Salmos 85
85
Ti sin Israel tjanchia sin kixin Díos tsi̱konoéhe̱ ti jehe sin
Salmo kuènté xje̱en Coré
1Itꞌéni Díos
jaha imá jína kjuínki̱tsa ti chjasin kuèntá.
Jaha kjuínki̱tsa ikjan ti sin kꞌuaxrjeníxin ti chꞌin Jacob.
2Jaha kꞌóxika ti iji̱é ti sin chjasin kuèntá
la ko kaín ti nkehe jínahña kjuíchꞌe sin.
3Ó kjuixin kóntá kaín ti kjuanínkaon kuèntá
la kuito̱hé ti imá kónínkaoan.
4Díos kuènténi tsaáxini.
Jaha nchekaáni ijie
la í tónínkákuénhñani kaíni.
5¿Á na̱xa̱ tso̱ninkákonhéni nkochríxín ní?
¿Á xi̱kahó chrókónínkákohén kaín ti sin tsinkákꞌaxrjeníxini ní?
6¿Á chrókjuájonhña kjuachaxin ínaá chrókꞌuejóni ní?,
a̱ndá xi̱kaha chrókóchéhe̱ ti sin chjasin kuèntá.
7Tjáko̱xián ti tjue̱héni, jaha Itꞌéni Díos,
la ko nchekaáni.
8Jeheni tsihini ti nkehe tsondáchro Díos
kixin tsondáchro chꞌan tsjajon chꞌan ti kjuaxróxin tsꞌáyéhe̱
ti chjasin kuènté chꞌan
la ko ti sin tinkáchónki ti jehe chꞌan,
kixin ndá jehe sin chrókuíto̱he sin
ti nkehe nduáhya tjenka̱yáxin sin.
9Chaxín ti tsaáxini la chjino itjen,
la tsaá ti sin titekaon,
kixin ti kjuachaxin kuènté Díos la tsjakꞌe ti chjaséni.
10Ti nkehe chaxín la ko ti tjue̱heni la kónoxín,
la ti kjuaxróxin la ko ti nkehe ndoá mé tjejó.
11Ti nkehe chaxín la tsꞌaniá ti chjasintajni
la ko ti nkehe ndoa la nkaya nka̱jní tsji̱xi̱n.
12Itꞌéni Díos mé tsjinki̱tsa tsjajon chꞌan ichrin
a̱ndá ti no̱nte̱eni mé tsꞌóna jína.
13Ti nkehe ndoá mé tsitóxin nti̱a tsochronka.
Tíha mé tsakitjehe ijnko nti̱a ndoá tsi̱xi̱n Itꞌéni Díos.
Currently Selected:
Salmos 85: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
