Romanos 5
5
Kjuaxróxin tjejóni kixin ó xika ti ijie̱ chóntani
1Mé xi̱kaha ó xika ti ijie̱ chóntani kixin tinkáchónkini Cristo la kjuaxróxin tsꞌejókoni Díos kixin Ìnchéni Jesucristo kꞌuenyákohe̱n ti jeheni. 2Kjuasáye Cristo kixin jína kóchjineheni Díos kixin tinkáchónkini chꞌan la ko kꞌuáyéhe̱ni ti kjuachaxin kuènté chꞌan. Ndá ti kjuachaxin la jína tsjinki̱tsa kixin jína chrókꞌuejóni. Kja̱xin tso̱chéhe̱ni tsꞌejóchóheni kixin ndá tsꞌixeheni ti itjen Díos la tsꞌáyéhe̱ni ti kjuachaxin ijié kuènté chꞌan. 3La jehya tíhó, la náhí. Kja̱xin tso̱chéhe̱ni kjónté nchónhña nkehe tsjasótexíni ijie kixin ó noheni kixin ti xi̱kaha tso̱heni ndá tsꞌitjani tsꞌejóchóheni la ko kanhñó chrókóxakoheni. 4A̱ndá ti xi̱kaha tsjachani tsꞌatsínkani kaín ti kjuaxróxinhña itsi, ndá xi̱kaha jína tsꞌejóchóheni ti nkehe jína itsi chrꞌéxi̱n. 5A̱ndá ti tjejóchóheni ti nkehe itsi, la chrókꞌóxrjéhya a̱séni kixin Díos kjuajon ti Ncha̱kuén la tíhi nchenoheni kixin Díos imá tjue̱he ti jeheni.
6Mé xi̱kaha ti jehóni la xitjahya chrókuaáni, ndá ti ña̱o kjueyá Díos la ó xiteyá kixin ikui Cristo la kꞌuenyákohe̱n chꞌan ti jeheni kixin ti ijie̱ chóntani. 7Kjá ninkexró chróndáchrohya kixin chrókꞌuenyákohe̱n íjnko chojni kjónté imá jína sin, kjánchó nkojín ña̱o la kjá xi̱kaha chrókóhen. 8A̱ndá ijie la Díos mé kjua̱ko̱xi̱n kixin imá tjue̱he ti jeheni kixin kjónté na̱xa̱ chóntani ijie̱ la Cristo kꞌuenyákohe̱n chꞌan ti jeheni. 9Méxra̱ Díos kꞌóxika ti iji̱éni kixin Cristo kꞌuenyákohe̱n chꞌan ti jeheni, ndá ó noheni kixin jehe chꞌan tsaáxini chꞌan, a̱ndá kaín ti nkehe chrókjuasótexíni tsjixixín la í tsue̱nhña. 10Kixin ti na̱xa̱ kꞌuénínkakoheni Díos, la jehe chꞌan kjuajon chꞌan kjuaxróxin kixin ti Xje̱en chꞌan kꞌuenyákonhe̱n ti jeheni, a̱ndá ijie la a̱ntsí noheni kixin tsaáxini chꞌan kixin tjechón chꞌan la ó kjuaxróxin tjejókoni chꞌan. 11La jehya chrókótihó. La náhí. Kja̱xin tso̱chéhe̱ni kixin tinkáchónkini Díos kixin kjuasáye Ìnchéni Jesucristo, kixin Cristo mé chóntaxíni kjuaxróxin ti itjen Díos.
Adán la ko Cristo
12 #
Gn. 3:6. *Mé xi̱kaha ójnko nkexro kjuasin ijie̱, ndá kꞌuíxin ijie̱ kuenté chjasintajni. Mé xi̱kaha ti nkexro sa̱oxín ikꞌuén kixin ti ijie̱ kjuasin, ndá xi̱kaha kaín chojni tinkákꞌen kixin kaín sin kjuasin sin ijie̱. 13Kixin ti ósé la kꞌuékohya ti ley, la xráxín kꞌuíxin ijie̱ ti chjasintajni, kjánchó na̱xa̱ kohya ley tjanchia ijie̱ chrókjuasótexín chojni. 14A̱ndá ndesi ti kjuákꞌe Adán la ko hasta ti kjuákꞌe Moisés la kꞌuéchónta kjuachaxin ti kjuachꞌén kixin ti ijie̱ kjuasin chojni mé kꞌuénxin sin. Kjánchó jehya kaín sin kjuasin sin ijie̱ éxi ti ijie̱ kjuasin Adán, kixin jehe chꞌan kuítekakonhña chꞌan ti nkehe kꞌue̱to̱an Díos. Adán mé yóhe̱ éxi ti nkexro itsi chrꞌéxi̱n.
15A̱ndá ti ijie̱ kjuasin Adán la xitjahya chrókóyóhe̱ ti nkehe jína tsjajon Díos. Méxra̱ nkoko̱a chojni kjuasin ijie̱, ndá nchónhña chojni tinkákꞌen. A̱ndá ti tsaáxini, la kixin Díos tjue̱he ti jeheni la ichrꞌán chꞌan nkoko̱a nkexro mé Jesucristo tíha, kixin xi̱kaha tsaáxin nchónhña chojni. 16Ti ijie̱ kjuasin nkoko̱a chojni la tóyóe̱hya ti nkehe tsjajon Díos tsaáxini. Kixin nkoko̱a chojni kjuasin ijie̱ la kjuasótexín nchónhña chojni. A̱ndá ti tsaáxini la kjuasáye Díos kjuajon la ko tsꞌóxika chꞌan ti ijie̱ chóntani kjónté nchónhña ijie̱ kjuasini. 17Méxra̱ ti kjuachꞌén la kꞌuéchónta kjuachaxin kixin ti ijie̱ kjuasin nkoko̱a chojni. A̱ndá kjuasáye Díos, kóxika ti ijie̱ chóntani, ndá a̱ntsí tsochóntani kjuachaxin tsꞌejóni jína kixin nkoko̱a nkexro kjuenka̱yákohe̱n ti iji̱éni, mé Cristo tíha.
18Mé xi̱kaha ti ijie̱ kjuasin chꞌin Adán, la kaín chojni chrókjuasótexín sin. A̱ndá ijie la Cristo mé kꞌóxika ti iji̱é kaín chojni la ko kjuajon chꞌan kjuachón kixin jína chꞌan la ko kꞌuenyákohe̱n chꞌan ti jeheni. 19Mé xi̱kaha nkoko̱a chojni kuítekakonhña, la nchónhña chojni kjuasin ijie̱. Ndá xi̱kaha nkoko̱a nkexro jína kuitekaon, la nchónhña chojni tsaáxin ti jehe chꞌan.
20Ikui ti ley ndá a̱ntsí kꞌuíxin ijie̱. Mé xi̱kaha a̱ntsí kꞌuíxin ti ijie̱, la Díos a̱ntsí kui̱konoéhe̱ chꞌan ti jeheni. 21Mé xi̱kaha ti ijie̱ kꞌuéchónta kjuachaxin kjui̱ka̱o kjuachꞌén chrókꞌuenxíni. La xi̱kaha Díos a̱ntsí chónta chꞌan kjuachaxin tsꞌóxika chꞌan ti iji̱éni la ko tsjajon chꞌan kjuachón nkochríxín kixin Ìnchéni Jesucristo kꞌuenyákohe̱n ti jeheni.
Currently Selected:
Romanos 5: poeNTplus
Highlight
Share
Copy

Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.