Itorati 15

Iyaakha yo Wiittuwa

(Ala 25:1-7)

1“Kila mmalha iyaakha wo iyaakha yo saba, mwaahiyerereke attu onkhaye ari ni madeni uwannyu. 2Ilha phi iphiro inowa inyu upanga. Kila ntu nkopihilhe ittu ntu o Israeli nanawe, afuteke n'deni nno, ni wala hilhikache unkohakoha tho, ukhalhawaya Apwiiya Nlhuku anene phi lhehenre wiira n'deni nno nifutiyeke. 3Nnowooria waakohakoha alheto madeni inyu, nansho nfuteke madeni onkhaye a ashilhoko inyu.

4“Apwiiya Nlhuku inyu, anouvahani ibarakha wiilhaponi unokelha aya uuvahani wiira ukhalheke uwannyu. Khaawo ata mmoka nohalha ukhalha nhumaathi munlhokoni mwinyu, 5mwaarumelhelhakaru Apwiiya Nlhuku inyu, ni mwattwaraka rata malhehero kinouvahaakani lhelho alha. 6Yayo anookhalha chiicho ukhalhawaya, Apwiiya Nlhuku, anouvahani ibarakha thoko chenre aya wo ulhehani. Ni inyu nnoowa mwaakopesha nchurukhu attu o makosho menchi, nansho mwaatti khannowa mwaakopa ittu. Tho, nnoowa mwaatawara attu o makosho menchi, nansho yayo makosho ayo khanowa otawarani mwaattiva.

7“Akhalhakaru ntu nshikini munlhokoni mwinyu, mwiilhaponi unokelha inyu uvahiya ni Apwiiya Nlhuku, nhiwe mwaakhalha ni mirima cho ilhema ni cho ulhipa wa yoyo ntu uyo. 8Nansho mwookolheke miono chinyu, munkopiheke wo uttuna winyu, ittu yulhupalhe thoko chinophavelha aya. 9Mweechinanelheke, nhikelhe mwakhota unkopiha ittu, ukhalhawaya nnoona wiira iyaakha yo saba ihaatameria. Nhihiye wowo uwonya uwo, wala yayo moopuwelho ayo akelhe mmamirimani mwinyu. Ukhalhawaya mwankhotelhaka, yoyo nowooria wonlhelha Apwiiya Nlhuku wo nlhatu winyu ni iyo nkamwoonia wiira nhowonya. 10Mummaheke nlhoko inyu nshikini uyo wo nrima woombone wo uhichukulhacha, ukhalhawaya wo yoyo nlhatu uyo Apwiiya Nlhuku inyu, anouvahani ibarakha mmithekoni mwonkhaye nnovara inyu. 11Ukhalhawaya amashikini khanowa aamalha velhaponi, paahi kinoulheherani wiira nkhalheke ni nrima woombone wa attu anohuvelha.

Iphiro cho weeriha ipotta

(Utt 21:1-11)

12“Yakhalhaka ntu o Israeli naninyu, nowiithumiha uwannyu ukhalha ipotta, ikhalhe mwanlhopwana ama mwanthiyana, avareke ntheko uwannyu iyaakha sita, nansho iyaakha yo saba, munhiyerereke. 13Ni vanohalha inyu unhiyerera vawo, nhinhiye arwaaka mathatharu. 14Mummaheke wo nrima woombone, ittu ivaheriye inyu ni Apwiiya Nlhuku ilhe, ikhondoro, ama choolhia, ama idivai. 15Muupuwelheke wiira ni inyu mwaatti mwaari ipotta Umisri, ni Apwiiya Nlhuku inyu, ahowookholhani, phi nlhatu etu ninoulheheraakani lhelho mwiire chiicho.

16“Nansho owiirelhakani, ‘Akinthama vawaninyu va,’ wo nlhatu no uuttunani inyuva ni ashilhoko inyu, ni uthanana ukhalha vamoka ni inyu, 17paahi etu munkusheke mpaka vankhorani, mmwieke ntottelho, muntemulheke nnyaru nawe mpaka ntottelho uyo uperetteke ni uhoma vankhorani vawo. Ni uyo nookhalha ipotta inyu mahuku o uhimalha. Ni chiichammo, mumpangelheke ipotta inyu nthiyana. 18Wala nhoone urikarika unhiyerera ipotta inyu, ukhalhawaya ahovara ntheko inyu iyaakha sita, wo malhivo nusu a karumiya nolhiviya. Mpangeke chiicho ni Apwiiya Nlhuku inyu, anouvahani ibarakha mmithekoni unohalha inyu upanga.

Mattara o ing'ope ni o ikhondoro

19“Mwaatengeke mattara onkhaye o madume o mmikutironi mwo ing'ope ni ikhondoro chinyu, wo nlhatu no waavaha Apwiiya Nlhuku inyu. Nhivarihe ntheko chechiyo ing'ope chiyo, ni wala nhitupulhe mapururu o chechiyo ikhondoro chiyo. 20Kila iyaakha, mwaakhuureke ashinama ayo umihoolho wa Apwiiya Nlhuku inyu, vakittu Apwiiya Nlhuku ayo vanohalha aya uthanlha. Mwaakhuureke inyuva mwaanene ni attu o unupani winyu. 21Nansho yoyo mwannama uyo akhalhaka horemara variwoothe, ama akhalhaka o hoona, ama hanaa ittu yo unanara iriyoothe yulhupalhe, nhinkumihe isadaka wa Apwiiya Nlhuku inyu. 22Mwaakhuureke yayo ashinama uyo uwannyu vanohalha inyu ukhalha. Tho, attu onkhaye anorumelhelhiya ni ahinorumelhelhiya umihoolho wa Apwiiya Nlhuku, anowooria ukhuura yayo ashinama ayo thoko chinokhuura inyu inama yo naahe ni yo ipaalha. 23Nansho nhilhie iphome aya, nansho yeyo nrihelheke vathi thoko maashi.

Currently Selected:

Itorati 15: MOT

Highlight

Copy

Compare