Palonga 24

Aalaha Paine Filiks E Leie A Pol

1Oto e lime hai dinge e saro mango, a Ananaeas, Naꞌohana Mo Naꞌohai Pris na ngaeta mo rato ni Jiu na ngaeta mwane satana a Tetalas, kire lai hule wau i Sisaria. A Tetalas ngaeta mwane saenanau i sulie mo haꞌatolanga na e sai ere i naꞌona mo pulitaa ni lei-lei. Oto kire mani lae mai uure i naꞌona Aalaha Paine Filiks huni ere honosie a Pol. 2Oto maholo kire soie mai a Pol, a Tetalas ko si unue loꞌongaꞌinge ikire na ko teꞌuri, “Iꞌoe oto ngaeta tohungei aalaha paine na e diana, Filiks, aana iꞌoe nge o da melu iiꞌo ni henuelamanga oto uure mai i laona poꞌo ni henue iꞌemeelu. Na aana saenanaunge iꞌoe nge o haꞌa-oodohie mo haꞌatolanga hunge hunie iiꞌonga iꞌemeelu ke diana. 3Walu ola urine nge melu leesiꞌi suli dinge, na kire tohungei diana aameelu nge melu ko unue saediananga paine huniꞌo. 4Taꞌe mwaanie nou haꞌaweoꞌo, nge no ko eitanaiꞌo o ke pwaarongo ni saediananga kaꞌu mola aana ere-erenga oꞌoruꞌe iꞌemeelu.

5“Melu lio saie a mwane ie, ingeie nga mwane oto huni esuie aaelanga tarau, na ko esuie haꞌa-erenga i matolana mo Jiu aana taꞌena nga leu aana walumalau. Na ingeie ngaeta naꞌohai mwane aana pulitaa a Jisas ni Nasaret. 6Na mwane ienini ko sare haꞌamadaꞌaa noꞌone Nume Maaꞌi Peine a God, oto aena mei olana nge melu tapolie. 7#24:7 Ngaeta mo uusu-uusu i naꞌo aana erenga ni Krik kire sapeie loꞌu tatala 7 uuri, “Na melu sare leie i sulie haꞌatolanga iꞌemeelu. Taꞌe a Lisias, poro paine haahie sinolai ramo, e lae mai deu rarahiꞌemeelu hunie ke toolea mwaanie kiꞌimeelu. Na ko tohungei ere aameelu noꞌone uri melu ke lae mai unue huniꞌo nga taa ni a Pol e dau aaelasie.” 8Na mala uri o kei dolosie nga mo dolosinge aana, o ke si rongoa taane loꞌu nga mo ola i sulie mo wala nge melu tapolie a mwane ie i tehulaꞌani.” 9Na mo rato ni Jiu ngeena kire ko eerotaꞌinie a Pol urine noꞌone na kire ko teꞌuri, “Walu ola ienini kire toꞌohuu.”

A Pol E Ere-ere I Naꞌona Filiks

10Oto a Filiks e salo aana kiꞌine hunie a Pol ke ere-ere, oto a Pol ko teꞌuri, “Poro paine, nou saie mo helisi hunge oto o ko leie mo heliwalanga iꞌemeelu mo Israel, oto no ko tohungei ilenimwaꞌe huni aalamie nga taa kire ko haꞌapelieu haahie. 11Oto siꞌiri e si hule aana aawalai hei dinge mwana rue mola i purine nou hule taꞌau i Jerusalem huni paloa God, na ke mwadaꞌu loꞌu mola hunie o ke haꞌawalaimoliꞌaa mola walaku. 12Mo mwane nge kire ko ere aaelasieu siꞌiri ie kire kaꞌa leesie ike ne ke haꞌa-erea nga iini wa ne ke haꞌasaewasuliꞌaa mwala, maꞌalana i laona Nume Maaꞌi Peine, wa i laona mo nume ni palo-palo, wa aana taꞌena nga leu loꞌu i laona huilume. 13Oto kire saꞌa haꞌawalaimoliꞌaa ike mo wala nge kire ko eerotaꞌinieu eeni ie. 14Taꞌe no ko unu oodo-oodo oto aana huniꞌo, uri e toꞌohuu no ko palo-paloa a God mo weuwe iꞌemi, aana ineu no ko lulu i sulie Tala Ni Meurihe. Ikire, kire unue mei hiiwalaimolinge ngeena e kaꞌa diana ike, maꞌalana ineu noꞌone nou hiiwalaimoli aana ahutana walu ola i laona mo Haꞌatolanga a Mosis na mo ola i laona mo Uusu-uusu Maaꞌi mo Propet. 15Na nou norutoꞌo noꞌone aana God mala mo rato ni mwane ngeena, uri ahutana iinoni, maꞌalana mo iinoni diana wa mo iini aaela, kire kei meni taꞌelaꞌi mwaanie maenga. 16Na no ko deu aahonga tarau hunie manataku ke rereꞌa i naꞌona God na i naꞌona mo iinoni.

