Palonga 10

A God E Ere Peꞌie A Konilias

1Ngaeta mwane ni Rom e oꞌoꞌo wau aana huilume i Sisaria, satana a Konilias na ingeie ngaeta naꞌohai ramo haahie tangalai ramo aana pulitaa ni ramo nge kire haaraꞌinie aana, “Pulitaa mo Ramo ni Itali.” 2Maꞌalana ingeie ngaeta mwane aana mo Aapoloa Aaopa, taꞌe e neꞌisae paine aana God na ahutana mwala aana uluhe ni iinoni ingeie kire ko lulu i sulie a God noꞌone. A mwaena ko nii-nii tarau hunie kira maitale, na ko aare-aarea God suli maholo. 3Aana ngaeta hai dinge aana ola mala oolune nga maholoi sato i aapai sato, a Konilias e leesie mei haataꞌinge mwaanie a God, na ko leesie oto ngaeta ensel a God e sili mei nume ingeie na ko soie, oto ko teꞌuri, “Konilias.”

4Oto a Konilias ko tohungei meꞌu, na ko lio hahuroto oto aana ensel ngeena, na ko teꞌuri, “?Nga taa eena, poro paine?”

Oto ensel ko teꞌuri hunie, “A God e rongoa oto mo aarengaꞌinge iꞌoe, na ko leesie o ko peꞌie kira maitale, oto ko tohungei saemango haahiꞌo. Oto maholo ienini a God ko sare peꞌiꞌo noꞌone. 5O ke uusungeꞌinie nga mo mwane wau hunie huilume i Jopa oto molana, hunie kire ke haaraie a Saemon, nge ngaeta sata aana a Pita. 6E iiꞌo wau i nume ngaeta mwane loꞌu satana a Saemon mwane nge ko euꞌesu aana mo teꞌe-teꞌei puluke, na nume ingeie e iiꞌo karaꞌinie aasi.”

7Maholo ensel ngeena e lae, a Konilias e si soie mai ngaeta ro mwane auꞌesu ingeie na ngaeta ramo. Na ramo ngeena a Konilias e tohungei norutoꞌo aana, aana ingeie noꞌone e tohungei neꞌisae paine aana God. 8A Konilias e unue ahutana mo ola mango hunie oolu mwaena, e si uusungeꞌinire hunie i Jopa.

9Oto i upui aatowaa aana hai dinge i puri, kire ko karaꞌinie oto huilume i Jopa. Na aana maholona a Pita ko lai aarengaꞌi taꞌau aana Leu Ni Haa-haanaku i koluhana nume. 10Oto a Pita ko hiolo na saena ke ngau. Taꞌe maholo kire ko haꞌa-haꞌaliaa ue mo ngeulaa, ko si leesie mola haataꞌinge mwaanie a God. 11Na ko leesie oto ola mala mei sala paine nge kire ko haꞌasihoa aana e hai suꞌu-suꞌue ko siho mai aano uure mwaanie leu a God e iiꞌo aana. 12Na taꞌena nga ola mauri oto mola e iiꞌo i laona mei sala paine ngeena—taꞌe-taꞌena nga lulusane, na taꞌe-taꞌena nga mwaa, na taꞌe-taꞌena nga manu oto mola nge kire aapu hunie mo Jiu. 13Na a Pita ko rongoa mei wala ko teꞌuri, “Pita o ke horoꞌie mo ola ngeena, na o ke ngauꞌi.”

14Taꞌe a Pita ko teꞌuri mola, “!Haꞌike, Aalaha ineu! Nou kaꞌa ngaue ue nga mei ola nge mo Haꞌatolanga e uure honosie uri e madaꞌa.”

15Na ko rongoa loꞌu mei wala uuri, “Mo ola nge a God e unue uri kire rereꞌa, suꞌuri loꞌongaꞌinie loꞌu uri kire madaꞌa.” 16Walu ola ienini e rau haꞌa-oolu, oto sala paine ngeena e si ooli loꞌu taꞌau i Lengi.

17Oto a Pita ko talei loꞌo-loꞌongaꞌi hiitoꞌo i sulie mei haataꞌinge ngeena, na aana maholona e oolu mwane nge a Konilias e uusungeꞌinire kire ko lio oodoie oto nume a Saemon. Kire uure i maana para taꞌau i sinaha. 18Kire ko dolosi hunie a Saemon nge ngaeta sata aana a Pita ohe e iiꞌo taane i nume. 19Taꞌe maholo a Pita ko loꞌo-loꞌongaꞌi hiitoꞌo ue i sulie mei haataꞌinge ngeena, a Liꞌoa Maaꞌi ko teꞌuri hunie, “Saemon e oolu mwane ko dolosiꞌo. 20O ke siho oto i aano lau-leu, na o ke suꞌuri meꞌu ni lae peꞌire aena aana ineu nge nou uusungeꞌinire mai ngeena.”

