Mazimuriyaa 138
138
Galataa Woosaa
Daawite S'aafeeddawaa
1Abeet Med'inaa Godaw, taani ta kumentsaa wozanaappe neena galatana;
s'oossatuwaa sintsan neena sabbana.
2Ne Geeshsha Golliyaakko simmaade,
new goynaade, aggena ne siik'uwaanne ne tumatetsaa diraw,
taani ne suntsaa galatay;
ayaw gooppe, neeni ne suntsaanne ne k'aalaa,
ubbaappe aatsaade d'ok'k'u ootsaadda.
3Taani s'eeseedda gallassi taw koyaadda;
ne minotetsan taana minisaadda.
4Abeet Med'inaa Godaw, sa'aan de'iyaa kaatetuu ubbay,
neena galatino;
ayaw gooppe, unttunttu ne doonaappe keseedda k'aalaa siseeddino.
5Med'inaa Godaa bonchchuu wolk'k'aama gidiyaa diraw,
unttunttu Med'inaa Godaa ogiyaawaa yes's'ana.
6Med'inaa Goday bolla d'ok'k'an de'ooppekka,
hiyyeesatuwaa keeka ayifiyaan s'eellee.
Shin otoranchchatuwaa I haakuwaan eree.
7Taani metuwaa gidduwaana hamettooppekka,
neeni taana de'uwaan naagaasa.
Ta morkkatuwaa hank'k'uwaa bolla ne kushiyaa mic'c'aasa;
ne ushechchan taana ashshaasa.
8Med'inaa Goday taw giide k'oppeeddawaa polana;
abeet Med'inaa Godaw, aggena ne siik'uu med'inaawaa.
Ne kushiyaa oosuwaa agga aggoppa.
Currently Selected:
Mazimuriyaa 138: DFBLVL
Highlight
Copy
Compare
Share
Want to have your highlights saved across all your devices? Sign up or sign in
The word for the world Ethiopia
