Namakiri anaaya Namanase, wo utwaraana ni mahimo aya.
32Chiichammo phi chenre aya ashinna Musa wo waamianihera ilhapo yo unoshelha nchuwa iwani yo Uyeriko ni Uyorodani, ikatema vaari aya ilhapo ihiri miako yo Umoabu. 33Nansho ashinna Musa kaavahilhe attu o nikosho ni Alawi ilhapo iriyoothe. Yayo manyaattu ayo eerenlhe wiira vakittu yo yeyo inokhalha waakavihera Apwiiya Nlhuku, Nlhuku a attu o Uisraeli.
Currently Selected:
Nayoshua 13: MOT
Highlight
Share
Copy
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