21Oto a Pita e siho hao i aano, ko si teꞌuri hunire, “Ineu oto mwane nge omu ko heitalea. ?Nga taa nge omu saetoꞌo aana?”

22Oto ngaeta iini aadaelu ko teꞌuri hunie, “A Konilias nge e uusungeꞌiniꞌemeelu mei ie, ingeie poro paine haahie mae. Na ingeie mwane e oodotaꞌi, na ko palo-paloa noꞌone a God, na ahutana mwala ni Jiu kire tohungei haꞌamaꞌu aana. Na ngaeta ensel a God e unue hunie ke unue huniꞌo uri o ke lae kaꞌu weu i nume ingeie hunie ke rongoa nga taa o kei unue hunie.”

23Oto a Pita e si unue kire ke lae kaꞌu mei nume, na kire ko maꞌahu oto aana hai rodona. E dangi hoꞌowa a Pita e dau aakau mango, kiraelu ko si meni lae, na ngaeta mo eesine i lalo aana Kraes i Jopa ko hekusire noꞌone. 24Na aana hai dinge loꞌu i puri, nge kire ko lai hule wau i Sisaria, na a Konilias ko maaꞌoohie oto a Pita. Na e lokoa noꞌone ahutana mwala aana uluhei iinoni ingeie na ngaeta mo malahune. 25Maholo a Pita e lai hule wau i nume a Konilias, nge poro paine aana mae ngeena e si lai pouruuru i naꞌona aani haꞌamaꞌunge aana. 26Taꞌe a Pita e haꞌa-uuresie na ko teꞌuri, “O ke uure i lengi, aana ineu iinoni noꞌone mola mala iꞌoe.” 27A Pita ko kele ere-ere peꞌie a Konilias, na ko sili hao i nume na ko leesie oto mwala hunge e loko. 28Oto a Pita ko teꞌuri hunire, “Omu saie oto haꞌatolanga iꞌemeelu mo Jiu e uure honosiꞌemi mwaanie emi heꞌimalahune peꞌie nga iini aana mo Aapoloa Aaopa wa emi ke sili i laona mo nume ikire urini. Taꞌe a God e haataꞌinie aaku uri ne ke suꞌuri unue loꞌu nga iini e madaꞌa na e kaꞌa malisine haꞌimalahunanga peꞌie a God. 29Na maholo omu hei uusungeꞌi hunieu, nou kaꞌa sare unue loꞌu nga mei ola, taꞌe nou lae mola mai. ?Oto no ko dolosi mola aamiu, e ue ni omu saetoꞌo aana ne ke lae mai?”

30Oto a Konilias ko teꞌuri, “Aana oolune nga maholoi sato i aapai sato mala maholo ienini aana e oolu hei dinge oto e mango haona,#10:30 Erenga ni Krik e unue e hai hei dinge e mango, taꞌe iidu-iidunge mo Jiu e aaopa mwaanie iidu-iidunge ikie siꞌiri, aana mo Jiu ko aehota iidu aana hai dinge nge mei olana e reu. Aana iidu-iidunge ikire, eetana nga hai dinge nge dinge ensel e haataꞌi hunie Konilias, na ruana nga hai dinge nge dinge mo mwane auꞌesu a Konilias kire hule i Jopa, na oolune nga hai dinge nge dinge kira Pita kire iisitaa mwaanie i Jopa, na haine nga hai dinge nge dinge a Pita e hule i saana Konilias. Taꞌe aana iidu-iidunge ikie, e oolu hei dinge mola ni ngeena. nou aare-aarengaꞌi mai nume ineu ie. Oto nou si aparaꞌi na nga mwane e toꞌoni aana mo toꞌoni rereꞌa e lae oto mai uure i naꞌoku. 31Oto ko teꞌuri, ‘Konilias, a God e pwani rongoa oto aarengaꞌinge iꞌoe, na e lio saie oto nga taa o ko euꞌesuie huni peꞌie kira maitale. 32Oto o ke uusungeꞌinie nga mo iini wau i Jopa hunie kire ke haaraie a Saemon, nge ngaeta sata aana a Pita, hunie ke lae mai. A mwaena ko oꞌoꞌo wau i nume a Saemon, mwane nge ko euꞌesu aana mo teꞌe-teꞌei puluke, na nume ingeie e iiꞌo mola karaꞌinie aasi.’ 33Na oto mola aana maholona nge nou uusungeꞌinie mo mwane wau i seemu, na e diana oto liutaa aana o lae oto mai. Na maholo ienini melu meni ruru oto i naꞌona God huni rongoa mo ola a Aalaha e niiꞌi huniꞌo huni tola tahangaꞌiniꞌi huniꞌemeelu.”

