Salmos 91
91
Ti nkexro tjejó chrínkí itsꞌuan kuènté Díos imá tꞌe̱to̱an
1Ti nkexro tjejó chrínkí ti itsꞌuan kuènté Díos
mé ti kjuachaxin kuènté Díos tsꞌayakohen ti jehe sin.
2Mé ndátjan sin Itꞌéni Díos: “Jaha mé si̱nchekaáni,
jaha mé tꞌayakonhéni,
jaha mé ti Díos tinkáchónkini.”
3Jehó Díos mé sinchekaá ti jaha
kixin nijnko nkehe jínahña chrókꞌuitjáñaxián.
4Díos mé tsꞌayakuaxián chrínkí ti itja chꞌan
la ndá kohya nkehe tso̱han.
Díos la sinchexiteyá ti nkehe tsíndáchro chꞌan
la tsꞌayakohan chꞌan.
5Méxra̱, tóxakuanhña, kjónté ijnko kjuachrakon
chrókꞌuixin ti sítie a
la ko kjónté ti chika flecha chróchrꞌán sin ti ncha̱kotjin
6la ko ni ti ichin tsji̱xi̱n ti sítie
la ko nijnko kjuaxikaon chrókui ncha̱kotjin
chrókꞌuitjáñaxián.
7Kjónté chrókꞌuitsínka ijnko mil chojni ti itjá ikjon
o̱ ite mil chojni chrókꞌuitsínka ti itjá chjina,
kjánchó jaha la kohya nkehe tso̱han.
8A̱ndá jaha la chaxín tsꞌikonxín ikuan
nkehe tso̱hen ti chojni tjenka̱yáxin nkehe jínahña.
9Jaha la tinkachónkia Itꞌéni Díos kixin tsaáxian,
la Díos imá tꞌe̱to̱an la tsjinki̱tsa ti jaha.
10Kohya ninkehó nkehe jínahña tso̱han
la kohya nijnko ichin tsꞌixehen ti ndo̱a,
11 #
Mt. 4:6; Lc. 4:10. *kixin Díos tsochrꞌán ti sin ángel
kuènté chꞌan ti itjen jaha, tsꞌayakohan
kjónté nketí sátsjia.
12 #
Mt. 4:6; Lc. 4:11. *Ti sin ángel la tsjinki̱tsa sin ti jaha la tsotsé sin itjá
kixin ti to̱tá tsóténki̱xinhña ninkehó ixro̱.
13 #
Lc. 10:19. *Kohya kjuachrakon kjónté sáchrókjuia
ti siín koxra̱ jie̱he
o̱ ti siín konche jie̱he kixin jaha chrókuinkátja va.
14A̱ndá ndáchro Itꞌéni Díos:
“Ti nkexro tjue̱he ti janhan la si̱ntakaá chꞌan.
Janhan tsjínki̱tsa ti nkexro a kixin a̱ntsí tsochónta chꞌan kjuachaxin
kixin tinkáchónki chꞌan ni̱ná.
15A̱ndá ti tsꞌéye̱he̱ chꞌan ti janhan la tjoka tsjata̱ha̱
la ko ti kjuaxróxinhña itjen chꞌan la ntiha tsjakꞌé janhan.
Si̱ntakaá chꞌan
la ko tsjikosáyaha̱ chꞌan.
16A̱ntsí si̱ntacháha chꞌan kixin isé tsjakꞌe chꞌan
la ko janhan mé tsotjahá chꞌan ti kjuachón nkochríxín.”
Currently Selected:
Salmos 91: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
