Salmos 69
69
Díos sinchekaá ti jeheni
Salmo kuènté David
1Nchekaáni jaha Díos kuènténi
kixin ó tetjihini ti ìnta̱.
2Kixin tꞌaniánkíni ti ìnta̱ imá ni̱nka
la í xitjahya tsjisóji̱xi̱ni ti to̱téni,
kixin ó kjuíjini ti sítjiá ìnta̱ imá ni̱nka
la ti ìnta̱ la tjinkaon chrókꞌuátjuákoni.
3Ó tsíkꞌikjehe̱ isini kixin imá tꞌéya̱hani,
la ti isini la imá tjoté.
La ko ti ikoni mé ó tsíkꞌikjehe̱
kixin imá isé chóheni chrókjuáte̱hé,
jaha Itꞌéni Díos kuènténi.
4 #
Sal. 35:19; Jn. 15:25. *Itsjé chojni la nínkakohen sin ti jeheni
kjónté chóntahyani ijie̱;
mé siín a̱ntsí imá itsjé chojni nínkaon ke ti ka̱xi̱héni.
Imá tinkákótsjé ti chojni nínkaon,
la kjónté chaxínhña la tꞌeka sin ijie̱ ti jeheni
kixin tjinkaon sin kixin chrókꞌokje̱nhe̱ni sin nkehe
kjónté chaxínhña kueéheni sin.
5Díos kuènténi, jaha noha kixin áchꞌe nkojín nkehe jínahña kjuíchꞌeni
kixin xitjahya sinchemáhani tíha.
6Itꞌéni Díos, jaha chonta kaín kjuachaxin.
Jeheni la tjinkakonhñani kixin ti sin tinkáchónki ti jaha,
chrókósuéhe̱ sin kixin nkojín nkehe nduáhya kjuíchꞌeni.
Tjinkakonhñani kixin chrókꞌóxrjé a̱sén
ti sin xritjeyá ti jaha, Díos kuènté Israel,
kixin ti ijie̱ tꞌeka chojni ti jeheni.
7Tjasótexíni kixin ti tjue̱heni ti jaha
la imá tósuéhe̱ni.
8Jeheni mé éxi ijnko nkexro chónhña chojni
kjónté ti sin kíchóni la chónhña sin ti jeheni.
9 #
Jn. 2:17;
Ro. 15:3. *Méxra̱ chjioxíni ti ndo̱a kixin tjinkaoni tsꞌayakoheni
la ti ó tꞌándaxíhi̱n sin ti jaha la kja̱xin tꞌándaxíhi̱n sin ti jeheni.
10Tsjánkani la ko niehñani kixin tꞌává a̱séni,
a̱ndá jehe sin la tjanoá sin ti jeheni.
11A̱ndá ti ó tꞌinkáyani ika tié kixin tꞌáváni
la kaín chojni mé tjanoá sin ti jeheni.
12Mé ixri sin tꞌándaxín sin
la ko ti sin tókoan mé tjanoá sin ti jeheni.
13A̱ndá jaha Itꞌéni Díos tꞌéya̱hani,
Díos kuènténi tjinki̱tsani ijie
kixin jaha imá tjue̱héni;
chaxín si̱nchekaáni éxi tsíndáchrua.
14Chrokui̱toéhya kixin chrókꞌuitsínkankíni ti ìnta̱ nche̱tꞌo̱ a.
Nchekaáni kjónté nínkakohen chojni ti jeheni
kixin ti ìnta̱ imá ni̱nka chrókꞌuenxíni.
15Chrokui̱toéhya kixin chrókꞌuátjuákoni ti ìnta̱
la ko chrókui̱toéhya kixin ti ìnta̱ imá ni̱nka
chrókjuinchekꞌitjáña ti jeheni,
la ti tòye̱ chrókꞌuitsínkayáni la chrókꞌuikjèhya ti irꞌua.
16Itꞌéni Díos, tjáte̱hé ti nkehe tjanchahani
kixin jaha mé ti̱konoéhéni nkochríxín.
Ikjan tjinki̱tsani, kixin jaha imá tjue̱héni.
17Tjakꞌeme̱éhñani kixin jeheni ijnko nkexro tꞌaha ixra̱,
kixin imá kjuaxikaon itjeni;
méxra̱ tóxakohan tjoka tjinki̱tsani.
18Xrákia jaha Itꞌéni Díos, tjinki̱tsani;
chrókjui̱nchekaáni kixin chjinaxón siín ti chojni nínkakohen ti jeheni.
