1 Timoti 2

Kie Ke Aarengaꞌi Peꞌie Mei Sae Manola Talana Ahutana Mwala

1No ko holaꞌi unue kaꞌu huniꞌo uri o ke aarengaꞌi talana ahutana mwala. O ke paalahea God haahire, na o ke aitanaie a God hunie ke peꞌire na ke haꞌadianaꞌara. 2Na o ke aare-aarengaꞌi noꞌone talana mo inemauri na taꞌena nga aalaha, hunie uri kire ke da hanuelamanga hunikie hunie kie ke mani iiꞌo hahuroto mola peꞌie ahutana mwala, na mwaanie kire da aasanga huni lulu i sulie tolahana a God aana iiꞌonga maaꞌi. 3Aana aarengaꞌinge urine ni e toꞌohie saena a God a Haꞌa-uuritaka. 4Ingeie e saetoꞌo aana uri ahutana mwala ke manataꞌinie walaimolinge hunie kire ke toꞌo aana maurihe huu. Na walaimolinge ngeena e uuri. 5E taꞌa-taꞌa God mola, na e taꞌa-taꞌa iinoni mola huni haꞌa-uureruru i matolana mo iinoni na a God, na a Haꞌa-uureruru ngeena oto mola a Kraes Jisas. Ingeie oto maraana e neꞌi iinoni, 6na e toliꞌaasie maraana hunie ke mae mala nga uuraaꞌinge honotana ahutana iinoni mwaanie kire iiꞌo loꞌu i memelutana oorahaꞌaa. Leune e rau aana tohungana maholo hunie, na ko haataꞌi diana aana uri a God ko sare haꞌa-uurie ahutana iinoni. 7Aena urine nge lio hilisileku e lae huni houleꞌinie Tataroha Diana na huni neꞌi hurulaꞌaa. No ko ere toꞌohuu na nou kaꞌa eeroꞌo ike uri lio hilisileku e lae huni haꞌa-uusulie mo Aapoloa Aaopa nge ikire nga mo Jiu haꞌike hunie uri kire ke saie walaimolinge na kire ke hiiwalaimoli aana.

8Oto nou saetoꞌo aana uri ahutana mwane aana taꞌena nga leu kire ke aarengaꞌi. Mwaanie kire hele ni kumu aani saewasunge wa kire haataꞌinie kiꞌide aani haꞌa-erenga, taꞌe kire ke asuie mola nga taa e oodo aana kiꞌide, na kire ke susueꞌinie nimada i lengi aani aarengaꞌinge.

9Na nou saetoꞌo aana noꞌone uri mo huꞌe kire ke haꞌalaunire aana mo tolahai ola diana. Mo huꞌe ke hoꞌosie mo toꞌoni nge kire malisi, na kire ke haataꞌinie haꞌamaꞌunge na iiꞌonga oodotaꞌi ikire aana mo toꞌoni kire ko hoꞌosiꞌi. Na mwaanie kire loꞌongaꞌi oto hiitoꞌo i sulie haꞌalaunilana iihune pwaude, wa aana hoꞌosilana mo leunihe aani kol, wa mo uꞌumaai dehi, wa mo toꞌoni nge holiteni e paine. 10Taꞌe kire ke haꞌalaunire aana mo esunge diana kire ko esuiꞌi, aana leune e adona mo huꞌe nge kire ko unue uri kire manata diana hunie a God. 11Maholo o ko haꞌa-uusulie ruruhaa i sulie tolahana a God, o ke toliꞌaasie mo huꞌe hunie kire ke tola saenanaunge noꞌone, mala uri kire ko iiꞌo aani rongonga hahuroto na aani haꞌamaꞌunge. 12Taꞌe ineu, nou kaꞌa tolimaaie ike hunie mo huꞌe ke paine haahie lokotaa ni mwane wa kire ke haꞌa-uusulie mo mwane taꞌe kire ke iiꞌo hahuroto mola. 13No ko ere urine aena aana a Adam haꞌaholalana e lae holaꞌinaꞌo, oto a Iv e si puri. 14Na a Pwelu Eero-eero e kaꞌa pweloa ike a Adam, taꞌe e pweloa mola a Iv, na urine a huꞌena e oorahaꞌaa oto. 15Taꞌe kinetaꞌinilana mo huꞌe mwaanie malaahonga aana mo tolahai ola aaela ni welumalau ngeena e sai lae mala uri kire ko toꞌo mwela#2:15 Erenga ni Krik e kaꞌa tohungei matapwa ike i leu. na kire ko hele susuleꞌi aana hiiwalaimolinge aana a Jisas, na kire ko manata diana hunie mo iinoni, na kire ko iiꞌo maaꞌi. Na kire ke asuie walu ola urine peꞌie haꞌamwai-mweiꞌanga.

Currently Selected:

1 Timoti 2: apbNT

Highlight

Copy

Compare