Itorati 28
28
Ibarakha wa attu anorumelhelha
(Ala 26:3-13; Itor 7:12-24)
1“Mwaarumelhelheke Apwiiya Nlhuku inyu, ni uvarechesha wo nrima nlhove kinouhimeriakani lhelho nna, anoupangani ukhalha vachulhu, waapwaha makosho onkhaye o velhaponi va. 2Mwaarumelhelhaka Apwiiya Nlhuku inyu nnoovahiya ibarakha chinottwara chi:
3“Apwiiya Nlhuku anoohelha ibarakha iwani chinyu ni ipuwa chinyu.
4“Apwiiya Nlhuku anouvahani ibarakha yo waapatta achishaana enchi, choolhia chinchi, ing'ope ni ikhondoro chinchi.
5“Apwiiya Nlhuku anouvahani ibarakha yo uruweria choolhia chinchi, ni inyipo chinyu cho wuthuwanyera mikatte khachinokhalha chiicho.
6“Apwiiya Nlhuku anouvahani ibarakha kila vanohohalha inyu ukhalha, ni kila ittu inohalha inyu upanga.
7“Apwiiya Nlhuku anouvahani machiri o waakottolha amalhaponi inyu vanoukelhelha ayani. Anoukelhelhelhani wo iphiro imoka, nansho anouttawani wo iphiro saba.
8“Apwiiya Nlhuku inyu anoohelha ibarakha chaya mmakhupini mwinyu nnoshungerera inyu choolhia, ni mmithekoni mwinyu mwonkhaye. Anouvahani ibarakha mwiilhaponi mwonkhaye nnokelha inyu uvahiya.
9“Apwiiya Nlhuku anoupangani nkhalhe attu aya atakatifu, thoko chinre aya wo ulhelhani, mwarumelhelhaka nlhove naya yayo Apwiiya Nlhuku inyu ayo, ni uttwara iphiro chaya. 10Tho, ilhapo chonkhaye velhaponi chinoowoovani, choonaka wiira Apwiiya Nlhuku ahothanlhani mwaattiva ukhalha phi attu aya. 11Apwiiya Nlhuku anouvahani ibarakha yo chittu chinchi: Ibarakha cho achishaana enchi, cho mihuwo ni choolhia mmamatani, wiilhaponi waalhupelhenlhe aya waavaha manyaapwiiya inyu. 12Apwiiya Nlhuku anouhulhelhani nikhupi naya noombone no wiirimu, anoorupiha ipulha velhaponi wo nlhalha aya, ni uvaherani ibarakha munthekoni mwinyu. Nnowa mwaashimiha attu o ilhapo chikina, nansho mwattiva khannowa mwaashima ittu. 13Apwiiya Nlhuku inyu anoupangani nkhalhe phi o uchokholha, kuhii o umalhihera. Nnoothepa urwaa miholhoholho, kuhii attu o uhokolhia utulhi, mwavarechesha malhehero aya anouvahaakani lhelho alha ni urumelhelha upanga. 14Nansho nhaarukunuwe wo iphiro iriyoothe, nkamwaattwara ni ukavihera milhuku chikina.
Itatako cho ukhota urumelhelha
(Ala 26:14-46)
15“Nansho mwaahirumelhelheke nlhove na Apwiiya Nlhuku inyu, ama mwaahirumelhelheke ni upanga chinothanana aya, ni uttwara malhove aya onkhaye ni ikano chinouhimeriakani lhelho chilha, paahi nnoolhaviya malhavo onkhaye alha:
16“Apwiiya Nlhuku anoolhava iwaani ni imata chinyu.
17“Apwiiya Nlhuku anoolhava ittutu chinyu cho ukhungurelha, wiira nhiruwerie choolhia, ni inyipo chinyu cho wuthuwanyera mikatte.
18“Apwiiya Nlhuku anowaalhava achishaana inyu, choolhia chinyu cho mwiilhaponi, ni mihuwo chinyu chinoolhaviya wiira chihunchererie.
