Palonga 11

A Pita E Ere Luhesie Loto-maaꞌilana Mo Aapoloa Aaopa Hunie Mo Hurulaꞌaa I Jerusalem

1Mo hurulaꞌaa na ahutada kira hiiwalaimoli nge kire iiꞌo aana ahutana mo leu aana hanue mo Jiu, kire rongoa uri mo Aapoloa Aaopa kire ko hiiwalaimoli noꞌone aana God. 2Oto maholo a Pita e lai hule taꞌau i Jerusalem, ngaeta mo iini aana kira hiiwalaimoli nge kire hele maꞌutaꞌa ue aana tolaha ni torihesiꞌonga, kire ko tohungei leledie a Pita, aena aana saeda hunie torihesiꞌonga ke lae aana mo Aapoloa Aaopa. 3Kire ko leledie aena aana ko lae-lae i laona nume mo Aapoloa Aaopa, na hule aana ko ngeu-ngeu noꞌone peꞌire.

4Oto a Pita ko si unue ahutana mo ola nge e rau, na ko teꞌuri, 5“Nou oꞌoꞌo hao i Jopa, oto ngaeta maholo nou ririhungeꞌi na no ko leesie mei haataꞌinge. Nou leesie ola mala painehaꞌana mei sala ko siho mai uure i salo. Na e lio mala nga iini e helesie e hai suꞌu-suꞌue aana painehaꞌana mei sala ngeena. Na ko lae oto mai iiꞌo karaꞌinieu. 6No ko lio wau i laona, na no ko leesie taꞌena nga ola mauri oto mola ni i laona, mo ola manata na mo ola loo-looꞌa, mo lulusane na mo mwaa, na taꞌena nga manu hai aaopaꞌi—mo ola kire aapu ni ngeuꞌi haliꞌite ni ngeena. 7Oto no ko rongoa mei wala ko ere mai hunieu ko teꞌuri, ‘Pita, o ke horoꞌie mo ola ngeena, na o ke ngauꞌi.’

8“Taꞌe nou teꞌuri mola, ‘!Haꞌike, Aalaha ineu! Nou kaꞌa ngau hikana ue nga mei ola nge mo Haꞌatolanga e uure honosie uri e madaꞌa.’

9“Na no ko rongoa mei wala e uure taꞌau i Lengi ko ere loꞌu mei, ko teꞌuri, ‘Mo ola nge a God e unue uri kire rereꞌa, suꞌuri loꞌongaꞌinie loꞌu uri kire madaꞌa.’ 10Mei ola ngeena e rau haꞌa-oolu, oto purine nge suluꞌilana e si lae taꞌau i salo.

11“Oto aana kele maholoi satona, na e oolu mwane nge mwane ni Sisaria e uusungeꞌinire, kire ko hule oto wau i nume nge no ko oꞌoꞌo aana. 12Na Liꞌoa Maaꞌi e unue hunieu uri ne ke suꞌuri meꞌu, taꞌe ne ke lae mola peꞌire. Oto e oono aasikaelu ie kire hakusieu oto huni lae wau i Sisaria, na melu lai hule wau i nume a mwane nge e hai uusungeꞌi hunieu. 13Na a mwaena ko haꞌarongoꞌemeelu oto uri e leesie ngaeta ensel wau i nume ingeie, na ensel ngeena e teꞌuri hunie, ‘O ke uusungeꞌinie nga mo iini wau i Jopa huni haaraie a Saemon nge ngaeta sata aana a Pita. 14Na a Pita kei lae mai huni haataꞌinie tala ni meurihe huniꞌo na hunie mwala aana uluhe iꞌoe.’

15“Oto nou lae peꞌire, na maholo no ko si aehota ere-ere ngeena na Liꞌoa Maaꞌi ko siho oto i lengide mala e siho kaꞌu i lengikaelu holaꞌi naꞌo. 16Oto nou aamasitoꞌo oto aana mei wala a Aalaha e unue nge e teꞌuri, ‘A Jon e loto maaꞌi eemiu mola aani wei ni ngeena, taꞌe ineu ne kei loto maaꞌi eemiu aana Liꞌoa Maaꞌi.’ 17Oto a God e niie Liꞌoa Maaꞌi hunire mala e niie kaꞌu hunikolu maholo kolu aehota hiiwalaimoli aana Aalaha ikie a Jisas Kraes. ?Oto uri o ko loꞌo-loꞌongaꞌi ineu ne ke uure honosie kone? !Haꞌike! Aana e kaꞌa adona ike ne ke leledie nga taa a God e asuie.”

