Itorati 16
16
Nihuku no uttapelhelhiya Pasaka
(Utt 12:1-20)
1“Nttapelhelheke mweeri wa Habibu ni unlhia Pasaka wo waathimicha Apwiiya Nlhuku inyu. Ukhalhawaya yoyo mweeri uyo, Apwiiya Nlhuku inyu ahouthamihani Umisri uhiyu. 2Mmweeke mwaakumiha isadaka yo nihuku no Pasaka ukhuma mmikutironi mwo mihuwo chinyu cho ikhondoro ama cho ing'ope wo waathimicha Apwiiya Nlhuku vakittu vanohalha aya uthanlha Apwiiya Nlhuku wiira nchina naya nikhalhe vavawo. 3Nhilhie yeyo isadaka iyo ni mikatte chihelhiye ihengedure iyo, ni chiyo phi mikatte chineehaniya mikatte cho ntwarusho, ukhalhawaya mwaakhumme Umisri wo waakuviacha. Paahi etu ikatema yonkhaye inohalha inyu ukhalha muupuwelheke nihuku naathamilhe inyu Umisri, waahuva inyu nne. 4Wo mahuku saba, ntu riyoothe mwiilhaponi mwinyu heeshe ihengedure unupani wawe. Ni inama yo mwannama hithiye uchechilho nihuku no uchokholha iyo, ihihalhihiye mmithe mpaka wichishu waya.
5“Mwaahitheke ashinama o isadaka yo Pasaka vawani variwoothe unouvaha ayani Apwiiya Nlhuku inyu, 6nansho mwakumihereke vakittu vanohalha aya uthanlha Apwiiya Nlhuku inyu, wiira mwaathimiche. Vavawo phi vanohalha inyu waakumihera isadaka iyo, uchechilho, nchuwa vanohalha aya wiilha ikatema thoko yelhe yaathamme inyu Umisri ilhe. 7Mwaapieke inama iyo ni ukhuurelha vakittu vanohalha aya uthanlhiya ni Apwiiya Nlhuku inyu, wiira mwaathimiche. Ni waashakaru, nrukunuweke nhokolhieke mmapuroni winyu. 8Wo mahuku sita nlhieke mikatte chihihelhiye ihengedure, ni nihuku no saba mweesheke nkutaano muulhupalhe wo waathimicha Apwiiya Nlhuku, ni vavawo nhiwe mwaapanga ntheko uriyoothe nenno nihuku nno.
Isikukuu yo ukhunguriya choolhia
(Utt 34:22; Ala 23:15-21)
9“Mwaalhakelheke majuma saba, nchokholhelhaka nihuku ninochokholha inyu ukhungura choolhia, 10ni tho, mmweeke mwaattapelhelha isikuukuu yo majuma iri phi isikukuu yo uchokholha ukhunguriya choolhia, wo ukumiha isadaka yo uttuna winyu mwaashinene, inohalha inyu ukumiha thoko chivaheriye inyu ni Apwiiya Nlhuku inyu. 11Mmweeke mwaattapelhelha umihoolho wa Apwiiya Nlhuku inyu, mwaattiva mwaashinene ni achishaana inyu ashilhopwana ni ashithiyana, ashikarumiya inyu, Alawi, manyaalheto o makosho makina, manyanankhwelhi ni achishaana ohiiya, anokhalhacha vamoka ni inyu. Mpangeke yayo vakittu vanohalha aya uthanlha Apwiiya Nlhuku wiira athimichiye. 12Mmweeke mwoopuwelha wiira ni inyu mwaatti mwaari ipotta Umisri ulhe, paahi etu mwiiwelhelheke rata ni uttwara alha malhehero alha.
Isikukuu yo marapatta
(Ala 23:33-43; Waal 29:12-39)
13“Mwamalhihaka weepetta choolhia chinyu chonkhaye ni waamakacha izabibu chinyu, mmweeke mwaattapelhelha isikukuu yo marapatta wo mahuku saba. 14Mmweeke mwaattapelhelha umihoolho wa Apwiiya Nlhuku inyu, mwaattiva mwaashinene ni achishaana inyu ashilhopwana ni ashithiyana, ashikarumiya inyu, Alawi, manyaalheto, manyanankhwelhi ni achishaana ohiiya, anokhalhacha vamoka ni inyu. 15Wo mahuku saba mmweeke mwaapangelha Apwiiya Nlhuku inyu isikukuu vakittu vanohalha aya uthanlha wiira athimichiye. Ukhalhawaya Apwiiya Nlhuku inyu, anouvahani ibarakha wo choolhia chinyu chonkhaye, ni wo ikekhiaye nnoowa mwaateelhiya.
16“Kila nlhopwana munlhokoni mwa attu o Israeli aweeke umihoolho wa Apwiiya Nlhuku inyu, mikwaha miraru kila iyaakha, vakittu vanohalha aya uthanlha wiira athimichiye vawo. Nihuku no isikukuu yo Pasaka, isikukuu yo ukhunguriya choolhia ni isikukuu yo marapatta. Nansho hiwe aarwaa umihoolho wa Apwiiya Nlhuku mathatharu. 17kila ntu akumiheke thoko chinohalha awe wooria wo ulhikaana ni ibarakha chivaheriye awe ni Apwiiya Nlhuku inyu.
Waamulhiya milhatu cha attu wo ikekhiaye
18“Mwaathanlheke attu o waamulha milhatu ni attu o ipilhi akina, o ukhuma mmakoshoni mwinyu ni mmawani mwinyu mmo, nnohalha aya uuvahani Apwiiya Nlhuku inyu, ni ayo avareke ntheko wo waamulha milhatu cha attu wo ikekhiaye. 19Nhirukunushe ikekhiaye, nhimmwehe ntu wiitho, ni mena nhipochere ittu ukhuma wa ntu. Ukhalhawaya irushwa inootiyelhelha miitho a attu o irusho ihoonie ikekhia, ni ukukureha milhatu cha ntu o makhalhelho oombone. 20Nvarechesheke ikekhiaru, wiira nkhalhe ni uvarelha rata ilhapo inohalha inyu uvahiya ni Apwiiya Nlhuku inyu iyo.
21“Vanotheka inyu madhubahu a Apwiiya Nlhuku inyu, nheemeshe nipoto no mwiri uriyoothe wiira ukhalhe phi nipoto na nlhuku nthiyana o woothachiya, Ashera. 22Tho, mena nheemeshe nipoto no malhuku wo nlhatu no uthimicha. Mwapangaka chiicho, Apwiiya Nlhuku inyu, anoorushiya.
Currently Selected:
Itorati 16: MOT
Highlight
Copy
Compare
Share
Want to have your highlights saved across all your devices? Sign up or sign in
The Bible Version in Makua @The Word for The World International and Makua Language translators. All rights reserved.