19“Apwiiya Nlhuku anoolhava kila ittu inohalha inyu upanga.
20“Mwaawonyaka ni waahiya waarumelhelha Apwiiya Nlhuku, anouwiiherani mariro, uhiiwanana, ni uhuvahuva mmithekoni mwinyu mwonkhaye, mpaka vanohalha aya urimeelhihani lhakalhaka, wo uhipicha. 21Anouwiiherani mareta ahinotondova, mpaka attu onkhaye vanohalha aya urimeelhacha lhakalhaka wiilhaponi unorwaa inyu ukhalha yawinyu uwo. 22Apwiiya Nlhuku anowaatani wo uwiiherani mareta o uraulhihana, itekusha, anammatu, ntukutta no uthepa, nttona, iphioo yo machiri, ni ittapwe yinchi. Chechiyo chittu chiyo chinoutwarushani mpaka vanohalha inyu onkhaye urimeelhacha. 23Irimu inowuuma nko thoko ishaaba yo riipa, wo uhirupa ipulha, ni ilhapo inookhalha thoko iyuuma. 24Apwiiya Nlhuku khanorupiha upulha, nansho anowaaruma anaayupuru ni ntukurukhu, chuurupelheni mpaka vanohalha inyu urimeelhachihiya.
25“Apwiiya Nlhuku anouhiyani nkottolhiye ni amalhaponi inyu. Nnorwaa waatakana wo iphiro imoka, nansho nnowaatawa wo iphiro saba. Ni attu onkhaye o velhaponi vanohalha aya uwoonani, wo chittu chuupantteni, anowoovacha. 26Vanohalha inyu ukhwaacha vawo, mitembo chinyu chinookhalha yolhia ya ashinuni ni ashinama, wo uhikhalha ntu o woomolhacha. 27Apwiiya Nlhuku anoutwarushani wo uwiipihani anammatu thoko eepihiye aya attu o Umisri, anohalha uphulia ni uhelhani makhwata, anouhelhani uvelhe ni unena uhinolhamiya. 28Apwiiya Nlhuku anouwiiherani mariro o ukelhiya ihalhahalha, nnookhalha attu ohoona ni uthakaneelhiya irusho. 29Nnohalha weeta wo waapapelhacha uthana thoko attu ohoona, ni mena khannoria upanga mitheko chinyu. Nnookhalha attu o waakhiya chittu kila nkwaha, ni khannokhalha ni ntu o ukaviherani.
30“Nnoowa mwaaveka ashimialhi, nansho attu akina anoowa waarupana wo tuteni. Mwathekaka manupa attu akina phi anowa ukhalha mmanupani mmo. Mwaalhaka mizabibu attu akina phi nowa aakhungura. 31Ing'ope chinyu chinoowa chaahithakachiya mwaashinene mwoonaka, nansho kannolhawiha ata ipilhipicha imoka yo inama aya. Iphuta chinyu chinookushiya wo machiri mwaashinene mwoonaka, ni mena khannohokolhosheriya. Ikhondoro chinyu anoovahachiya amalhaponi inyu, ni mena khanokhalha ntu o ukavihani waachiichiha. 32Achishaana inyu ashilhopwana ni ashithiyana anoorweehiya wa attu akina ukhalha ipotta mwaashinene mwoonaka, nkamwaaweherera uthana wonkhaye wiira ahokolhie, nansho nhikhalhaka ni machiri o upanga ittu iriyoothe.
33“Attu ahinaachuwelha inyu anookusha choolhia chonkhaye cho velhaponi winyu, ni maphepu o ntukutta ninyu, nhipattaka ittu, nansho waakakhachiya ni utwarushiya wo mahuku o uhimalha. 34Nnoowa mwaakelhiya ihalhahalha wo nlhatu no chittu chinohalha inyu woona ni miitho inyu mwaashinene. 35Apwiiya Nlhuku anowiipihani analhipwe o uweria ahinolhamia mmakuthani mwinyu, anouwanelhani toka vattomelhani mpaka unyaani.
