Palonga 9

A Sol E Aehota Hiiwalaimoli Aana a Jisas

Palonga 22:16, 26:12-18

1A Sol ko haro ere-ere haꞌamauꞌo ue uri ko horoꞌie ahutana mo pwaarongoisuli a Aalaha. Oto e lae i saana a Naꞌohana Mo Naꞌohai Pris, 2na ko haꞌatohu aana hunie ke uusue nga mo uusu-uusu hunie ke tooleꞌi weu aana huilume paine i Damaskas.#9:2 Damaskas ngaeta huilume oto paine karaꞌinie poꞌo ni henue i Israel, na mo Jiu oto hunge kire iiꞌo i leune. Mwala uure aana taꞌena nga hanue haꞌatau ko lae-lae mai tarau huni haꞌaholingeꞌi ola aana uusiꞌe i Damaskas. Saꞌa mola a Sol e saie mala uri mwala i Damaskas ko aehota huni lae i sulie a Jisas, nge hiiwalaimolinge ngeena kei lae hunie mo henue hunge loꞌu. Mo uusu-uusu ngeena kire unue uri mo rato aana mo nume ni palo-palo mo Jiu i leune ke peꞌie a Sol huni tapolie ahutana mo mwane na mo keni nge kire ko lulu i sulie Tala Ni Meurihe, na huni toolera loꞌu hunie haꞌaloilada taꞌau i Jerusalem.

3Oto a Sol ko lae oto wau, na maholo ko nanauhie oto huilume paine i Damaskas, ko si aparaꞌi mola aana raa-raa ko raa kali-kelie oto uure mai taꞌau i salo. 4Oto e si domu oto i aano, na ko rongoa mei wala ko teꞌuri, “!Sol, Sol! ?E ue ni o ko teungeꞌinieu?”

5Oto a Sol ko dolosi aana, ko teꞌuri, “?Iꞌoe a tei ni o ko teꞌurine ngeena, Poro paine?”

Oto mei wala ko aalamie ko teꞌuri, “Ineu a Jisas, iini nge o ko teungeꞌinie. 6O ke taꞌelaꞌi oto, na o ke lae wau i huilume. Nga iini taane wau i leune ke si unue huniꞌo nga taa ni esuie.”

7Oto mo mwane kire lae-lae peꞌie a Sol kire ko tohungei pangataꞌi, na kire rohu hule aana kire kaꞌa nguu loꞌu. Kire rongoa taane aawatana mei wala ngeena, taꞌe kire kaꞌa leesie ike nga iinoni. 8A Sol e uure i lengi, na maholo e lakataꞌinie maana e kaꞌa sai leesie loꞌu nga mei ola. Oto kire hele i kiꞌine kire si toolea mola wau hunie i Damaskas. 9E kaꞌa leesie nga mei ola hunie oolu hei dinge, wa ke ngau wa ke inu. 10Na ngaeta pwaarongoisuli e iiꞌo wau i Damaskas, satana a Ananaeas. A Aalaha e ere peꞌie aani maꞌahu-polenga e teꞌuri, “Ananaeas.”

Oto e aalamie ko teꞌuri, “Iau, ineu taane ie, Aalaha.”

11Oto a Aalaha ko teꞌuri, “O ke lae wau i nume a Jiudas nge e iiꞌo aana tala kire haaraꞌinie Tala Oodo, na o ke dolosi ohie mwane ni Tasas, satana a Sol. Kele maholoi sato ienini ko aarengaꞌi oto. 12Na i laona maꞌahu-polenga ingeie, e leesie ngaeta mwane satana a Ananaeas e lae mai hele i pweune hunie ke lio-lio loꞌu.”

13Oto a Ananaeas ko aalamie uuri, “Aalaha, nou rongoa mo laladonga hunge i sulie mo ola aaela a mwane ngeena ko esuiꞌi aana mwala iꞌoe taꞌau i Jerusalem. 14Na maholo ienini e toolea nanamanga mo naꞌohai pris huni tapolie taꞌena nga iini ko haꞌapainaꞌaꞌo.”

