Palonga 23

1A Pol e toꞌomaaie pulitaa ni lei-lei oto ko teꞌuri, “Maeni eesiku ni Israel, manataku e tahanie taane mola iiꞌonga ineu i naꞌona God lae mai hule siꞌiri.”

2Oto aana kele maholoi satona, a Ananaeas, Naꞌohana Mo Naꞌohai Pris, e unue hunie mo iini nge kire uure karaꞌinie ko teꞌuri, “!Omu ke hide ponosie wawana!”

3Oto a Pol ko teꞌuri hunie, “Iꞌoe, o urihana mola mei karo aaela nge kire mole rereꞌa aana hunie ke lio kohi. !Oto a God kei hideliꞌo noꞌone! Iꞌoe, o iiꞌo i aano aana iiꞌo-iiꞌoha ni lei-lei huni leieu i sulie mo Haꞌatolanga a Mosis, taꞌe hule aana iꞌoe maraamu nge o ko liu holosie noꞌone Haꞌatolanga maholo o unue uri mo mwane ke hidelieu.”

4Oto mo mwane nge kire uure karaꞌinie a Pol kire ko teꞌuri, “!Mwae! O ko ere waelie Naꞌohana Mo Naꞌohai Pris a God.”

5Oto a Pol ko teꞌuri, “Maeni eesiku, nou kaꞌa saie ike uri ingeie nge Naꞌohana Mo Naꞌohai Pris. Ne ke saie urine, haꞌalaa nou kaꞌa aalamie ike urine, aana Uusu-uusu Maaꞌi e teꞌuri, Suꞌuri ere aaelasie iini nge ko naꞌona mwala iꞌoe.” Eksodas 22:28

6Ngaeta mo mwane aana pulitaa ni lei-lei ngeena ikire mo iini aana aapa mo Sadiusi, na ngaeta mo iini aana aapa mo Parise. A Pol e saie urine mone, oto ko ere paine hunire na ko teꞌuri, “Maeni eesiku, ineu ngaeta Parise ni ie, na mo weuweku mo Parise noꞌone. Na hiiwalaimolinge ineu uri a God kei taꞌea mo iini e mae. Na aena mei olana kaꞌu omu ko leieu haahie ie.”

7Maholo a Pol e ere urine mango, pulitaa ni lei-lei ko oopa oto peꞌie ere-haitelilinge i matolada mo Sadiusi na mo Parise, 8aana hiiwalaimolinge mo Sadiusi uri nga iini e saꞌa roroꞌa taꞌelaꞌi loꞌu mwaanie maenga, wa uri nga ensel wa nga liꞌoa ke iiꞌo loꞌu. Taꞌe mo Parise kire mani hiiwalaimoli aana e oolu mei olana. 9Maholo erenga paine ko lae hailiu i matolana e ro pulitaa ngeena, oto ngaeta mo haꞌa-uusuli aana mo Haꞌatolanga a Mosis nge ikire peꞌie mo Parise kire uure i lengi, kire ko ere paine kire ko teꞌuri, “!Melu kaꞌa dau oodoie ike nga mei ola aana a mwane ie ke dau huꞌisie! !Nga liꞌoa wa nga ensel ohe nge ko ere-ere hunie ngeena!” 10Haꞌa-erenga ngeena e lae-lae na ko peine oto. Oto poro paine haahie sinolai ramo ni Rom ngeena ko maarara mwaanie kire horoꞌie a Pol, oto e uusungeꞌinie mo ramo ingeie hunie kire ke lai toolea a Pol mwaanie pulitaa ni lei-lei, na kire ke tola aalihoꞌi aana hunie leu nge mae ko oꞌoꞌo aana.

11Oto aana hai rodona a Aalaha e lae mai uure i sulie a Pol oto ko teꞌuri, “!Mwaanie o meꞌu-meꞌu! O kei lai unu haꞌa-oaieu noꞌone wau i Rom mala o esuie i Jerusalem.”

Mwala Kire Oalaꞌi Huni Horo Maesie A Pol

12Oto e dangi hoꞌowa, ngaeta mo Jiu kire ruru huni oalaꞌi na kire haiholotaꞌi uri kire saꞌa ngaue nga mei ngeulaa wa kire ke inuhie nga mei wei, lai hule aana kire kei horoꞌie a Pol. 13E liue hai aawalai mwane nge kire ruru huni esuie mei neꞌisaenga ienini. 14Oto purihaꞌana kire si lai saana mo naꞌohai pris na mo rato ni mwane, oto kire ko teꞌuri, “Melu meni heiholotaꞌi uri melu saꞌa hikana ike nga mei ngeulaa wa melu ke inuhie nga mei wei, lai hule aana melu kei horoꞌie a Pol. 15Oto iꞌomu na mo mwane aana pulitaa ni lei-lei, omu ke uusungeꞌinie nga mei wala hunie poro paine haahie sinolai ramo ni Rom, hunie kire ke toolea mai a Pol i seemiu hunie ke leesiꞌomu. Taꞌe omu ke eero mola uri omu ko sare saie loꞌu ngaeta mo ola i sulie. Oto melu kei deu aakau huni horoꞌie i naꞌona kei hule i leu i seemiu.”

16Taꞌe uuweline a Pol e rongoa walu oalaꞌinge ikire ngeena, oto e lae wau i nume nge mae ko oꞌoꞌo i laona, ko si haꞌarongoa a Pol. 17Oto a Pol e soie mai ngaeta mwane paine haahie tangalai ramo ni Rom ko si teꞌuri hunie, “O ke toolea saanau ie wau i saana poro paine haahie sinolai ramo, aana ko sare haꞌarongoa aana nga mei ola.”