A Pita E Tarohaꞌinie Tataroha Diana Hunie Mo Aapoloa Aaopa

34Oto a Pita ko si aehotaa ere na ko teꞌuri, “E tohungei toꞌohuu oto, maholo ienini nou si lio saie oto uri a God e kaꞌa saehaahie ike mola nga mo iini. 35Mala uri nga iini ko haꞌamaꞌu aana a God na ko esuie mo ola oodotaꞌi, nge a God kei ilenimwaꞌe haahie, maꞌalana e uure aana taꞌena nga poꞌo ni iinoni uri taa loꞌu i laona walumalau. 36Omu saie taane oto Tataroha Diana a God e uusungeꞌinie hunie mwala ni Israel uri ikie mo iinoni kie sai toꞌo aana hanuelamanga mola aena aana a Jisas Kraes, iini ko aalaha haahie walu ola. 37Na omu saie taane oto nga taa e rau aana ahutana mo leu i Israel, nge e aehota i Kalili peꞌie laeliwalanga a Jon i sulie loto-maaꞌinge aana oonisaenga. 38Na omu saie oto uri a God e lio hilisie a Jisas ni Nasaret na e da e toꞌo aana Liꞌoa Maaꞌi na nanamanga. Oto aena aana a God e iiꞌo susu peꞌie, a Jisas e lae-lae hailiu aana taꞌena nga leu, na e asuie mo ola diana, na e haꞌa-uurie mo iini nge kire iiꞌo i hahana nanamanga a Satan. 39Na iꞌemeelu mo hurulaꞌaa melu tohungei leesie oto aana maameelu ahutana mo ola nge a Jisas e asuiꞌi aana hanue iꞌemi mo Jiu lae-lae hule oto taꞌau i Jerusalem. Na melu leesie noꞌone kire uie i lengine poꞌu-poꞌu nge e mae. 40Taꞌe aana oolune nga hai dinge a God e taꞌea loꞌu a Jisas mwaanie maenga, oto purihaꞌana e haataꞌi maraana loꞌu aameelu. 41E kaꞌa haataꞌi ike aana ahutana mwala, taꞌe mola hunie iꞌemeelu mo iini nge a God e holaꞌi lio hilisiꞌemeelu oto hunie melu ke leesie. Na maholo e mauri eelihoꞌi oto, melu ngeu-ngeu na melu inu-inu noꞌone peꞌie. 42Na a Jisas e unue oto huniꞌemeelu uri melu ke tarohaꞌinie Tataroha Diana hunie mwala. Na melu ke tarohaꞌinie uri ingeie oto a God e lio hilisie hunie kei leie ahutana mwala maꞌalana kire mae oto wa kire mauri ue. 43Ahutana mo propet oto i naꞌo kire ere-ere noꞌone i sulie a Jisas, na kire laengaꞌinie uri nga iini ko hiiwalaimoli aana, nge a God kei saeꞌaasie mo oorahaꞌaa ingeie i tehulaꞌana.”

Liꞌoa Maaꞌi E Siho I Lengine Mo Aapoloa Aaopa

44Na maholo a Pita ko ere-ere ue, Liꞌoa Maaꞌi ko siho oto i lengine ahutana mo iini nge kire ko rongo hunie walana. 45Mo Jiu nge kire hiiwalaimoli oto na kire lae mai peꞌie a Pita, kire ko tohungei pangataꞌi aana a God e niie noꞌone Liꞌoa Maaꞌi hunie kira Konilias maꞌalana ikire mo Aapoloa Aaopa. 46Na kire saie uri e toꞌohuu oto, aana kire rongoa mwala ko tohungei lahea a God aana taꞌena nga erenga hai aaopaꞌi. Oto a Pita ko teꞌuri hunie mo iini peꞌie, 47“Liꞌoa Maaꞌi e siho i lengide mala e siho kaꞌu i lengikaelu. ?Oto uri nga iini e sai uure honosie mola mwala ngeena mwaanie loto-maaꞌinge noꞌone aani wei?” 48Oto e si unue hunie mo iini peꞌie uri kire ke loto maaꞌi aana kira Konilias aana satana Jisas Kraes. Na mwala ngeena ko eitanaie a Pita uri ke iiꞌo kaꞌu peꞌire nga mo dinge loꞌu.

Currently Selected:

Palonga 10: apbNT

Highlight

Copy