Romanos 4

Ti nkehe kjua̱ko̱xi̱n Abraham

1Tsjenka̱yáxini nkexrín kꞌuatsínka Abraham, ti nkexro kꞌuaxrjeníxini ósé. 2Ti chaxín chróxika iji̱é Abraham kixin ti ixra̱ jína kjuíchꞌe chꞌan ndá chrókóhnke chꞌan, kjánchó Díos chrókꞌuikon kixin nduáhya tíhi. 3#Gn. 15:6; Gá. 3:6.*A̱ndá ndáchro ti xroon itén Díos: “Abraham kuitekaon Díos ndá táha kuaáxin chꞌan la xika ti iji̱é chꞌan.” 4Méxra̱ ti nkojín nkexro ichꞌe ixra̱ la jehya kꞌuáyéhe̱ko̱a sin ti nkehe kjuacha sin. Náhí. Xenkehe sin ti ixra̱ kjuíchꞌe sin. 5A̱ndá ti nkojín chojni kjuíchꞌehya ninkehó ixra̱ kjánchó kuitekaon sin Díos, ti nkexro tsꞌóxika ti iji̱é sin, la ti kuitekaon sin mé tsꞌikon Díos éxi ixra̱ jína kjuíchꞌe sin. 6Kja̱xin ndáchro David kixin náxrjón ti nkexro xika iji̱é kixin Díos kuáhya kuentá ti ijie̱ tsíkjasin sin. 7#Sal. 32:1, 2.*Ndáchro David:

Náxrjón tjejó ti nkexro kjuíncheñao Díos kixin kjónté nkehe nduáhya kjuíchꞌe sin, la Díos kꞌóxika ti iji̱é sin.

8Náxrjón tjejó ti nkexro kuáhya kuentá Díos ti ijie̱ kꞌuéchónta sin.

9¿Á jehó ti sin ikuá xro̱ye ó sincheñao Díos ní, o̱ á kja̱xin ti sin chóntahya xro̱ye? Kixin ó chrónkani kixin Díos la kui̱konoéhe̱ chꞌan Abraham kixin kuitekaon chꞌan la táha xika ti iji̱é chꞌan. 10A̱ndá, ¿nkesá tsíkjincheñao Díos Abraham? ¿Á ti ó kjuixin tsíka chꞌan xro̱ye ní, o̱ ti na̱xa̱ náhí? Kjá ti na̱xa̱ náhí, la sa̱o kjuíncheñao Díos Abraham, 11#Gn. 17:10.*ndá chrꞌéxi̱n Abraham ikuá ti xro̱ye éxi ijnko sello kjua̱ko̱xi̱n kixin Díos kꞌóxika ti iji̱é chꞌan kixin kuinkáchónki chꞌan Díos. Ndá xi̱kaha kꞌóna Abraham itꞌé kaín ti chojni titekaon Díos, kjónté chojni tsíkahya xro̱ye. 12La Abraham mé kja̱xin itꞌé kaín ti sin tsíka xro̱ye, kjánchó jehó ti sin titekaon Díos éxi kuitekaon chꞌan, kjónté na̱xa̱ tsíkahya chꞌan xro̱ye.

Ti nkehe tsíchronka Díos la tsoxiteyá ti titekaon sin chꞌan

13 # Gn. 17:4-6; 22:17, 18; Gá. 3:29. *Díos tsíndáche Abraham kixin jehe chꞌan la ko ti sin tsꞌaxrjeníxin chꞌan mé tsꞌáyéhe̱ sin ti chjasintajni tsꞌejó sin. Kjánchó ti nkehe kꞌuáyéhe̱ Abraham la jehya kꞌuáyéhe̱ chꞌan kixin kuitekaon chꞌan ti ley. Náhí. Kꞌuáyéhe̱ chꞌan kixin kuitekaon chꞌan Díos, la Díos kꞌuíkon kixin jína chꞌan. 14#Gá. 3:18.*A̱ndá ti jehó ti sin tsíkjinchexiteyá ti ley chrókꞌuáyéhe̱ sin ti nkehe chrókjuajon Díos, la jeheni la ó chónkó chrókuitekaoni Díos, la kjá ninkehó sínkíhya ti nkehe tsíndáchro Díos ti xi̱kaha. 15Kixin ti ley la tꞌe̱to̱an kixin tsjasóte chojni ti sinchexiteyáhya sin, a̱ndá ti chrókókohya ti ley la chrókókohya nkehe chrókjuanchia ijie̱.

