Mazimuriyaa 18
18
S'oonuwaa Mazimuriyaa
Zammaaretuwaa Kaappoo Yes'etteedda Daawita Mazimuriyaa. Med'inaa Goday Aa Morkkiyaappenne Saa'oola Kushiyaappe Ashsheeda Wode Daawite Med'inaa Godaw Ha Yetsaa Yes's'eedda
1Abeet Med'inaa Godaw,
ta wolk'k'aw, taani neena siik'ay.
2Med'inaa Goday taw wogga zaallaa;
Taani olaappe naagettiyaa miis'aa;
I taana ashshiyaawaa.
Ta S'oossay taani aakko bak'atiyaa ta wogga zaallaa.
I ta gonddalliyaa; I taana ashshiyaa wolk'k'aa;
I taani k'osetta attiyaa sa'aa.
3Galatay bessiyaa Med'inaa Godaa taani s'eesay;
I ta morkkatuwaappe taana ashshee.
4Hayk'uwaa wodoruu taana k'achcheeda;
bashshay di'uwaadan taana dagantseedda.
5Duufuwaa wodoruu taana k'achcheedda;
hayk'k'uu p'iriyaadan taana oyk'k'eedda.
6Taana metuu iissina, Med'inaa Godaa s'eesaad;
«Taana maadda» gaade ta S'oossaw waassaad.
I bare Geeshsha Sa'aan ta kooshshaa siseedda;
taani waasseedda waasuu Aa haytsaan wod'd'eedda.
7Wod'd'ina S'oossay hank'k'etteedda diraw,
Biittay yiik'k'iyiik'k'iide k'aas's'eedda;
deretuwaa s'ap'uu gaji gajiide kokkoreedda.
8Aa siid'iyaappe hank'k'uwaa c'uway c'uwatteedda;
Aa doonaappe miyaa tamaa lac'uunne s'uuggiyaa bonk'k'uu keseedda.
9Saluwaa I p'alk'k'iide, duge wod'd'eedda;
he wode Aa gediyaappe garssaana sik'imeteedda shaarii de'ee.
10K'efiyaana de'iyaa kiitanchchaa kiruubiyan uttiide paalleedda;
c'arkkuwaa k'efiyaa akkiide elleelleedda.
11Barena d'uman kammeedda;
Aa dunkkaanii iraanna sik'imeteedda shaariyaa.
12Aa sintsan de'iyaa wolk'k'aama poo'uwaappe
shachchaynne tamaa lac'uu keseedda;
Kesiide sik'imeteedda shaariyaa aad'd'iidde beedda.
13K'ay Med'inaa Goday guuguntsaadan saluwaappe guummeedda;
Ubbaappe D'ok'k'iyaa S'oossay walk'k'antsaaninne tamaa lac'uwaan k'onc'c'eedda.
14Bare wonddaafiyaa c'ubiyaa yeddiide,
Bare morkkatuwaa laaleedda;
walk'k'antsaa poo'uwaa kiittiide, unttuntta yedersseedda.
15Abeet Med'inaa Godaw, neeni seereedda wodenne,
Hank'k'ettaade peenuk'eedda wode,
abbaa haatsay giseedda biittay beetteedda.
K'ay sa'aa baasuukka k'onc'c'eedda.
16S'oossay bollappe kushiyaa duge yeddiide,
taana oyk'k'eedda;
c'iimmo haatsaappe taana kesseedda.
17I taana ta wolk'k'aama morkkiyaappenne,
taana is's'iyaawanttuppe ashsheeda.
Ayaw gooppe, unttunttu taw loytsi daro wolk'k'aama.
18Ta waayiyaa gallassi unttunttu ta bolla denddeeddino;
shin Med'inaa Goday taana zemppissiyaawaa.
19I taana aakko sa'aa kesseedda;
taanan nashetteedda diraw, taana ashsheeda.
20Ta s'illotetsaadan Med'inaa Goday taw c'iggeedda;
ta kushiyaa geeshshatetsaadan I taw zaareedda.
21Taani Med'inaa Godaa ogiyaa kaalaad;
taani ta S'oossaa aggade wora babeykke.
22Taani Aa higgiyaa ubbaa naagaad;
Aa wogaa poliyaawaa aggabeyikke.
23Taani Aa sintsan suure de'aaddi;
taani taana nagaraappe naagaad.
