Itorati 25
25
1“Yakhalhaka indewo ya attu eelhi munlhokoni mwa attu o Israeli, nkaarwaa wa attu o waamulha milhatu wiira aamulhiye, mmoka aya nkoonia wiira khattenke, ni nkina nkaahukumulhiya, 2paahi etu ulhe hukumulhiye waatiya ikopo ulhe, o waamulha amwiirelheke wiira arupeke vathi aatiyeke ikopo chinolhikaana ni uwonya wawe. 3Aatiyeke ikopo makhumi ncheshe, nansho chihipwahe vavawo. Mwonchereraka vavawo, nnompangelha ittu yo uhilhoka nlhoko inyu, nnoomulhiha muru.
4“Tho, nhittuke ing'ope uwano ikatema vanovara aya ntheko wo weepetta choolhia umatani.
Inothananiya aya ntu nokelha manupa a munnawe
5“Yakhalhaka attu eelhi ashilhopwana o nthunkwa nimoka anokhalhacha vakittu vamoka, ni mmoka aya nkaakhwa wo uhinhiya mwaana mwanlhopwana, ahanu a yoyo rimenlhe uyo, ahivekiye ni ntu nkina, hirii o yeyo imbumba ya ntu khwilhe iyo. Nhima awe ntu khwiilhe uyo phi nothananiya ukelha manupa wa nankhwelhi uyo ni waayaracha ashaana. 6Mwaana mwanlhopwana o nttara nohalha uyaria uyo, nowaalhakelhelhiya wiira o ntu rimelhe ulhe, wiira nchina nawe nihikhwe mwiilhaponi Uisraeli. 7Nansho yakhalhaka nhima awe ntu khwilhe uyo khanothanana ukelha manupa, paahi etu yoyo nthiyana uyo arweeke umihoolho wa ashulhupalhe o iwani ni uhimia wiira, ‘Nhima aya owannyaka akhwilhe ayo, nookhota uchiniha nchina naya wiira nihipotere munlhokoni mwa attu o Israeli. Khanottuna ukelha manupa a onnawe arimeelhe.’ 8Yamalhaka, ashulhupalhe o iwani iyo amwiihaneke yoyo nlhopwana uyo ni umuulhumana. Yakhalhaka noothepa umindelha nlhove nawe no ukhota ukelha manupa nno, 9nthiyana nankhwelhi uyo arweeke umihoolho wa yayo ashulhupalhe o iwani ayo, anrulheke ikiatu awe imoka ni unshuwelha ishenye wiitho ni umwiirelha wiira, ‘Phi chiichammo inothananiya upangelhiya ntu nokhota ukelha manupa a munnawe ni unnyarelha ashaana.’
10“Ni iwani awe munlhokoni mwa attu o Uisraeli inohalha wiihaniya, ‘Imbumba ya ntu aarulhiye ikiatu.’
Malheheriyo makina
11“Ashilhopwana eelhi aatakanaka, ni nthiyana a mmoka aya nkaakaviha owannyawe ni ummara umattepe naatakana ni owannyawe ulhe, 12yoyo muntupulheke moono awe wo wiimonono, wala nhimoonelhe ikiriri.
13“Nhikushe munrupani mwinyu ni chittu cho uphimelha cho inamuna piilhi, imoka yo ulhemelha ni ikina yo waalhuwa. Nhintumiye kapani o woothacha uphimelha chittu. 14Mena nhikhalhe ni chittu cho uphimelha chittu cho inamuna piilhi unupani winyu, imoka yo wunnuwa ni imoka ikaani. 15Akapani ni chittu chinyu cho uphimelha chilhikaaneke ulhemelha waya, wiira mpatte nipesha no ulhokelha chinene wiilhaponi unovahiya inyu ni Apwiiya Nlhuku inyu uwo. 16Apwiiya Nlhuku inyu, anowaavenga attu onkhaye anopangacha chittu thoko chechiyo.
Malheheriyo o weeva attu o Uamaleki
17“Muupuwelheke chittu chaapangelhiye inyu ni attu o Uamaleki, ikatema vaari inyu munkwahani ukhuma Umisri. 18Ikatema yokelhenlhe ayani mphironi, vaari inyu attu o uririyacha ni waatakacha attu onkhaye aawa utulhi winyu anoochelhe. Attu o Uamaleki khayoonve Apwiiya Nlhuku. 19Paahi etu, ikatema Apwiiya Nlhuku inyu, vanohalha aya uuvahani ilhapo nkamweettuwa waatakachiya ni amalhaponi inyu onkhaye anourukureriani, mwaarimeelhiheke attu o Uamaleki onkhaye wiira ahuupuwelhiye tho. Nhikelhe mwalhiyalha!”
Currently Selected:
Itorati 25: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
