Roma Uram 12
12
“Nunci nun nong ab nun kanya ab Er Imtamnyi bisi karebdandoka Er Imtamnyi Uram asi kunubde binkwayeb,” eboka eterebmou uram
12:1-8
1Ati, ni kwit yabwe dib tenen nang. Niryi, “Ato kubde bindarur,” en uram ton ebdeibkwinsin ara ebdarab eboka ebdeibkwinsin. Ara, nun Nai Imtamnyi biryi bico tenen lebdeibsou deyok aryi, sunci, “Ei, nun Nai,” tenen sun nong kanya nirya asi Er Imtamnyi bisi karebdamunci, Er urasintam aryi teleb dinyi akwe kunubde bindarur. Ati, sunci, “Nun nong ab nun kanya ab Er Imtamnyi bisi dama deibdankwayeb,” tenen kilibdob kanya boramunci, Er Imtamnyi teleb tenesurur to kunubde bindarur. Sunda dib tenen nang aryi ato kubmunyi ura, sunci Er Imtamnyi bisi diboka milibkwandum. 2Ba, sunci sun malyi kun dinyi kubmurubde ban nang aryi malyi kuramingnyi to tuba milibmunyei. Eda, sunci ukuryok dangurdeirisin kanya boramunyi uca, sunci minob malyi tenen dinyi taklobmunci, sun kanya dam aryi Er Imtamnyi urasintam aryi teleb dinyi akwe teneibtabakde kunubdarur. Ato kubmunyi uca, sunci, “Er Imtamnyi biryi arukdeibmasir ara ato-ato eboka arukdeibmasir,” tenen diboka bikdankwandum. Nun Nai biryi nunsi arungdeirisurur dinyi ara Er Imtamnyi urasintam aryi sunglona kum uca iya teleb dinyi kurur ati ebman.
3Er Imtamnyi biryi kisal dakoka nisi Er arungnanyi kibdeibmanou deib aryi, niryi sun nirya yuk-yuk asi ato ebdeibkwansin. Sunci sun damnyi erebdeibdandoka, “Nunda sien nang ato kunub,” tenebdamunyei. Eda, bikdob tenen kanya boramunci, sunci sun damnyi ati, “Nunda luknubdongon nang akwe kunub,” tenerdana teleb. Ara, Er Imtamnyi biryi sun yuk-yuk asi dib tenen dinyi mitik kum ilinto kum karebmasou to, sun yuk-yuk aryi dobdobmoumwe dib tenen dinyi deici aryi sun damnyi ati luknurdongordana teleb. 4Nunda tukwetam nang yuk-yuk ara nong bol tentok akwe bonub bok, nun yan ara yuk, nun taruk ara yuk, nun asing ara yuk. Ura, a dinyi yuk-yuk biriman aryi wa yuk-yuk iramib. Ara, nun yan biriman aryi yibaramib. Taruk biriman aryi taleramib. Asing biriman aryi eiriramib. 5Ura, nunda nun Du Yesus Kristus dam kun nang ababyi neiktoto kunub. Nun yuk-yuk aryi wa ibde banub to ara yuk-yuk kurur bok, nun nirya ara antaniboka nong tentok ato kunub. Wa yuk-yuk ibde banub cok, nun nirya aryi, “Nun kwit yabwe yuk nang asi dibnilibkwayeb,” tenerdanubci, wa ibde banub. 6Nun Nai Imtamnyi biryi nun yuk-yuk asi kisal dangsin dinyi karebmasou to, Er Imtamnyi Kanya Roh Kudus aryi nun yuk-yuk asi karesin dinyi amuma-amuma karebmasou. Er Imtamnyi biryi karebmou uca, ton nang aryi Er Imtamnyi biryi kunubkwande dinyi minob bikoka lak ermururaming. Ati, a nang aryi Er Imtamnyi biryi kunubkwande dinyi lak ur ebmurubkwaming. Ara, Er Imtamnyi biryi a nang asi dib tenen dinyi karebmou to, a nang aryi Er Imtamnyi Uram ermuruna teleb. 7Tonda, Er Imtamnyi biryi karebmou uca, yuk nang aryi yuk nang asi dirniliraming. Ati, a nang aryi yuk nang asi ur dirnilibkwaming. Tonda, Er Imtamnyi biryi karebmou uca, yuk nang aryi yuk nang asi dib en uram etereraming. A nang ara dib en uram ur eterebkwaming. 8Tonda, Er Imtamnyi biryi karebmou uca, yuk nang aryi yuk nang kanya asi katabum erdeiriraming. Ati, a nang aryi yuk nang kanya asi katabum ur ebdeibkwaming. Tonda, Er Imtamnyi biryi karebmou uca, yuk nang aryi sun atan kuramingnyi nang asi yina kareraming. Ati, a nang aryi te ola yokoka sun atan kuramingnyi nang asi yina karena teleb. Tonda, Er Imtamnyi biryi karebmou uca, yuk nang ara yuk nang asi bomenekoka kalingnaming. Ati, a nang aryi busul kanya boboka yuk nang asi bomenekoka ur kalikwaming. Tonda, Er Imtamnyi biryi karebmou uca, yuk nang ara bico tenen yuk nang asi dirniliraming. Ati, a nang aryi bico weik kanya boboka sun yuk nang asi dirnilina teleb.
