Nahabakuki 3
3
Ulhapelha wa Nahabakuki
1Alha phi lhapenlhe namilhohi Nahabakuki,
2Inyu Apwiiya Nlhuku, kiheewa utotopelhiya winyu wo nlhatu no mitheko chinyu, mii kinowoova. Mpangeke chittu chiyo chichuwaniye ikatema ihu ilha. Vanohalha inyu uthunalha vawo, chonte, nnoonelhe ikiriri!
3Nlhuku howa ukhuma Utemani, Nlhuku Ntakatifu howa ukhuma umwaakoni Uparani. Nchakarimia awe wahokhuneelha irimu, ni ntotopelho nawe nkanaakhuneelha ilhapo.
4Nchakarimia awe waari thoko mwaari wo nchuwa, unomwalhia ukhuma mmoononi mwawe, muri machiri awe.
5Anorweeha mareta umihoolho wawe, ni mariro anoottwara utulhi waya.
6Eemelhaka ilhapo inoottikinyia, awehaka ilhapo chinoothukumelha. Miako cho mahuku o uhimalha chinowunthakachiya, ashimiako cho ulhipa chinootitimira, mwommo phiri iphiro chawe cho mahuku o uhimalha.
7Kahoona attu o Ukushani attwaruwaka, ni attu o Umidiani atetemelhaka.
8Inyu Apwiiya Nlhuku, chani nhothunalhelha ashimiolhoko chani, nhothunanelha maashi yo ibahari, ata nkamweetiha afarasi inyu, ni mikukuta cho ikhoto wiira nkottolhe?
9Mwaheesha chiire muura winyu, mwaheesha miupa chinyu vanripweni. Mwahaahulha ittaya ukhalha miolhoko.
10Miako chahowoonani nkachoova, mawambwe o maashi nkaavira mwommo. Wiisha yo ibahari yahoturuma, ni maashi nkayaawelha nchulhu.
11Nchuwa ni mweeri chahomaalha shiriri voonilhe aya upharelha wo miupa chinyu chaakuviaka chinene, eiyo, voonilhe aya nivaka ninyu nipharelhaka.
12Wo urushiya winyu mwahovira vachulhu ilhapo, nkamwaanyikhalhacha attu o ilhapo chinchi.
13Mwahorwaa woopolhani attu inyu, umwoopolha ntu nthanlhe inyu. Mwahonnyakathacha nhoolhelhi o nlhoko wa attu o uwonya, ni waarimelhiha attu anaaholhelha ayo.
14Mwahaahoma amwene miupa chinyu, mphingo vawiilhe aya thoko nayuupuru unimwarushacha, yeeshipaka waarimeelhiha amashikini vakittu vaneevitha aya.
15Wo ifarasi chinyu mwaheeta vachulhu ibahari, ibahari inothemwihiya ni mawambwe.
16Veewilhe aka yayo, nrima aka unowoova, malhaku aka anowoova, makhuva aka khanokhalha ni machiri, mieto chaka chinowoochelha weeta. Kinoomalha nihuku no mariro, anaawelha attu anonikelhelha.
17Ata mitini chaahituveke, ama mizabibu chahiimeke, ata mizeituni chaahimeke, ni imata chahiyariheke choolhia, ata ikhondoro chapoteraka, ni mihuwo chaahikhalheke mmahilhini,
18ata inakhalhaka chiicho kinoshangarara wo nlhatu na Apwiiya Nlhuku, kinonttapelhelha Nlhuku moopolhi aka.
19Athithi Apwiiya Nlhuku, phi machiri aka, anoolhipiha mieto chaka ukhalha thoko cho naahe, anookivaha machiri yo uvira vachulhu miako.
The Bible Version in Makua @The Word for The World International and Makua Language translators. All rights reserved.