24Hewaa diraw, Med'inaa Goday taw ta s'illotetsaadaaninne
ta kushii Aa sintsan geeshsha gidiyaawaadan zaareedda.
25Abeet S'oossaw, ammanettiyaawanttoo neeni ammanettiyaawaa;
suuretoo neenikka suure.
26Geeshshatoo neenikka geeshsha;
shin geellatoo neeni c'inc'c'a.
27Barentta hokisiyaawantta ashshaasa;
shin barentta d'ok'k'issiyaawantta neeni zik'k'issaasa.
28Abeet Med'inaa Godaw, neeni ta s'omppiyaa poo'issaasa;
ta S'oossay poo'issina, ta d'umay kichchee.
29Ne maaduwaan taani ta morkke wotaadaratuwaa olay;
ta S'oossan taani unttunttu miis'aa s'eeraana guppa aad'd'ay.
30S'oossaa ogii suure.
Med'inaa Godaa k'aalay geeshsha.
Aakko bak'atiyaa ubbatoo I gonddalle.
31S'oossaappe attina, hara Med'inaa Goday baawa;
nu S'oossaappe attina, hara wogga zaalli baawa.
32Taw wolk'k'aa immiyaawenne
ta ogiyaa saro ootsiyaawe S'oossaattennee.
33I ta gediyaa gen"iyaa gediyaadan minisee;#Imb. 3:19
taana d'ok'k'a sa'atuwaan sarotetsaan wotsee.
34I ta kushiyaa olaa meezeyee;
Hewaa diraw, taani ta k'esiyaan
naasiyaa giyaa birataa wonddaafiyaa dafaade dukkay.
35Taana ashshiyaa ne gonddalliyaa neeni taw immaadda.
Ne ushechcha kushii taana zemppissee;
ne lo"o oytsay taana d'ok'k'isee.
36Ta hamettiyaasaa aassaasa;
hewaa diraw, ta gedii halis's'ibeena.
37Ta morkkatuwaa taani yederssa oyk'k'aad;
taani unttuntta d'ayissennan de'aadde guyye simmabeykke.
38Taani unttuntta laa"entso denddennaadan shoc'aad;
unttunttu ta gediyaan kunddeeddino.
39Olaw taana wolk'k'aa danc'c'isaadda;
taananna gaaddatiyaawantta taw gulbbatissaadda.
40Ta morkkatuwaa ta sintsappe guyye bak'atissaada;
taana is's'iyaawantta taani d'ayissaad.
41Barentta maaddana mala waasseeddino,
shin ooninne unttuntta ashshibeenna.
Med'inaa Godaakka unttunttu s'eeseeddino,
shin I unttunttoo koyibeenna.
42C'arkkuu pittiide afiyaa baanaadan taani unttuntta liik'issaad;
ogiyaan de'iyaa urk'k'aadankka unttuntta yed'd'aad.
43Makkala asaappe taana ashshaadda.
Taana kawutetsatuwaa bollan suntsaadda;
taani erenna Asay taw moodeteedda.
44Unttunttu ta woriyaa sisiide, taw azazettiino;
allaga dere asaykka ta sintsan hokkiino.
45Unttunttu wozanaa kahaa aggiino.
Barenttu naagettiyaa miis'aappe kokkoriidde yiino.
46Med'inaa Goday de'ee!
S'oossay, ta wogga zaallay galatetto!
Taana ashshiyaa S'oossay d'ok'k'u d'ok'k'u go!
47I ta haluwaa kessiyaa S'oossaa;
kawutetsatuwaa taappe garssaana moodissiyaawaa;
48ta morkkatuwaappe taana ashshiyaawaa.
Abeet S'oossaw, neeni taananna gaaddatiyaawanttu bollan
taana d'ok'k'u d'ok'k'u ootsaasa;
Makkalanchcha asatuwaappe neeni taana ashshaasa.
49Hewaa diraw, taani neena kawutetsatuwaa giddon galatana;#Rom. 15:9
taani Med'inaa Godaa suntsaa sabbana.
50S'oossay bare kaatiyaw s'oonuwaa bollan s'oonuwaa immee.
Bare okkeedda, Daawitewunne Aa zeretsaw,
lo"otetsaa med'inaw bessee.
Currently Selected:
Mazimuriyaa 18: DFBLVL
Highlight
Copy
Compare
Share
Want to have your highlights saved across all your devices? Sign up or sign in
The word for the world Ethiopia