15Taꞌe a Aalaha e teꞌuri mola hunie, “!O ke lae mola! A mwane ngeena nou lio hilisie oto hunie ke asu nekue. Kei tarohaꞌinie sataku hunie mo Aapoloa Aaopa na mo inemauri ikire, na mo Israel noꞌone. 16Na ineu maraaku, ne kei haataꞌinie hunie uri ke sapesalu oto hiitoꞌo i tehulaꞌaku.”

17Oto a Ananaeas e lae oto, e lai sili weu i nume ngeena e si hele i pweune a Sol aana nimana, na ko teꞌuri, “!Aasiku, Sol! A Jisas nge e haataꞌi eemu maholo o lae mai sulie tala, ingeie oto a Aalaha na e uusungeꞌinieu mei ie hunie o ke lio-lio loꞌu, na hunie o ke honu aana Liꞌoa Maaꞌi.” 18Aana maholoi satona ola mala uunuhaꞌai iiꞌe ko teke oto mwaanie e ro maana a Sol, na ko lio-lio oto loꞌu. Oto e taꞌelaꞌi, na loto-maaꞌilana ko lae oto. 19Na purihaꞌana e ngau mango, nge sapena ko si aꞌailaꞌa loꞌu.

A Sol E Tarohaꞌinie Tataroha Diana Wau I Damaskas

Oto a Sol e iiꞌo oto peꞌie mo pwaarongoisuli wau i Damaskas hunie ngaeta mo kele dinge. 20E oodo mola wau i laona mo nume ni palo-palo mo Jiu, na ko tarohaꞌinie oto a Jisas uri ingeie oto Kalena God toꞌohuu.

21Ahutana mwala kire rongoa walana kire ko tohungei pangataꞌi, na kire ko teꞌuri, “Mwane nge e lae peꞌi horo suuheꞌinie mwala nge kire ko aarengaꞌi hunie a Jisas ni ngeena. E teꞌurine kaꞌu aana mwala oto taꞌau i Jerusalem, na e lae loꞌu mei leu huni tapolie mwala huni toolera hunie mo naꞌohai pris kei leire. ?Oto e ue ni ko si ere aaopa loꞌu urine?” 22Taꞌe walana Sol mone ko nanama loꞌu liutaa suli dinge, na e tohungei ere luhesie hunie mwala ni Jiu i Damaskas uri a Jisas oto a Kraes, hule aana e aasa hunie nga iini kei aalamie loꞌu.

23Oto purine mo dinge hunge e haro mango, mo rato ni Jiu i Damaskas kire si loko huni oalaꞌinie horoꞌilana a Sol. 24Oto susue rodo na aatowaa kire ko kakalie mola ahutana mo maai para aana para ahuie huilume paine ngeena hunie kire ke tapolie na kire ke horo maesie. Taꞌe a Sol e rongoa mola mo oalaꞌinge ikire ngeena. 25Oto aana ngaeta hai rodo mo pwaarongoisuli ingeie kire neꞌie i laona luꞌe paine, na kire ko uukue i aano i sulie maaureꞌi i sinaha aana para.

A Sol E Maatolie Mo Hurulaꞌaa Taꞌau I Jerusalem

26Maholo a Sol e hule loꞌu taꞌau i Jerusalem ko tohungei sare iiꞌo peꞌie mo pwaarongoisuli a Jisas, taꞌe kire ko tohungei meꞌuteꞌinie na kire kaꞌa hiiwalaimoli ike aana uri ingeie ngaeta pwaarongoisuli mala ikire. 27Oto a Banabas e si peꞌie aana e toolea i saana mo hurulaꞌaa, na ko haꞌarongora uri a Sol e leesie a Aalaha i sulie tala, na a Aalaha e ere oto peꞌie a Sol. Na ko haꞌarongora noꞌone aana uri a Sol ko lae peꞌi ere aꞌailaꞌa mola i sulie satana a Jisas wau i Damaskas. 28Oto a Sol ko iiꞌo oto peꞌire, na ko lae hailiu i Jerusalem peꞌi ere aꞌailaꞌa i sulie satana Aalaha. 29Na ko ere haitelili noꞌone peꞌie mo Jiu nge kire ko ere mola aana erenga ni Krik. Oto kire ko heꞌi loꞌo-loꞌongaꞌi loꞌu hunie nga tala uri taa kei mwadaꞌu huni horo maesie. 30Oto maholo mo eesine i lalo aana Kraes kire rongo urine, kire si toolea a Sol wau hunie huilume paine i Sisaria, na kire ko uusungeꞌinie loꞌu weu hunie huilume paine i Tasas.

