1 Timoti 1

Mei Wala Ni Saediananga Hunie Mwane Saanau A Timoti

1Saediananga mwaanieu a Pol, iini nge a God a Haꞌa-uuritaka na a Kraes Jisas kire mani unue ne ke neꞌi hurulaꞌaa nana a Kraes Jisas nge kie ko maaꞌoohi susutoꞌo hunie peꞌi hiiwalaimolinge aana. 2No ko uusue oto ie huniꞌo kaleku Timoti, aana iꞌoe oto mwela maaꞌi ineu aani hiiwalaimolinge.

No ko eitanaie a God Aamaka na Aalaha ikie a Kraes Jisas, uri hahuꞌana manata-diananga, na aamasinge, na hanuelamanga ingeie ke iiꞌo peꞌiꞌo.

Mo Haꞌa-uusuli Toꞌohuu Ke Uure Honosie Mo Haꞌa-uusuli Eero-eero

3Mala oto nou unue kaꞌu huniꞌo aana maholo nou lae mai hunie poꞌo ni henue i Masedonia, saeku hunie uri o ke oore kaꞌu mola wau aana huilume i Epesas. O ke iiꞌo oto i leune hunie o ke uure honosie mwala nge kire ko lae peꞌi haꞌa-uusuli mola aana mo ola aaopa mwaanie hiiwalaimolinge toꞌohuu. 4O ke unue hunire uri kire ke mamalo oto mwaanie tolahai ola nge ko waetaꞌinie maholo ikire mola aana mo laladonga kaꞌa toꞌohuu na aana uusulana mo satai ola oto hunge i sulie mo weuwada. Aena aana mo ola ngeena kire sai da haꞌa-erenga hunie mo iinoni, na kire saꞌa peꞌie ike asunge a God nge e saetoꞌo aana mwala ke asuie. Aana tolaha ni hiiwalaimolinge mola haꞌalaa ko peꞌikie huni lulu i sulie oalaꞌinge a God. 5Aena aana nga taa no ko sare haꞌa-uusulire aana ngeena, nge mola hunie kire ke mana-manata diana hunire hailiu aani sae manola, na aani manatanga rereꞌa, na aani hiiwalaimolinge toꞌohuu. 6Ngaeta mwala kire dau talahie mo ola ienini, oto kire ko lae mola i sulie mo ere-erenga mwaakule. 7Saeda hunie mwala ke saire mala mo haꞌa-uusuli aana mo Haꞌatolanga a Mosis, taꞌe hule aana kire kaꞌa sai loꞌongaꞌi saie ike noꞌone mola nga taa nge kire ko ere i sulie ngeena, wa uri nga taa nge kire ko haꞌa-uusuli aana.

8Taꞌe ikie, kie manataꞌinie uri mo Haꞌatolanga ngeena kire diana taane mala uri kie ko tola diana aani oto i sulie tohungana tala a God e loꞌongaꞌinie. 9Na kie saie taane noꞌone uri mo Haꞌatolanga ngeena kire kaꞌa iiꞌo ike huni haꞌa-oodohie mwala diana, taꞌe huni haꞌa-oodohie mo iini nge kire ko deu aaelasie mo Haꞌatolanga na kire ko deu roroꞌanga mola tarau. Haꞌatolanga oto ola huni haꞌa-oodohie mo iini nge kire sereꞌinie a God na kire iiꞌo mola peꞌie oorahaꞌaanga na kire ko ere mwakataꞌinie mola a God na taꞌena nga ola maaꞌi. Na Haꞌatolanga ola noꞌone huni haꞌa-oodohie mo iini ko horoꞌie mo aamada na mo nikada na taꞌena nga iinoni loꞌu. 10Na ola noꞌone huni haꞌa-oodohie mo iini ko mei-mesi, na mo mwane kire ko aeꞌaeni ola peꞌie mo mwane loꞌu mola mala ikire, na mo iini ko peli-pelie mo iinoni, na mo iini ko eero-eero hailiu, na mo iini ko eeroa mo mwane lei-lei. Na e neꞌi ola noꞌone huni haꞌa-oodohie taꞌena nga mei ola nge ko lae aaopa loꞌu mwaanie haꞌa-uusulinge diana 11aana Tataroha Diana nge e tohungei menikuluꞌe. Tataroha Diana ngeena, niilana e lae hunieu mwaanie a God, iini e diana oto liutaa.

