Nahabakuki 2
2
Nlhuku nomwaakhulha Nahabakuki
1Kinoweemelha vachulhu ishanja, wiira koone, kinaakhulhiya chani mwaha wo wunlha waka. 2Yamalheke, Apwiiya Nlhuku ahaakhulha wiira, “Nlhepeke cho woonia chilha, vachulhu ivibau, ntu aviraka vavawo, ashomeke. 3Ukhalhawaya cho woonia chinaareriya ikatema yo ulhoka, phi cho woonia cho ikekheene chinaacha mahuku o umalhelha. Khalhaka unoopicha, mwaarerieke, wo ikekheene anoophiya, mena khanopicha. 4Nlhepeke wiira, attu ari ni itiyamaru, yayo anorimeelhihiya, nansho attu oombone anoolhokelha wo unkhulhuvelha Nlhuku.”
Attu o uwonya anorimeelhihiya
5Wo uthepa vavawo, idivai inoopoteriha, ntu o itiyamaru khanolhokelha. Ri chiireru waamiria akina thoko mariro, mena khanothoshiya. Noothukumaniha attu o ilhapo chonkhaye thoko nhakhu awe. 6Kila ntu nompangelha mattepwa yoyo ntu uyo ni untangacha pufya eeraka wiira. “Nhothapana inyu nneevaha chittu chihiri chawinyu, ni weeshera imboote chittu cha attu wo uhihokolhosha! Nnoothepa upanga chiicho mpaka iyaakhani?”
7Nansho nihuku nimoka attu mwaashimilhe chittu chaya anoweemelha wo uthuthuwelha, attu nnowoova inyu anowunkwa. Phi nohalha inyu ukhalha mateeka aya! 8Inyuva uhaakha nhakhu wi ilhapo chinchi, nansho onkhaye anohalhelha akumi ayo anowaakhani inyuva, wo wiiva ni waakha mwaapangenlhe inyu attu onkhaye anokhalhacha iwaani chiyo.
9Nhothapana inyu nneevaha nhakhu ni utheka inupa inyu vachulhu miako wo waathurulha attu, mwaanyiheraka wiira nnoottawa ntwarusho. 10Nansho wo nlhatu wo mwaha wo wiiva winyu nhoolhiha miuru ashilhoko inyu. Tho, wo nlhatu no waarimeelhiha attu o ilhapo chinchi, nheerimeelhiha ukumi inyu mwaanene. 11Ata malhuku anoutukutuwelhani vashirini, ni iboriti cho inupa chinoopanga chiicho.
12Nhothapana inyu nnotheka ittoko wo weevakacha attu, ni ulhipiha iwaani yuulhupalhe wo upanga chittu cho uhilhoka. 13Apwiiya Nlhuku o mphingo kaheena phi nopanga, machiri a attu apoterere umooroni? Ni ilhapo chipange ntheko wo uhipatta ittu. 14Attu enchi anoochuwelha uyuulhupalhe wa Apwiiya Nlhuku, thoko maashi chinochara aya ubaharini.
15Nhothapana inyu nnaahapalhiha owaatamana inyu, ni wunchereria chittu cho uhapalha, wiira mwooneke anari pwithipwithi. 16Nnowoona ishoni, badala yo nthimicho. Nnoowuria mwanene ni uthetheruwa. Apwiiya Nlhuku mwanene anouhapalhani, ni ishoni inootiyelhelha nthimicho winyu. 17Uwonya waapangenlhe inyu attu o Ulebanoni unouhokolheelhani mwaanene, ni mitheko chinyu cho weevakacha ashinama chinowoovihani. Onkhaye ayo anoupattani inyuva, wo nlhatu no wiiva ni waakha mwaapangenlhe inyu attu o iwaani chonkhaye.
18Isinyago ihemiye ni ntu inolhoka vayi? Isinyago phi malhuku o uthulhushiya, phi ittu inowanelhiha woothacha. Ntu nohema isinyago, nokhulhuvelha ittu hemilhe awe mwanene, isinyago hinooria ata wuulhumacha! 19Hothapana ntu neerelha nipoto niri vathi, “Wunkweke!” Ama nlhuku nihinoolhumacha “Weemelhe!” Chani, isinyago inowooria umwiittuchiha ntu? Mmweheke, ihohikiya idhahabu ni isiliva,
nansho kirina ukumi uriwoothe.
20Nansho Apwiiya Nlhuku ari wi Inupa aya itakatifu, attu o ilhapo chonkhaye imaalheke shiriri umihoolho waya.
The Bible Version in Makua @The Word for The World International and Makua Language translators. All rights reserved.