Salmos 96
96
Tsotsjeni ijnko isón ni̱xin kuènté Itꞌéni Díos
(1 Crónicas 16:23-33)
1Itsjera ijnko himno ni̱xin tjikosayehéra Itꞌéni Díos.
Itsjera kaínra chojni siín kuenté chjasintajni tjikosayehéra Itꞌéni Díos.
2Tsje̱xi̱nra ihni̱é Itꞌéni Díos, tjikosayehéra chꞌan;
chro̱nkara nkojnko ña̱o kixin tsaáxinra Díos.
3Chróchenkara chojni siín kuenté chjasintajni nkexrín itjen
ti kjuachaxin kuènté Díos
la ko ti nkehe ijié kjuasin chꞌan.
4Kixin imá ijié ti kjuachaxin chónta Itꞌéni Díos
la jína chrókjuikosáyeheni chꞌan.
A̱ntsí tꞌe̱to̱an Itꞌéni Díos ke ti íso díos.
5Kaín ti díos siín íso chjasin la chóntahya
ninkehó kjuachaxin,
a̱ndá Itꞌéni Díos la kjuíchꞌéna chꞌan nka̱jní.
6Imá náxrjón ti itjen Díos
kixin imá siín kjuachaxin la tꞌinkaséña
ti nkaxehen ni̱nkué chꞌan.
7 #
Sal. 29:1, 2. *Jahara chojni siín chjasin chróndáchrora
kixin jehó Díos imá tꞌe̱to̱an,
la jehó chꞌan imá chónta chꞌan kjuachaxin.
8Chrochje̱héra Itꞌéni Díos kjuasáya
kixin imá chónta chꞌan kjuachaxin.
Méxra̱ chrókjuikoára nkehe jína chontara,
chróchje̱héra Díos.
9Chrokjuíkosáyehéra Itꞌéni Díos
ti nkaxehen ni̱nkué chꞌan náxrjón tjóá.
Kaín chojni chjasintajni chróchrako̱he̱n sin Díos.
10Chróndáchera ti chojni chjasintajni kixin
Itꞌéni Díos mé ti Rey tꞌe̱to̱an.
Jehe chꞌan mé kjuíchꞌéna chꞌan chjasintajni la xitjahya tsꞌixitoxi̱n.
Chaxín ndoá tꞌe̱tue̱hen Díos ti sin chjasin kuènté chꞌan.
11Chrokocháha jaha nka̱jní la ko kja̱xin chrókócháha jaha chjasintajni.
Jaha nda̱ñao chrókójna̱ la kja̱xin kaín nkehe siín ntiha.
12Tócháha̱ jaha nte̱je̱ la ko kaín nkehe siín ntiha,
kaín inta siín ntiha tsꞌíyato tso̱chéhe̱.
13Tsotsjera kixin ó tsi Itꞌéni Díos tsꞌe̱to̱an.
Chaxín itsi Díos tsꞌe̱to̱an chꞌan,
la jína la ko ndoá tsꞌe̱to̱an chꞌan chjasintajni.
Currently Selected:
Salmos 96: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
