Itorati 24
24
Mwaha wo uhiyana nthelhi ni uhokolhelhana tho
1“Yakhumelhelhaka nthiyana ahothelhiya, ni kaanyuma alhopwana ayo nkayoona wiira khanchivelhiya, ukhalhawaya ahoona ittu yo uhilhoka, nkayammaha ikaratasi yo italaka ni unhokolhosha uwannyawe, 2ni nthiyana uyo nkaathelhiya ni nlhopwana nkina, 3tho yoyo nlhopwana o nayelhi uyo nkammaha italaka kaanyuma, ama akhwaaka, 4paahi nlhopwana o upachera ulhe khinooria tho unhokolhelha yoyo nthiyana uyo. Ukhalhawaya honyalhihiya wo iphiro ihinooria urumelhelhiya umihoolho wa Apwiiya Nlhuku. Upanga chiicho phi waarusha Apwiiya Nlhuku, wiilhaponi unokelha aya uuvahani ukhalhe wawinyu uwo.
Malheheriyo makina makina
5“Nlhopwana thenlhe naanano hirwee ukhotoni wala hivahiye ntheko nkina uriwoothe. Ahiiyeke akhalheke chiicho iyaakha imoka, wiira akhalheke uwaani apuheke ni ahanu awe.
6“Ntu riyoothe hikushe nshilho no ushilhelha ama nahaa, wiira eemesheriye iponi, ukhalhawaya upanga chiicho inokhalha thoko ukusha ukumi wa ntu uyo.
7“Ntu riyoothe ammaraka wo machiri Muisraeli nanawe ni umpanga ipotta awe, ama unthumiha upottani, yoyo ntu uyo eeviyeke. Vavawo etu, phi nohalha inyu umalhiha mwaha wo uwonya thoko yolha munlhokoni mwinyu.
8“Tho, ntu akelhiyaka makutulha mwiiruttuni, nvarechesheke rata ni uttwara malheheriyo a opochera ishaani Alawi. Nvarechesheke thoko chinre aka wo ulheherani, phi chiichammo chinothananiya inyu upanga. 9Muupuwelheke vaari inyu munkwahani ukhuma Umisri, Apwiiya Nlhuku inyu chenre aya wo waapangelha Namiriamu.
10“Mwamwaashimihaka namwaatamana inyu ittu iriyoothe, nhikelhe unupani wawe, ni ukusha ittu yo weemeshera iponi, 11nansho munlhitelhelheke vathe, munhiyeke mwanene ayo oovahekeni. 12Yakhalhaka nshikini, ni uyo nouvahani ikuwo awe, nhikhalhane yeyo iponi iyo mpaka uhiyu, 13munhokolhoshereke kila nihuku uchechilho, wiira uhiyu eekhunelhe ni ulhapelhelhani ibarakha. Mwapangaka chiicho, yeyo phi ittu yoombone umihoolho wa Apwiiya Nlhuku inyu.
14“Nhinnyenge nkibarua inyu nshikini, ama ntu o uvekelha, akhalhe Muisraeli naninyu ama mmoka a alheto anokhalhacha mwiilhaponi mwinyu. 15Kila nihuku nchuwa nihinaya wiilha, munlhiveke nshahara awe wo nihuku nno, ukhalhawaya yoyo nshikini, ni machiri awe ayo phi nokhulhuvelha awe, hiwe onlhelha Apwiiya Nlhuku, ni inyu nkamwaapatta milhatu cho uwonya.
16“Manyanaangoro ahiiviye wo milhatu chipangiye ni achishaana aya, mena achishaana ahiiviye wo milhatu cho uwonya wa manyanaangoro aya. Kila ntu eeviyeke wo uwonya wawe mwaanene.
17“Nhirukunushe ikekhiaye cha alheto, ni cha achishaana ohiiya. Mena nhikushe ikuwo yo nankhwelhi wiira nvarelhe iponi. 18Muupuwelheke wiira ni inyu mwaatti mwaari ipotta Umisri, ni Apwiiya Nlhuku inyu, ahoukumihani ukhuma wowo. Phi nlhatu etu no uvahani alha malhehero alha lhelho.
19“Vanokhungura inyu choolhia mmatani mwinyu, ni ulhiyalha machashi makina mwommo, nhihokholhelhe tho wiira mwarokotanihe, mwaahiyereke alheto, manyanankhwelhi ni achishaana ohiiya. Mwapangaka chiicho, Apwiiya Nlhuku inyu anovaherani ibarakha wo mitheko chinyu chonkhaye. 20Mwapukhunyaka mizeituni chinyu wiira nthomolhe maphepu aya, nhihokolhelhe tho upukhunya maritta aya, nansho mwaahiyereke alheto, manyanankhwelhi ni achishaana ohiiya. 21Vanorukulha inyu izabibu mmamatani mwinyu, nhihokolhelhe tho urokottanihani izabibu chihalhehanlhe, nansho mwaahiyereke alheto, manyanankhwelhi ni achishaana ohiiya, aweeke aarokottanihacha. 22Mmweeke mwoopuwelha wiira ni inyu chiicho mwaari ipotta Umisri. Phi nlhatu etu no uuvahani nna nlhehero nna lhelho.”
Currently Selected:
Itorati 24: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