“Boukwe weik kibdandarur,” eboka eterebmou uram
11:9-21
9Sun mamun boukwe weik kibdamunci, silalum dem aryi boukwe weik kibdamunyei. Eda, sun kanya dam aryi diboka boukwe weik kibdandarur. Sunci malyi kun dinyi ati, “Nun li,” tenen kuramunci, teleb dinyi akwe taleboka kunubde bindarur. 10Sunci sun kwit yabwe dib tenen nang ati, “Nun du weit yabwe,” tenen boukwe weik kibdandarur. Sunci sun damnyi ati erebdeibdandoka sun yuk nang ati, “Talyi nang aca,” tenebmunyei. Eda, sunci sun yuk nang ati, “Nun nai yabwe, nun kwin yabwe,” tenen erebdeibdarur. 11Sunci, “Er Imtamnyi Uram kunubkwayeb,” teneramunci, sulbalyi kanya bobmunyei. Eda, busul kuboka Er Imtamnyi bisi milibdarur. 12Sunci Er Imtamnyi biryi ebdeibsou to dibde buramunci, kilkil kanya bobdarur. Mambul dinyi sun dam yangasici ababyi, sunci tingdon kum kanya boboka Er Imtamnyi bisi dibde bukdarur. Tonda, sunci tanglona kum uca, Er Imtamnyi bisi Ersi molobdarur. 13Er Imtamnyi dam kun nang yuk nang ara atan kubmaci uca, sunci sun dinyi aryi doboka a nang ataranci tok karena teleb. Yuk atei aryi kuboka yangan nang ati sunci, “Ninyi bun kuma,” tenen kum. Eda, sunci a nang ababyi du dongoboka dirnilina teleb.
14Ninyi aryi sunsi, “Obtibyi,” tenen domkiringsingnyi ababyi, sunci sunsi molormilina teleb. Ati, sunci Er Imtamnyi bisi, “Nun domkirisingnyi nang asi weneboka obdum,” eboka molobmunyei. Eda, sunci, “Nun domkiringsingnyi nang ababyi kisal dakdum,” eboka molormilina teleb. 15Sun kilkil kanya boramingnyi nang ab tonkwa kubmunyi ura, sunbabyi a nang ab tonkwa kilkil kanya bobmilibdarur. Yuk nang ara engen kanya boramingnyi ura, sunci a nang ab tonkwa kuboka engermilin kanya bobdarur. 16Sunci neik kanya boboka yuk nang ab antanibdeibdandarur. Sunci sun damnyi ererdeirdana mem. Eda, sien kum nang ababyi tonkwa kubdarur. Ati, sunci sun damnyi erebdeibdandoka, “Nunda bikdob nang kunub,” tenebdandoka yuk nang ati, “Talyi nang aca,” tenebmunyei. 17Ninyi aryi sunsi malyi kibdeibsingnyi ababyi sunci, “Malyi dinyi dekeibkwayeb,” tenebmunyei. Eda, sunci sun damnyi kalikdandoka yuk nang urasintam aryi teleb dinyi kununa teleb. 18Sunci busul weik kuboka, “Neik kanya boboka ninyi nirya ab tonkwa antanibdeibdandoka kubkwayeb,” tenena teleb. Ara, yuk nang aryi, “Antanirdeirirdana nun li,” tenebingnyi ababyi sunci namin kanya boboka antanibdeibdankwandum. 19Yuk nang aryi sunsi malyi kibdeibsingnyi ababyi sunci, “Dekoka malyi kibdeibkwayeb,” tenena mem. Er Imtamnyi Uram umbura aryi ato esurur,
“Nira Imtamnyi bitikwe malyi dinyi wenenunyi kunun. Niryi dekeiboka malyi kun dinyi wenebkwan,” ebmou. (Ulangan 32:35)
Ati, sunci a uram teneibmunci, yuk nang aryi malyi kun dinyi dekeibmunyei. 20Eda, sunci Er Imtamnyi Uram umbura aryi eteresurur to kunubde bindarur. Ara, Er Imtamnyi Uram aryi ato eboka eteresurur.
“Sun ordaransingnyi nang ababyi kwaning ataranci ba, sunci sunsi yina karebdarur. Me ataranci ba, sunci sunsi me karena teleb.
Ato kuramunyi uca, sun malyi kibdeibsingnyi nang aryi asing eibingnyi uca, sunci danguboka, ‘Nun malyi kubmoubwe se,’ tenebkwaming,” ebmou. (Amsal 25:21-22)
21Malyi kun dinyi aryi sunsi muna kibdongobsicei. Eda, sunci teleb dinyi akwe kunubde baramuncok, malyi kun dinyi muna kibdongobdarur.
Currently Selected:
Roma Uram 12: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