36“Apwiiya Nlhuku anourweehani inyuva ni amwene inyu, anohalha inyu waavara nchina, mpaka ilhapo nhinochuwelha inyu, mena manyaapwiiya inyu khayaachuwenlhe. Ni wowo nnokolhapelha milhuku chikina cho miri ni cho malhuku. 37Ni inyu nnokookhalha ittu yo ushangiya, yo upangelhiya mattepwa, ni yo uheulhachiya mmilhokoni mwa attu onkhaye o ilhapo inohalha inyu urweehiya ni Apwiiya Nlhuku. 38Nnokowaalha imbeyu chinchi, nansho nnowa ukhungura vakani, ukhalhawaya anashombe anolhiacha choolhia chinyu chiyo. 39Nnokowaalha mizabibu ni ulhimelha, nansho khannorukulha izabibu chiyo, wala uwuria idivai aya, ukhalhawaya ankhonya anoolhiacha. 40Nnookhalha ni miri cho mizeituni kila vakittu mwiilhaponi mwinyu, nansho kannokhalhana makhura, ukhalhawaya itoolho cho izeituni chiyo chinoomoracha. 41Nnowaayaracha achishaana ashilhopwana ni ashithiyana, nansho khanokhalhacha awinyu, anookushiya mateeka. 42Anashombe anoolhiacha choolhia chonkhaye ni mathaakhuru o miri cho maphepu, mmamatani mwinyu.
43“Alheto anokhalhacha mwiilhaponi mwinyu anoothepa upatta machiri, ni inyu mwaatti nnoothepa uwukuwa kila nihuku. 44Yayo manyaattu ayo anowaashimihani mwaatti nchurukhu, nansho inyuva khannokhalha ni ittu yo waashimiha. Ni wo umalhihera yayo manyaattu ayo anoowa ootawarani.
45“Yayo onkhaye ayo anoupattani mwaatti, ni uttwarani mpaka nrimeelhihiye, ukhalhawaya khanrumelhenlhe nlhove na Apwiiya Nlhuku inyu, ni uvarechesha iamuri chaya ni malhehero ovanheni aya ayo. 46Nansho chiyo chinookhalha phi cho uhimiechesha ihukumu ya Apwiiya Nlhuku uwannyu, ni iyari chinyu mahuku o uhimalha. 47Apwiiya Nlhuku inyu ahouvahani ibarakha kila iphiro, nansho mwaattiva khamwaakavihenre wo nrima wo uteelhiya ni ushangarara. 48Paahi etu nnowaapangelha ntheko amalhaponi inyu, anohalha aya Apwiiya Nlhuku waaruma ookelhelheni. Ni inyu nookhalha ni ithalha, nttona, ushauchi, ni kila ittu inoumalhelhani. Paahi amalhaponi inyu anoutwarushani chinene mpaka vanohalha inyu urimeelhacha.
49“Apwiiya Nlhuku anowiiha ukhuma utayi ilhapo imoka ihinochuwelha inyu nuulhumo naya, yuukelhelheni wo waakuvia thoko nrepo. 50Yayo attu o woopiha wiitho ni o ushilhilhi ayo, khanowa aalhoha ashulhupalhe mena woonelha ikiriri ashimirawo, 51anookhuurakacha mihuwo chinyu ni ulhia choolhia chinyu, mpaka vanohalha aya urimeelhihani. Khanowa oohiyerani choolhia, wala idivai, wala makhura, wala ing'ope ama ikhondoro mpaka ithalha vanohalha aya urimeelhani. 52Yayo attu ayo anourukureriani ni utiyelhelhani kila vakittu wiilhaponi mwinyu nvahiye inyu ni Apwiiya Nlhuku inyu, mpaka ishiri chinyu chinorukureria iwani ni ingome chaakhulhuvelha inyu chiwulhushiye vathi.