31Oto aana kele maholona nga iini hunie ke saunie kira hiiwalaimoli aana poꞌo ni henue i Jiudia na i Kalili na i Samaria haꞌike loꞌu. A Liꞌoa Maaꞌi ko tohungei peꞌire na ko da soihaadaꞌinge ko aꞌailaꞌa na ko haꞌahungeꞌaa mwala i laona soihaadaꞌinge. Oto kire ko si tohungei lahea Aalaha mola taraureꞌi.

A Pita E Lae I Lida Na I Jopa

32Oto a Pita e lae-lae hailiu aana ahutana mo henue, ko si lai hule aana mo iinoni a God aana huilume i Lida. 33Aana huilume ngeena, e leesie mwane sapena e rarasi, satana Aenias. Na e walu helisi oto a mwane ngeena e kaꞌa ada ike mwaanie tahe ingeie.

34Oto a Pita ko teꞌuri hunie, “Aenias, a Jisas Kraes ko haꞌa-uuriꞌo. O ke taꞌelaꞌi, na o ke lulungie hulite iꞌoe.” Na oto mola aana maholoi satona a Aenias ko uure hala-hala oto. 35Oto mwala nge kire ko oꞌoꞌo aana e ro huilume ngeena i Lida na i Saron, kire ko si eeliꞌu huni lulu i sulie a Aalaha aana kire leesie a Aenias.

36Na ngaeta pwaarongoisuli e iiꞌo aana huilume i Jopa satana a Tabita na aana erenga ni Krik satana a Dokas. Helelana a huꞌe ngeena e tohungei diana suli maholo, na e iiꞌo mola huni peꞌie mo iini ko siꞌohaꞌa. 37Aana maholona, a Dokas e mataꞌi hiitoꞌo, lae-lae na ko mae oto. Kire lotohie, kire si lai neꞌie i laona duru aana sao-saohai nume taꞌau i lengi. 38Na huilume i Jopa ngeena e iiꞌo karaꞌinie mola huilume i Lida. Oto maholo mo pwaarongoisuli kire rongoa uri a Pita e iiꞌo i Lida, kire si uusungeꞌinie e ro mwane wau i saana, oto kirerue ko teꞌuri hunie, “Melu saetoꞌo aana o ke tohungei lae lau-leu oto wau i saameelu.”

39Oto a Pita ko lae oto peꞌirerue na maholo kire hule wau i Jopa, kire si naꞌona hunie duru taꞌau i lengi. Mo mei nao keni kire ko tohungei ngara, kire lae mai, kire uure oto kali-kelie a Pita. Na kire ko haataꞌinie oto mo toꞌoni na mo sala tetewa nge a Dokas e tauriꞌi nada maholo e mauri ue. 40Oto a Pita e si unue ahutana mwala ke lae kaꞌu i sinaha, oto e pouruuru ko si aarengaꞌi. E saro wau takoie huꞌe nge e mae ngeena, ko soie satana na ko teꞌuri, “!Tabita, o ke taꞌelaꞌi!” Oto a huꞌena e lakataꞌinie maana na maholo e leesie a Pita, e si taꞌelaꞌi. 41A Pita e hele aana nimana, e si haꞌa-uuresie i lengi. Oto purihaꞌana e si soie mai mo nao keni na ngaeta mo iinoni a God hunie kire ke leesie a Tabita e mauri loꞌu. 42Oto tataroha ngeena e lae hailiu i laona poꞌo ni henue i Jopa na mwala hunge ko aehota hiiwalaimoli oto aana Aalaha. 43A Pita e kele iiꞌo tewa wau i Jopa na e iiꞌo peꞌie a Saemon, mwane ko esu aakau aana mo teꞌe-teꞌei puluke hunie mwala aaopa kei esuie mo ola mwaaniꞌi.

Currently Selected:

Palonga 9: apbNT

Highlight

Copy