16 # Gá. 3:7. *Méxra̱ ti nkehe tsíndáchro Díos tsjajon la kixin kuinkáchónki chꞌin Abraham ti jehe chꞌan, la Díos sincheki̱to̱nhe̱n tíha kaín ti sin tsíkꞌaxrjeníxin ti chꞌin Abraham tinkáchónki sin Díos. Jehya jehó ti sin tinkáchónki ti ley tꞌáyéhe̱ sin ti nkehe tsjajon Díos. Náhí. Kja̱xin ti sin tsitekaon éxi kuitekaon chꞌin Abraham mé tsꞌáyéhe̱ sin tíha. Ndá xi̱kaha chꞌin Abraham mé kꞌóna itꞌéni kaíni. 17#Gn. 17:5.*Éxi nixja ti xroon itén Díos: “Janhan kjuánjua kjuachaxin kixin jaha tsꞌóna itꞌé itsjé chojni siín chjasintajni.” Méxra̱ Díos la sinchexiteyá ti nkehe tsíndáchro kixin tjetsjehe chꞌan kixin jína kuitekaon Abraham ti jehe chꞌan. Ti Díos nchexechón ti chojni tsíkꞌen la ko tꞌe̱to̱an kixin tsꞌóna ti nkehe na̱xa̱ kohya.

18 # Gn. 15:5. *Kjónté na̱xa̱ kꞌuéchóntahya chꞌin Abraham xje̱en, la kuitekaon chꞌan Díos la chóhen chꞌan kixin tsꞌóna chꞌan itꞌé itsjé chojni éxi tsíndáchro Díos: “Nchónhña chojni tsꞌaxrjeníxin ti jaha.” 19#Gn. 17:17.*Chꞌin Abraham kꞌuéchónta chjina ijnko ciento nánó la ko ó nohe chꞌan kixin í séhya ndá itsꞌen chꞌan, kjánchó kꞌuitjáñehña chꞌan kuitekaon chꞌan Díos, kjónté nohe chꞌan kixin ti ichjién chꞌan, Sara, la xitjahya tsochónta tjan ixjan. 20Abraham la kóxakuenhña chꞌan, kuitekaon chꞌan kixin Díos la tsjajon ti nkehe tsíndáchro. La a̱ntsí kuitekaon chꞌan Díos la ko chjéhe chꞌan kjuasáya 21kixin ó nohe chꞌan kixin Díos la chónta kjuachaxin sinchexiteyá kaín ti nkehe tsíndáchro. 22Mé xi̱kaha Díos kꞌuíkon kixin chꞌin Abraham kuitekaon chꞌan, ndá Díos kꞌóxika ti iji̱é chónta chꞌan.

23Ti xroon chronka kixin tsoxika iji̱é chojni kixin tsitekaon sin Díos la jehya tsíkꞌóna kixin jehó Abraham tsoxika ti iji̱é. 24Náhí. Kja̱xin jeheni tsoxika ti iji̱éni ti tsitekaoni Díos, ti nkexro kjuínchexechón Ìnchéni Jesucristo. 25#Is. 53:4, 5.*Ti nkexro kꞌuenyákohe̱n ti jeheni kixin ti ijie̱ chóntani. Ndá xechón chꞌan ínaá kixin tsꞌóxika chꞌan ti iji̱éni kixin ó kuitekaoni ti jehe chꞌan.

Currently Selected:

Romanos 4: poeNTplus

Highlight

Copy