18Na maholo kire rongoa a Pita ko ere-ere, oto kire kaꞌa unue ike loꞌu nga mei wala i sulie. Taꞌe kire ko lahea mola a God na kire ko teꞌuri, “!Maꞌalana mo Aapoloa Aaopa taꞌe a God e saetoꞌo aada noꞌone hunie kire ke oonisae na hunie kire ke toꞌo aana maurihe huu!”

Mwala Aana Huilume I Antiok Kire Talaꞌae Huni Hiiwalaimoli

19Oto kira hiiwalaimoli nge kire tahi mwaanie i Jerusalem maholo kire horoꞌie a Stivin, kire ko si lae kalie noꞌone mo henue haꞌatau mala poꞌo ni henue i Ponisia na mala-malau i Saepras na huilume paine i Antiok aana poꞌo ni henue i Siria. Kire lae peꞌi tarohaꞌinie Tataroha Diana, taꞌe kire ko lae peꞌi unue tataroha ngeena oto mola hunie mo Jiu hahaiteli. 20Taꞌe ngaeta mo iini aada nge kire oꞌoꞌo i Saepras na i Saerin kire lai hule wau i Antiok, oto kire ko ladoa noꞌone mola tataroha ngeena hunie mo Aapoloa Aaopa, aana kire ko tarohaꞌinie tataroha i sulie a Aalaha, a Jisas. 21Oto nanamanga a Aalaha e iiꞌo aada, lae-lae mo iini hunge aada ko hiiwalaimoli na kire ko aehota lulu i sulie oto a Aalaha.

22Tataroha i sulie mei ola ienini e lai hule aana soihaadaꞌinge taꞌau i Jerusalem, oto kire si uusungeꞌinie a Banabas huni lae wau i Antiok. 23Na maholo e lai hule wau i Antiok ko si tohungei ilenimwaꞌe aana e leesie uri a God e haꞌadianaꞌara oto. Na ko si tohungei deu rarahire uri kire ke lulu i sulie oto Aalaha ikie toꞌohuu taraureꞌi. 24A Banabas ingeie mwane diana na e honu aana Liꞌoa Maaꞌi na hiiwalaimolinge ingeie e susu. Na maholona mo iini hunge kire ko aehota hiiwalaimoli oto aana a Aalaha.

25Oto purihaꞌana, nge a Banabas e si lae loꞌu weu i Tasas huni heitalea a Sol. 26Na maholo e lio oodoie, oto e toolea loꞌu mei hunie i Antiok. Na halisi leku nge a Banabas na a Sol kire iiꞌo peꞌie soihaadaꞌinge i leune na kirerue haꞌa-uusulie mwala hunge. Na i Antiok nge eetana nga leu nge kire aehota haaraꞌinie mo pwaarongoisuli aana satai ola “Kristian.”

27Aana maholona ngaeta mo propet kire uure i Jerusalem, kire lae hao hunie i Antiok. 28Oto ngaeta iini aada satana a Agabas, e uure i lengi ko si ere aana nanamanga a Liꞌoa Maaꞌi uri hiolonga kei tola aana ahutana mo leu aana aalahanga ni Rom. Oto mai puri, nge mei ola ienini ko si oa aana maholo a Klodias e neꞌi inemauri ni Rom. #11:28 A Klodias e aalaha haahie hanue i Rom lae hule aana e lime aawalai helisi mwana hai purine hutelana a Jisas (54 A.D.). 29Oto ahutana kira hiiwalaimoli kire si meni neꞌisae tararuru huni peꞌie soihaadaꞌinge aana poꞌo ni henue i Jiudia i sulie e nite nga iini aada e sai uusungeꞌinie. 30Kire teꞌurine, nge kire si uusungeꞌinie a Banabas na a Sol hunie kirerue ke toolea mo niinge na kire ke niiꞌi hunie mo naꞌohai iinoni aana soihaadaꞌinge.

Currently Selected:

Palonga 11: apbNT

Highlight

Copy