17“Nou lae mwaanie i Jerusalem mo helisi hunge e mango oto, oto nou eelihoꞌi loꞌu mei huni tola toꞌoha nana mo iinoni ineu ni Israel nge kire ko siꞌohaꞌa, na huni uunu ola hunie a God. 18Na i purine nou esu mangoa uunu-olanga ni haꞌarereꞌanga i naꞌona God, nge kire si leesieu wau i laona Nume Maaꞌi Peine. Na aana maholona nga mwala kaꞌa iiꞌo ike peꞌieu hunie kire ke da eꞌengonga. 19Taꞌe ngaeta mo Jiu aana poꞌo ni henue i Esia nge kire lae mai tapolieu. Mala ko toꞌohuu uri ineu nou deu huꞌisie nga mei ola, nge e malisine kire ke lae mai uure i naꞌomu huni haꞌapelieu aana mei ola ngeena. 20Mala uri ko haꞌike, nge o ke dolosi aana mo mwane ienini nga mo ola uri taa nge mo rato ni mwane aana pulitaa ni lei-lei i Jerusalem kire unue uri nou deu huꞌisiꞌi, 21mwaanie taꞌa-taꞌa mei wala mola ni nou unue i naꞌoda aana nou teꞌuri, ‘Hiiwalaimolinge ineu uri a God kei taꞌea mo iini e mae mwaanie maenga. Oto aena mei olana nge omu ko leieu haahie siꞌiri ie.’ ”

22A Filiks mone e saenanau i sulie Tala Ni Meurihe, oto e haꞌamamaloa ere-erenga ko si teꞌuri, “Maholo a Lisias, poro paine haahie sinolai ramo ngeena, kei lae mai, nge ne ke si niie mei wala ooreta aana ere-erenga iꞌoe.” 23Na e unue ngaeta ramo paine haahie tangalai ramo ke kakalie a Pol, taꞌe ke lio rako aana a Pol na ke toliꞌaasie mo malahune ke peꞌie aana mo ola e saetoꞌo aani.

24Oto purine ngaeta mo dinge e haro mango loꞌu, a Filiks e ooli loꞌu mei i Sisaria peꞌie huꞌe ingeie, keni ni Jiu satana a Drusila. Oto a Filiks e uusungeꞌinie ngaeta mo mwane huni lai toolea mai a Pol, na kirerue ko si pwaarongo i sulie maholo ko ere i sulie hiiwalaimolinge aana a Jisas Kraes. 25Taꞌe maholo a Pol ko ere i sulie mauringe diana, na kinetaꞌinilaka maraaka mwaanie oorahaꞌaa, na leilana walumalau, a Filiks ko si tohungei meꞌu na ko teꞌuri, “!Mamalo kaꞌu! Mala uri no ko toꞌo aana loꞌu nga maholo ne ke si soiꞌo loꞌu mei.”

26Saena Filiks uri a Pol ke nii mumuni aana nga mei toꞌoha nana hunie ke luhesie mwaanie nume ni hoꞌo. Oto mo maholo hunge, ko hei uusungeꞌi oto hunie a Pol huni ere-ere peꞌie.

27Oto lae-lae, purine e ro halisi e mango, a Posias Festas ko oolisie a Filiks aana ko neꞌi Aalaha Paine oto haahie poꞌo ni henue ngeena. Na aena aana a Filiks ko sare dau hunie mo Jiu ke ilenimwaꞌe mola haahie, oto e unue mola uri a Pol ke iiꞌo ue i laona nume ni hoꞌo.

Currently Selected:

Palonga 24: apbNT

Highlight

Copy