Saeꞌaasinge A God E Kaꞌa Toꞌo Taitelihana

12No ko tohungei paalahea a Kraes Jisas Aalaha ikie, aana e norutoꞌo aaku na e haaraieu huni esu nana, na loꞌu e niie aꞌailaꞌanga malisine asunge ngeena nakue. 13E asuie walu ola diana urine nakue, maꞌalana holaꞌinaꞌo ineu, nou talei ere-ere aaelasie a Kraes, na nou teungeꞌinie mo iini e hiiwalaimoli aana, na nou esuie taꞌena nga ola huni waelire. Taꞌe a God e aamasieu, aena aana nou kaꞌa saie ike nga taa nou euꞌesuie na aana maholona nou kaꞌa hiiwalaimoli ike ue. 14Taꞌe Aalaha ikie e niie hahuꞌana manata-diananga ingeie hunieu, na aena ngeena mone nou eeliꞌu huni hiiwalaimoli aana a Kraes Jisas, na huni mana-manata diana hunie mwala mala ingeie noꞌone e manata diana hunire.

15Nga taa nge ne kei unue ie e toꞌohuu, na o sai norutoꞌo aana oto. A Kraes Jisas e lae mai laona walumalau huni haꞌa-uurie kira oorahaꞌaa. O sai leesie leune e toꞌohuu, aana ineu oto ngaeta iini nou aaela liutaa, taꞌe ingeie mone e haꞌa-uurieu. 16Na niilana hai aamasinge e lae oto hunieu urine aana a Jisas Kraes e sare haataꞌinie uri saeꞌaasinge ingeie e kaꞌa toꞌo taitelihana. Na aana e haꞌa-uurieu, iini nge e oorahaꞌaa aaela oto liutaa, e haataꞌinie oto uri e sai haꞌa-uurie taꞌena nga iini nge ko norutoꞌo aana. Na ikire noꞌone kire sai toꞌo aana maurihe huu.

17Oto kie ko tohungei paalahea Inemauri nge e iiꞌo huu,

e saꞌa roroꞌa mae ike loꞌu,

kie kaꞌa sai leesie ike aani maa.

Taꞌe ingeie mola e neꞌi tohungei God,

ahutaka mo iinoni kie ke haꞌamaꞌu aana

kie ke soi haꞌamanikuluꞌaa oto di, oto di.

!Iau, ke urine oto!

18E kaleku Timoti, mo wala nge no ko uusuꞌi weu huniꞌo ie kire kaꞌa ere aaopa ike mwaanie walana a God nge mo propet aana soihaadaꞌinge kire unu-unuꞌi keꞌu oalamu. No ko unue huniꞌo urine hunie o ke lulu i suliꞌi na hunie o ke ooho aꞌailaꞌa mala ngaeta ramo diana a Jisas. 19O ke hele susuleꞌi mola aana hiiwalaimolinge iꞌoe aana a Kraes, na o ke asuie mola tarau nga taa nge o manataꞌinie uri e oodotaꞌi. Ngaeta mwala kire ko talei deu huꞌisie mola nga taa nge manatada e unue hunire uri e oodotaꞌi, oto kire urihana mola haka e aape aana mwalo, na urine nge kire si tohungei waelie oto hiiwalaimolinge ikire. 20A Haemeneas na a Aleksanda ikirerue e ro iini aana mwala urine nge hiiwalaimolinge ikire e aaela taꞌingelu mala haka e aape. Oto nou toliꞌaasirerue oto hunie a Pwelu Eero-eero, uri hunie kirerue ke lio saie nga taa kei reu aana mo iini kire ko sare ere mwakataꞌinie a God.

Currently Selected:

1 Timoti 1: apbNT

Highlight

Copy

Compare