19Jaha la ó noha nkexrín tꞌándaxíhi̱n sin ti jeheni
la ijnko kjuatosuéhe̱ kixin xi̱kaha nixja sin, tꞌándaxín sin.
Jaha la ó noha nkexro ti nínkakohen ti jeheni.
20Mé xi̱kaha imá tꞌándaxín sin la imá tꞌává a̱séni.
Í chóntahyani fuerza kixin tꞌáváni.
Méxra̱ tjechóheni kixin chrókui nkojín nkexro
chrókjuinki̱tsa chrókjuinchechéhe̱ ti jeheni
la kohya ninkexró.
21 #
Mt. 27:48; Mr. 15:36; Lc. 23:26; Jn. 19:28, 29. *A̱ndá ti nkehe kjuajon sin sinieni
la tsichjéhe sin veneno kixin chrókꞌuenxíni
la ti ìnta̱ chrókꞌuini la kjuajon sin vino isán.
22 #
Ro. 11:9, 10. *Méxra̱ ti nkehe sinie sin ti kia
la ko kaín ti nkehe náxrjón chónta sin
mé chrókꞌuitjáñaxín sin.
23Jaha Díos, chrókjui̱nchentakótán sin
la ko chrókjui̱nchexrànka to̱té sin.
24Tjáko̱xián ti kjuanínkaon kuèntá,
nchekjasótexián sin
Chrokjui̱nchekjasóte sin kixin ti ijie̱ chónta sin.
25 #
Hch. 1:20. *A̱ndá ti ndo̱e sin mé chrókjan chrókꞌóna nte̱je̱;
la ninkexró tso̱kohya ti kuékꞌejó sin.
26Mé xi̱kaha tso̱hen kixin jehe sin chréhe̱ sin ti chojni kjui̱ncheníhí
la tjanoá sin kixin ti kjuatjoté tsíkjánjua jaha.
27A̱ndá ti ijie̱ kuènté sin mé nchekjasótexián sin
la í chrókui̱konoéhña sin.
28 #
Ex. 32:32; Ap. 3:5; 13:8; 17:8. *Tꞌóxika ihni̱é ti chojni tjenka̱yáxin nkehe jínahña
kixin tsochóntahya ihni̱é sin ti libro
kꞌuínixín ihni̱é ti chojni tsochónta kjuachón,
la tso̱kohya ihni̱é ti sin nduáhya ixri ti tjejó ihni̱é ti sin jína.
29A̱ndá jeheni mé nóani la ko níhini;
méxra̱ nchekaáni, jaha Díos kuènténi.
30Jeheni mé tsotsjeni tsjikosáyexíni ti ihni̱á jaha, Itꞌéni Díos,
la ko tso̱chéhe̱ni ti tsjikosáyeheni ti jaha.
31Ti tsjikosáyahani mé a̱ntsí imá tóxríhan jaha, Itꞌéni Díos,
a̱ndá kanhñó chrókóxríhan ti chrókꞌóñáni ijnko koxinta o̱ ijnko koxintáxjan chónta ntèé la ko kjoto̱té
ndá tíha chrókjuajoni.
32Tsꞌikon ti chojni nóa kixin nkexrín tsjikosáyeheni ti jaha,
a̱ndá tso̱chéhe̱ sin,
la tso̱chéhe̱ a̱sén ti nkexro xritjeyá Díos.
33A̱ndá Díos mé tjetihin ti nkehe ndáchro ti chojni nóa,
la tꞌitjáñehña chꞌan ti chojni tjejóchjina
tinkáchónki ti jehe chꞌan.
34Méxra̱ ti nkehe siín nka̱jní la ko chjasintajni
la ti nda̱ñao
la ko kaín nkehe siín
chrókjuikosáyehe Itꞌéni Díos.
35Kixin Díos mé sinchekaá ti sin chjasin Jerusalén
la ko sichꞌéna chꞌan ni̱xin ti chjasin kuènté Judá
landá itsjé chojni tsꞌejó sin ntiha.
36A̱ndá ti xje̱en ti sin chꞌehe Díos ixra̱ mé
tsi̱to̱nhe̱n sin ti chjasin ntiha.
Kaín ti sin tjue̱he ti ihni̱é chꞌan
mé tꞌáyéhe̱ sin ti nonte la ntiha tsꞌejó sin.
Currently Selected:
Salmos 69: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
