Salmos 94
94
Itꞌéni Díos mé ti juez kuènté chjasintajni
1Itꞌéni Díos, tjáko̱xián
kixin jaha nchekito̱exián ijie̱.
2Jaha mé ti juez kuènté chjasintajni.
Jaha chonta kjuachaxin mé nchekjasóte ti sin nchehnke
la éxi ti ixra̱ nduáhya kjuíchꞌe sin mé xi̱kaha chrókjuacha sin.
3Jaha Itꞌéni, ¿hasta nkesá chrókꞌuixin ti sin ixri ti nti̱a nduáhya?
¿Xá hasta nkesá tsjánjua kjuachaxin na̱xa̱
tso̱chéhe̱ sin?
4Kaín ti chojni nduáhya ixri la,
¿xá hasta nkesá tsonixja sin ti nkehe jínahña?
Imá ihnke kaín ti sin ichꞌe ti nkehe nduáhya.
5Itꞌéni Díos,
ti sin ihnke la nchekꞌitjáña sin ti chjasin kuèntá
la ko nchekjasóte sin ti sin tinkáchónki ti jaha.
6Jehe sin tꞌóñá sin chojnichjin ikꞌán la ko ti chojni
tsíkji̱xi̱n ókjé chjasin
la ko tꞌóñá sin ti chájan nòé.
7Ndáchro sin kixin Itꞌéni Díos la tꞌikonhña chꞌan.
Ti Díos kuènté Jacob la kjá tso̱nínkakonhña, ichro sin.
8Chrokiénxinra jahara, chojni lo̱nti̱.
Jahara chontahyara kjuaxrexinkaon jína,
¿xá hasta nkesá chrókiénxinra?
9Ti nkexro kjuíchꞌéna ti ndátsjonra,
¿á xitjahya chrókuihin ní?
La ko, ¿xá xitjahya chrókꞌuikon
ti nkexro kjuíchꞌéna ti ikonra ní?
10Díos mé nchekjasóte kaín ti chjasin a,
a̱ndá jahara la, ¿á xitjahya sinchekjasóte chꞌan ti jahara ní?
Itꞌéni Díos la ó nohe kaín nkehe la,
¿á chrókónoehña chꞌan kaín ti nkehe nduáhya tjénka̱yáxinra ní?
11 #
1Co. 3:20. *Itꞌéni Díos la nohe nkehe tjenka̱yáxin kaín chojni
la ó nohe kixin kaín tíha la ó chónkó.
12Itꞌéni Díos,
chéhe̱ itjen ti nkexro tjénduéhé jaha
la ko tjákohé ti nkehe kuéto̱an.
13Kixin ti sin a mé kjuaxróxin tsꞌejó sin
ti ó itsi ti ña̱o náxrjónhña.
A̱ndá ti chojni ixri ti nti̱a nduáhya
la ó kꞌóna ijnko tòye̱ tsꞌitjáñaxín sin.
14Itꞌéni Díos la tsíto̱ehya ti sin chjasin kuènté chꞌan
la ko kja̱xin tsíto̱ehya chꞌan jehó
ti sin tinkáchónki ti jehe chꞌan,
mé tsjinki̱tsa chꞌan ti jehe sin.
15Ti sin juez la ndoá sinchekito̱exín sin ti ijie̱ ínaá
la kaín ti sin jína la tso̱chéhe̱ sin.
16¿Xá nkexro chrókꞌuinkatjen
chrókjuinki̱tsa ti jeheni
kixin siín ti sin nínkakohen ti jeheni?
¿Xá nkexro chrókjuinki̱tsa chrókuaáxini?
17Ti chrókjuínki̱tsahyani, jaha Itꞌéni Díos,
la kjá tjoka chrókꞌuen a̱séni.
18A̱ndá jnko naá ndáchroni
kixin chróxratóxin to̱téni,
a̱ndá jaha Itꞌéni la kui̱konoéhéni la kjuínki̱tsani.
19Ti ó imá kóxakoheni
la jaha kjuínki̱tsani,
kjui̱nchechehé a̱séni.
20Jaha la xitjahya tsꞌituan
ti sin nduáhya tꞌe̱to̱an.
Nduáhya nchekito̱exín sin
kixin titekakonhña sin ti ley kuèntá.
21Jehe sin la tónkotsé sin tsjenka̱yáxin sin nkexrín sichꞌe sin,
la tjinkaon sin itsꞌen
ti nkexro chóntahya ninkehó ijie̱.
22A̱ndá jaha Itꞌéni Díos mé kuaáxini.
Jaha Díos tinkáchónkini kixin jaha mé tjínki̱tsa ti jeheni.
23Jaha Itꞌéni Díos mé si̱nchekjasóte ti sin ixri ti nti̱a nduáhya.
Tsꞌitjáñaxín sin ti nkehe jínahña kjuíchꞌe sin.
Jaha Itꞌéni Díos mé si̱nchekꞌitjáña ti sin a.
Currently Selected:
Salmos 94: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