18Oto ramo paine ngeena e toolea saanau wau i saana poro paine haahie sinolai ramo, ko si teꞌuri hunie, “A Pol nge kolu tapolie kaꞌune e soieu hunie ne ke toolea kele saanau ie mai seemu, aana ko sare haꞌarongoꞌo aana nga mei ola.”

19Oto poro paine haahie sinolai ramo ngeena e hele i nimana a saanau, na e toolea aana nga leu hunie kirerue ke iiꞌo mola maraadarue. Oto poro paine ko dolosi aana ko teꞌuri, “?Nga taa ni o ko sare haꞌarongoau aana?”

20Oto saanau ngeena ko teꞌuri, “Mo rato ni Jiu kire mani neꞌisae tararuru huni haꞌatohu eemu hunie o ke toolea a Pol i saana pulitaa ni lei-lei i hoꞌowa. Kire kei eero ni unue uri kire ko sare saie loꞌu nga mo ola i sulie. 21Taꞌe o ke suꞌuri rongo hunire, aena e liue hai aawalai mwane nge kire haiholotaꞌi uri kire saꞌa hikana nga mei ngeulaa wa kire ke inuhie nga mei wei lai hule aana kire kei horoꞌie a Pol. Kire dau aakau oto huni lai mumuni loosie taꞌau i sulie tala, taꞌe kire ko maaꞌoohi ue huni rongoa nga mei wala mwaaniꞌo.”

22Oto poro paine ko si ere honosie ko teꞌuri, “Suꞌuri haꞌarongoa loꞌu nga iinoni uri o haꞌarongoau aana mei ola ienini.” Oto e si uusungeꞌinie saanau ngeena hunie ke lae.

Mo Ramo Kire Toolea A Pol I Saana Aalaha Paine A Filiks

23Oto poro paine haahie sinolai ramo ngeena e si soie mai e ro iini aana mo mwane paine ingeie haahie nga tangalai ramo, ko si teꞌuri hunirerue, “More ke dau aakau aana e ro tangalai ramo huni lae i Sisaria i rodo siꞌiri aana siwana nga maholoi sato. Na more ke dau aakau noꞌone aana e ro tangalai ramo nge kire sai heiseuni peꞌie mo noma, na loꞌu e hiu aawalai ramo huni huru aana mo hoos. 24Na more ke dau aakau aana mo hoos hunie a Pol ke lae aani,#23:24 Mo Rom kire dau aakau aana mo hoos hunie a Pol ke lae aani, hunie maholo nga iini ko weo na a Pol ko taꞌelie loꞌu ngaeta iini. na more ke lio i suli diana aana hunie ke hule sapemawa wau i saana aalaha paine a Filiks.”

25Oto poro paine e uusue uusu-uusu ko teꞌuri,

26Huniꞌo Aalaha Paine Filiks,

Ineu a Klodias Lisias nge no ko haꞌatolaa saediananga ineu weu huniꞌo ie.

27A mwane ie, mo rato ni Jiu kire tapolie, na kire ko karaꞌi horoꞌie oto, taꞌe nou lae mai peꞌie mo ramo ineu, oto nou lauhie aena nou saie ingeie ngaeta mwane ni Rom. 28Nou sare saie nga taa ni mo Jiu ko sare horoꞌie a Pol i tehulaꞌana, oto nou toolea i saana pulitaa ni lei-lei ikire. 29Nou deu oodoie kire ko sare horoꞌie mola i sulie mo ola aana haꞌatolanga ikire mo Jiu, taꞌe kire kaꞌa leie ike i sulie nga mei ola ke adona ke mae i tehulaꞌana wa hule aana nga mei ola ke adona ke iiꞌo i nume ni hoꞌo. 30Na maholo nou rongoa uri kire ere toli loosi hunie, nge no ko tolana uusungeꞌinie oto wau i seemu ie. Na nou haꞌarongoa mo Jiu nge kire holaꞌi haꞌapelie ngeena uri kire ke haataꞌinie mo loꞌongaꞌinge ikire aamu.

31Mo ramo ngeena kire ko deu mone i sulie walana poro paine, oto kire toolea a Pol oto aana hai rodona hunie huilume i Antipatris. 32Oto aana dinge loꞌu i puri, mo ramo nge kire ko lae mola i sulie tala kire ooli takoie leu nge kire ko oꞌoꞌo aana i Jerusalem, na mo iini mola nge kire ko lae aani hoos kire ko lae taraꞌasi loꞌu peꞌie a Pol. 33Maholo kire lai hule aana huilume paine i Sisaria kire si niie uusu-uusu hunie a Filiks, na kire ko niie oto noꞌone a Pol wau i nimana. 34Maholo a poro paine e saai mangoa uusu-uusu ngeena, ko si dolosi aana Pol ko teꞌuri, “?Iꞌoe mwane ni tei?” Oto maholo e rongo saie uri a Pol mwane aana ngaeta huilume i laona poꞌo ni henue i Silisia, 35ko si teꞌuri, “Mo mwane nge kire ko sare horoꞌiꞌo kire kei hule mai leu, nge ne ke si pwaarongo honosie mo ere-erenga iꞌomu.” Oto e si unue hunie mo ramo ingeie kire ke kakalie i laona nume paine ingeie nge a Herod e asuie holaꞌinaꞌo.

Currently Selected:

Palonga 23: apbNT

Highlight

Copy