53“Ikatema vanohalha inyu urukureriya ni utiyelhelhiya ni amalhaponi inyu, nnoowolhia ithalha chinene, mpaka nnowaakhuura achishaana inyu nvahiye inyu ni Apwiiya Nlhuku inyu. 54Ata ntu o maalha chinene lhelhiye rata chinene, nowa anthuwa yoolhia nhima awe, ahanu awe anaattuna awe ni mwaamwanawe halhenlhe, 55mena khanowa annyukuthulhelha ata mmoka aya, inama ya achishaana awe nohalha awe waakhuura ayo. Khannowa mwaahalhelhiya ni ittu iriyoothe ikatema yo urukureriya ni utwarushiya ni amalhaponi mwiilhaponi mwinyu mwonkhaye. 56Ata nthiyana o maana chinene, lhelhiye rata, o rera chinene, o nhakhu, hinapacha unyikalha ittaya wo nnyaa nawe nowa upanga ittu thoko yeyo. 57Yeyo ikatema yo urukureriya ni utiyelhelhiya iyo unowa ukhalha ithalha, ata nowa ankhuura mwaamwanawe mwankani, nnyanre awe ni ithokwa inokhuma vatulhi baada yo uyaria mwaana ilhe, wo uhaanyukuthulhelha ata owannyawe naattuna awe, ama mmoka a achishaana awe.
58“Mwaahikhalheke ni irusho cho upanga malhove onkhaye o malheheriyo alhepiye nkitabuni alha, ni mwaahithimicheke ni ushungerera nchina nitakatifu no woopiha na Apwiiya Nlhuku inyu, 59paahi, Apwiiya Nlhuku anouwiiherani inyuva ni achishaana inyu ntwarusho nihiri no kawaida, ntwarusho no uweria nihinolhamiya ni o mahuku onkhaye, ni mareta oweria o uhimalha. 60Anouwiiherani tho, mareta mwoova inyu mwiilhaponi Umisri alhe, ni ayo anouttwarattwarani mahuku onkhaye. 61Anouwiiherani mareta o kila iphiro, ni ntwarusho nikina nihiromolhiye nkitabuni mwo malhehero mu mpaka nrimeelhache. 62Inakhalhaka mwaattiva nri enchi thoko ittotwa cho wiirimu, nansho nnookhalha vakani, ukhalhawaya khanrumelhenlhe nlhove na Apwiiya Nlhuku inyu. 63Tho, Apwiiya Nlhuku thoko chenre aya wo uteelhiya wiira nchine ni ukhalha enchi, phi chiichammo Apwiiya Nlhuku chinohalha aya uteelhiya uwiiherani mareta ni urimeelhihani. Ni inyu mwaatti nnoowa mwaathamihiya wiilhaponi nnorwehiya inyu wiira nkhalhe mwawinyu mmo.
64“Apwiiya Nlhuku anoumwarushani mmilhokoni mwo ilhapo chonkhaye, ukhuma mpata mmoka wo ilhapo mpaka nkina, ni wowo nnokokavihera milhuku chikina cho miri ni cho malhuku, milhuku chihipanche inyu mwaashinene, ata ashulhupalhe inyu uchuwelha. 65Khannokhalha ni mpuha uriwoothe vakittu winyu vo wiittuwa mwaashinene, wala mmilhokoni mwo chechiyo ilhapo chiyo. Wowo Apwiiya Nlhuku anowa ovahani nipampa no nrima, naawiriphi mmiithoni ni uhuvihiya munrimani. 66Mahuku onkhaye nnoohalha mwoovaka uthana ni uhiyu, wiira amalhaponi inyu anowiivakachani. 67Mirima chinyu chinoowoova kila ittu inohalha inyu woona. Wichishu nnoowa mweera, ‘Yakaari uchechilho,’ ni uchechilho weelhaka nnowiira, ‘Yakaari wichishu.’ 68Apwiiya Nlhuku anouhokolhoshani Umisri wo nkwaha wo mmelini, nkwaha waahimilhe aya wiira khannorwaa tho. Wowo nnokoolhikacha wiithumiha wa amalhaponi inyu ukhalha ipotta, nansho khaawo ata ntu nohalha uthumani.”
Currently Selected:
Itorati 28: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
