Itorati 27
27
Malhuku meelhi aalhepiye Malhehero a Apwiiya Nlhuku
1Paahi ashinna Musa vamoka ni ashulhupalhe o Israeli, ahoolhumacha ni weerelha attu wiira, “Mvarechesheke iamuri chonkhaye chinouvahaakani lhelho chi. 2Nihuku nne vanohalha inyu ulhapuwa mwoolhoko wo Uyorodani ni ukelha mwiilhaponi nnovahiya inyu ni Apwiiya Nlhuku inyu, mweemesheke malhuku molhupalhe ni ushiringa. 3Mwalhepeke vachulhu waya vawo, malhove onkhaye o iamuri chonkhaye chilha, vanohalha inyu ukelha ilhapo yo nhakhu ni yo ulhoka ulhima ni uhuwelha mihuwo inouvaha ayani Apwiiya Nlhuku, Nlhuku a manyaapwiiya inyu, yaalhehilhe aya iyo. 4Vanohalha inyu ukhalha ukhopelhelhe wo mwoolhoko wo Uyorodani, mweemesheke malhuku vachulhu mwaako wo Uebali, thoko chinouhimeriakani lhelho va, ni ushiringa. 5Mwaathekelheke Apwiiya Nlhuku inyu madhubahu o malhuku o uhihemiya vavawo vakittu vawo. 6Eiyo, ukhalhawaya madhubahu ariyoothe nnothananiya inyu waathekelha Apwiiya Nlhuku inyu, athekiyeke wo malhuku o uhihemiya ni iyuuma. Vavawo vachulhu madhubahu vawo, mwaakumihereke Apwiiya Nlhuku inyu, isadaka chinyu cho upahiya vamooroni. 7Mwaakumihereke isadaka cho uwiiha mpuha, ni ulhelhia vavawo, ni uttapelhelha umihoolho wa Apwiiya Nlhuku inyu. 8Ni vachulhu malhuku ashiringiye ayo mwalhepeke wo woonia malhove onkhaye, ni malhehero a Apwiiya Nlhuku alha.”
9Paahi yamalheke, ashinna Musa vamoka ni opochera ishaani Alawi nkayeerelha attu onkhaye o Israeli wiira, “Umaalhiiye, nkiiwelhelheke inyu attu o Israeli. Lhelho nna inyuva nhokhalha attu a Apwiiya Nlhuku inyu. 10Paahi etu, nrumelhelheke nlhove na Apwiiya Nlhuku inyu, ni uttwara malheheriyo aya anoulheheraakani lhelho alha.”
Ulhaviya attu o Itiyamaru
11Paahi nenno nihuku ashinna Musa nkayaalhehera attu yeeraka, 12“Mwamalhihaka ulhapuwa mwoolhoko wo Uyorodani, alha makosho alha eemelheke vachulhu mwaako wo Ugerizimu wiira aalhepelhelhe attu ibarakha: Nikosho ni Nasimioni, ni Nalawi, ni Nayuda, ni Naisakari, ni Nayusufu, ni na Nabenyamini. 13Ni alha makosho alha aweeke yeemelha vachulhu mwaako wo Uebali, wiira ahimiache malhove o ulhaviya attu: Nikosho ni Narobeni, ni Nagadi, ni Naasheri, ni Nadani, ni na Nanaftali. 14Ni Alawi yaatangachereke attu onkhaye o Israeli wo nlhove nuulhupalhe wo wiira:
15“ ‘Alhaviyeke ntu riyoothe nolhapelha ittu yo uhemiya ama yo uhaniya, ni weemesha wo nivitho ittu ikooroshiye ni mathatha a ntu okoorosha chittu, ukhalhawaya yeyo phi ittu inaarusha Apwiiya Nlhuku inyu.’
“Ni attu onkhaye arumelhelheke, ‘Aye!’
16“ ‘Alhaviyeke ntu riyoothe hinaarumelhelha athumwanawe ama anumwanawe.’
“Ni attu onkhaye arumelhelheke, ‘Aye!’
17“ ‘Alhaviyeke ntu riyoothe nothamiha ikhomo yo wooniha mwiinano ni amwaatamana awe.’
“Ni attu onkhaye arumelhelheke, ‘Aye!’
18“ ‘Alhaviyeke ntu riyoothe nonthwelhelhiha ntu ohoona mphironi.’
“Ni attu onkhaye arumelhelheke, ‘Aye!’
19“ ‘Alhaviyeke ntu riyoothe norukunusha ikekhiaye ya nlheto, ama yo mwaana ohiiya, ama yo nankhwelhi.’
“Ni attu onkhaye arumelhelheke, ‘Aye!’
20“ ‘Alhaviyeke nlhopwana norupa ni mmoka a manyaahanu a athumwanawe, ukhalhawaya hoolhiha muru athumwanawe ayo.’
“Ni attu onkhaye arumelhelheke, ‘Aye!’
21“ ‘Alhaviyeke ntu riyoothe nonthelhakacha mwannama riyoothe.’
“Ni attu onkhaye arumelhelheke, ‘Aye!’
22“ ‘Alhaviyeke ntu riyoothe norupa ni arokorawe, akhalhe mwaamwana a athumwanawe ama a anumwanawe.’
“Ni attu onkhaye arumelhelheke, ‘Aye!’
23“ ‘Alhaviyeke ntu riyoothe norupa ni ahokohi awe.’
“Ni attu onkhaye arumelhelheke, ‘Aye!’
24“ ‘Alhaviyeke ntu riyoothe nomwiiva ntu wo nivitho.’
“Ni attu onkhaye arumelhelheke, ‘Aye!’
25“ ‘Alhaviyeke ntu riyoothe nopochera nchurukhu wiira amwiive ntu o uhikhalha ni nlhatu.’
“Ni attu onkhaye arumelhelheke, ‘Aye!’
26“ ‘Alhaviyeke ntu riyoothe hinorumelhelha malhove alha o malhehero alha ni urumelhelha.’
“Ni attu onkhaye arumelhelheke, ‘Aye!’
Currently Selected:
Itorati 27: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
