Roma Uram 13

“Sun tukwetam kuboka sien nang yuk-yuk aryi, ‘Ato-ato kubdarur,’ eboka arukdeibsingnyi to, sunci kunubde bindarur,” eboka eterebmou uram

13:1-7

1Sun im dangna tukwe dangna kuramingnyi sien nang nirya asi nun Nai Imtamnyi biryi tikeibmou. Nun Nai biryi tikeibmou deyok aryi, ninyi nirya aryi a nang ati, “Nun nai yabwe,” tenen sun arungdeirisingnyi uram asi kunubde banung. 2Uca, sun, “Sien nang arungdeirisin uram kunubde bana nun li,” tenebingnyi nang ara Er Imtamnyi biryi tikeibmou nang uram ati, “Nun li,” tenenung. Sun ato kuramingnyi nang ara Er Imtamnyi biryi karebkwande weik wenena dobdobkwaming. 3Sun sien nang dobdobmangnyi mikib ara sun teleb kun nang wenena ati mikib kum dororaming. Eda, sun malyi dinyi kuramingnyi nang asi wenebkwaming ati Er Imtamnyi biryi sunsi mikib karerur. Ati, sunci, “Sien nang aryi nunsi wenebsingnyei,” tenen, “Ilil kanya bobibyei,” tenen ur kubde barandaute ati, sunci teleb dinyi kunubde bindarur. Teleb dinyi kunubde baramunyi uca, sien nang aryi sunsi wenen dinyi kum karebkwansing, Eda, sunsi kisal dakwansing. 4Sun tukwetam kuboka sien nang nirya ara Er Imtamnyi wa irmilin nang ato kuraming. Er Imtamnyi biryi sunsi mikib karebmou uca, a nang aryi sun uram keken nang asi teleb kurdeirisina ati wa ibde banung. Ba, sunci malyi kun dinyi kunubde baramunyi uca, sunci ilil kanya boboka, “Nun malyi deyok aryi, sien nang aryi nunsi wenebkwansing,” tenen bikdarur. Er Imtamnyi biryi sun sien nang asi ninyi wenen mikib ara ninyi on ya ato dinyi karebwe. Ara, ninyi wenen mikib talyi ati kum karebmou ati ebman. Ara, Er Imtamnyi biryi takubdeibmou uca, sun sien nang aryi likniboka sun malyi kun nang asi wenen dinyi karebde banung. 5Sun sien nang ara Er Imtamnyi bisi wa irmilin nang kuraming deyok aryi, sunci sun sien nang ati, “Nun nai yabwe,” tenen sun uram kunubde bindarur. Ati, sunci sun sien nang arungdeirisin uram kunubde baramunci, sunci ilil kanya boboka, “Wenebsingnyei,” tenena deici sun uram kunubde baramunyei. Eda, “Er Imtamnyi urasintam aryi teleb dinyi kunubkwayeb,” tenena deici aryi sunci a nang uram asi kunubde bindarur. 6A deyok aryi, sunci sun sien nang aryi moloramingnyi to dengna si pajak karebde barandum. Sun sien nang ara uki-uki nirya kubde baramingiryok, sunsi teleb kuboka kalikwansing deyok aryi, sunci sunsi dengna si pajak kikib karebde bindarur. 7Ninyi aryi sunsi, “Sun dengna kum kunubmarum ati karebdarur,” eboka arungdeiriransingnyi ura, sunci dengna kareboka kunubde bindarur. Ara, sun sien nang aryi sunsi, “Dengna si pajak karebsindarur,” eboka arungdeiriransingnyi to, sunci sunsi dengna si pajak karebde bindarur. Tonda, sun erebdob nang nirya ati, sunci, “Nun nai yabwe,” tenena teleb.

“Nun Du tamuryankwande uki tum dam kubmar ati, sunci sun mamun boukwe weik kibdandarur,” eboka eterebmou uram

13:8-14

8Sunci yuk nang asi co bok bobloandum ba, sunci co bok asi ola tamurkarena teleb. Tonda, sunci sun mamun boukwe weik kibdandarur. Sunci yuk nang asi boukwe weik kimnamunyi uca, Musa biryi arungdeirisin uram sirya kunubmarumci. 9Musa biryi, “Ukubdarur-Ukuna mem,” en uram umbura aryi ara ato eboka arungdeirisurur.

“Sal kum ner kum ukula yordana mem.”

Tonda, “Ninyi ona mem.”

Tonda, “Yuk nang dinyi aryi ukula dona mem.”

Tonda, “ ‘Yuk nang dinyi dobtalebtinyi,’ tenena mem.” (Keluaran 20:13-15, 17; Ulangan 5:17-19, 21)

Tonda, “Ato-ato kubdarur,” en uram yuk uram ababyi arungdeirisurur. Ura, a arungdeirisin uram yuk-yuk kurur bok, deyok tentok akwe kurur. Ara,

“Kanci kandamnyi boukwe kimdaraminyi to,

yuk nang asi boukwe kibdum.” (Imamat 19:18)

10Nunci yuk nang asi boukwe kimnub biriman aryi yuk nang asi malyi kibdeibtibyi do? Ato kuma. A deyok aryi, nunci boukwe kimna biriman aryi Musa biryi arungdeirisin uram kunubde banub ati ebman.

11Ati, sunci boukwe kibdandoka ukuryok kubde banub talak ati, “Nun Du tamuryankwande talak dam kubmar,” tenen bikdarur. Sunda wi mana nang ato kibmarum ati, sunci, “Bukokwayeb,” tenen uki tum sirya yanmar ati ebman. Nunda yuma kobdob aryi dib tenebkalibmoubwe ba, nunci, “Er Imtamnyi biryi nunsi iya lebkwansir uki tum dam kubmar,” tenen bingnamoubwe. Ani, ukuryok ara Er Imtamnyi biryi nunsi lebkwamar uki tum iya dam kobdob kubmar ati ebman. 12Lukunda talak ara sirya bisibmar. Ani, kiting berekwamar talak dam kubmar. A deyok aryi, nunci nun malyi kubde baramoubwe dinyi ati, “Kunuk talak dinyi aca,” tenen deiblobkwayeb. Malyi kun dinyi deiblobmunyi ura, teleb kun dinyi ara berengna dinyi kunubde bindarur. Ati, sunci ato kuboka Er Imtamnyi biryi karebsou ting asi kinikokmunci, teleb dinyi akwe kunubde bindarur. 13Ati, nunci teleb kun dinyi akwe kunubde binkwayeb. Ara, “Berengna tum sirya yanmar,” tenen nunci Er Imtamnyi urasintam aryi teleb dinyi akwe kunubde binkwayeb. Ati, nunci, “Moua karebdandoka malyi kun dinyi kunubde binkwayeb,” tenena mem. Tonda, “Anggur me ilinto yiboka walina talen dinyi kubde binkwayeb,” tenena mem. Tonda, “Sal kum ner kum talyi yobkwayeb,” tenena mem. Tonda, yuk malyi kun dinyi kunubmunyei. Tonda, “Yuk nang ab antanirdana nun li,” tenen lulubdamunyei. Tonda, “Yuk nang dinyi dobdobtibyi,” tenena mem. 14Sunci a malyi kun dinyi nirya deibloboka nun Du Yesus Kristus dam kun nang ato kubdarur. Ati, sunci, “Nun kanya aryi anaranci malyi tenen dinyi ato-ato kuboka kunubde binkwayeb,” teneina mem.

Currently Selected:

Roma Uram 13: MTG

Highlight

Copy