Kuusan Fasavatan 9

A Lagafan Mata

A Mu Sakawa Saat

1E a fapamayaana angelo a piif a tafiu sina e ne xalum a saxa vapara ti laa'ui a poxo xe la pia e saxa a tavaie pana ʻkiʼ ina Tang Vaa'ul. 2E nane kas a matana Tang Vaa'ul aave pana ʻkiʼ e a bun a laak ti lana fexaxaas malaan sena bun ina tang fata molava. E a ngaas e mu vata ri xafutan pana bun ti lana Tang Vaa'ul e mu bina xapiak fesuk. 3E ti lana bun aave a maana mo malaan sena mu sakawa ri savat xe la xavala. E ri toxan a gutan a fexaxaas xena pirak famasak a mataa malaan sena pungup ti la xavala. 4E saxa a fasei nari o ri taa pife kawaasan a yi o ta mo ti la latan o ta wai saxa, taasaxa ri taa famasak a mu rabuna aava ri piau ta fakalimaanan sina Piran la nori. 5E mu sakawa aave ri pife fexaxaas sena punuk ta saxa mataa taasaxa ri taa pirak famasak mon nari xapiak fefexaxaas sena fulun pama. E a maasaxan siri i taa malaan sena maasaxan layaan a pungup a pirak a mataa. 6E la fena mu yaan aanabe' a mu rabuna ri taa seng faatuaian a maatan xe xuluri xa, taasaxa ri taa sesengmaat. Ri vubuk paaliu o ri taa maat taasaxa maatan i taa sinuf seri.

7A maana mo aava ri malaan sena sakawa, a xakaaluman iri a malaan sena ʻhosʼ pana ʻaianʼ ina fevisan xuluna. E ri toxan a ligilot ʻgolʼ sina ʻkingʼ xuluna puturi e a nonau iri a fexaxaas malaan sena nonau ina mataa tuuna. 8E a fui iri a modus malaan sena tefin e a fari a molava malaan sena ʻlaionʼ o veowa. 9E la famareri ri toxan a mo tateak malaan sena ʻaianʼ e a tatafan ina xakaveri a rawei faagut paaliu malaan sena ʻkaarisʼ layaan a mu ʻhosʼ taxa yuuf fatapusane xe la fevisan. 10E ri toxan a sum malaan sena pungup e ri vipirak pana e ri fexaxaas sena famasak a mu rabuna aava ri piau ta fakalimaanan sina Piran fefexaxaas sena fulun pama tafe liu. 11Ri toxan a saxa a fuuna paamuian nari, a saxa vovau fefeng ti lana Tang Vaa'ul. Lana pok bina Hibru ri xalie pa Abaadan e lana pok bina Griik ri xalie pa Epolyon. (A malasuf ina ve a malaan, “Galas xapine”.)

12Saxa lagafan fo taxapus xo, taasaxa mi taa faxatang sena taragua aava re taa savatmaan lamina.

A Lagafan Fulaa

13E mui a fapisaxayaana angelo a piif a tafiu sina e ne langai a ling a savat ti la palou ina xasing talafaat ina ivin ʻgolʼ ina faraaman aava taxa waan la nona Piran. 14A ling aave a xuus a fapisaxayaana angelo pana tafiu malaan, “Fe mulus tapin a masalai talafaat aava pisan la xasing ina raarum ri xalie pa Yufretis.” 15Nari talafaat aave ri fo faigot bang a yaan aanabe'. Lana vipis ri waan bang a mariaas e fulun e yaan e awa aanabe'. E ri toxan a faisok xena fepatoxan a mu rabuna xapiak la xavala xe lana pabung talatul e ri taa punuk xapin a saxa pabung. E a angelo aave fe mulus nari. 16E a rabuna ina rawen sina masalai talafaat aave ri savat xuvul pana mu ʻhosʼ saxa saxa. E ne langai o a xakatan ina rabuna ina rawen a fexaxaas sena 200,000,000.

17E ne xalum nari lana mifan siak, a xakaaluman ina mu ʻhosʼ e mu rabuna aava ri nai xuluri, a malaan: a mu rabuna ri toxan a ʻaianʼ la famareri aava tana vuung malaan sena fata e maxawa e xiis sait. E a putuna mu ʻhosʼ ri kaalum malaan sena ʻlaionʼ e ti la valari a fata e bun taxa lo savat e a fata aave a musung malaan sena put layaan a put. (A musung ina a malaan sena faat aava ri xalie pana ʻsalfaʼ, layaan i taxa raam.) 18E a mo mosaat talatul aanabe' ve rutul savat ti la valana mu ʻhosʼ: a fata, a bun e a ʻsalfaʼ, rutul punuk a rabuna xaves paaliu, fefexaxaas sena pabung saxa ina talatul la xavala. 19A gutan ina mu ʻhosʼ ve, taxa waan lana valari e lana sum iri sait; senaso a sum iri a malaan sena tiui aava ri toxan a puturi xena vil pengan a mataa.

20E nari mu rabuna aava mo mosaat talatul pife punuk nari, nari vaxa, ri pife puk a vilaana saat siri. Ri pife ta'ulan a faisok saat ti la mari. Ri taxa lo nangus a vovau saat e ri taxa lo vesan a mu maaradaang lunai pana ʻgolʼ o ʻsilvaʼ o ʻbraasʼ o ri tuxe pana faat o wai. Ri vesan a maana mo malaan taasaxa maana mo aave ri pife fexaxaas sena kaalum o langai o sangas. 21Ri vil malaane e vaxa ri pife puk tapin nari xa xasena mu faisok saat siri aava malaan: a ngaapunuxan, neng, fenauan e a vilaana ina tamai feruuk.

Currently Selected:

Kuusan Fasavatan 9: TFSP

Highlight

Copy

Compare