Salmos 40
40
Díos la sinchekaá ti jeheni
Salmo kuènté David
1Ó noheni kixin Díos tsjinki̱tsa ti jeheni,
kixin kjuáte̱he chꞌan ti ó kꞌuéye̱he̱ni chꞌan.
2La kuakitsjexín chꞌan ti jeheni
ti tòye̱ chrókꞌuitjáñaxíni,
la ko ti siín nche̱tꞌo̱ tꞌañankí chojni.
Ndá kjuakꞌe chꞌan to̱téni chritaón itjo̱,
la kjuínki̱tsa chꞌan kixin jína tsjakꞌeni.
3Kjuajon Díos ijnko canto ni̱xin tsotsjeni
kixin tsochjéheni chꞌan kjuasáya,
la nchónhña chojni tsꞌikon tíha la tsochrakon sin
la tsitekaon sin Itꞌéni Díos.
4Kjuaxróxin tjejó ti nkexro tinkáchónki Itꞌéni Díos
la tóxrìe̱nhña sin ti chojni nchehnke
la ko chrèhya sin ti nkehe tsíkjano̱ña.
5Jaha Itꞌéni Díos, nchónhña nkehe náxrjón kjuáko̱xián,
la ko imá tjénka̱yáxian ti jeheni.
Tsjachahyani tsꞌekini kaín ti kjuaxroan kjuásian.
Kixin ti tjinkaoni chróchronkani kaín tíha,
la tsjachahyani kixin itsjé kjuaxroan kjuáko̱xián.
6 #
He. 10:5-7. *Jaha la tóxríanhña tsꞌayéhé ti iko itsꞌen
la ko ti íso nkehe tsjajoni.
Jaha la kjuanchahya ti iko tsochján
kixin chrókjuìinxín ti ijie̱ chóntani.
7Méxra̱ ndáchroni: “Ntihi itjeni”,
éxi ndáchro ti xroon tsíkjin sin ósé
chronka nkexrín tso̱heni.
8Jeheni mé tóxríhi̱ni sinchexiteyáni
éxi tóxrínhan, jaha Díos kuènténi.
Ti ley kꞌuéto̱an mé chóntani nkaya a̱séni.
9Méxra̱ chrónkani kixin jína jaha
ti tónkotsé nchónhña chojni.
Jaha Díos, ó noha kixin kuíto̱ehyani nixjani.
10Jeheni la kjuínchemáhñani,
chrónkani nkexrín jína jaha,
chrónkani kixin jína jaha la ko nchekaá chojni.
Ti tsíkónkotsé itsjé chojni la kjuínchemáhñani kixin imá tjue̱hé chojni,
la ko chrónkani kixin jaha níxja ti nkehe chaxín ndoá.
11Jaha, Itꞌéni Díos, ti̱toéhya ti ti̱konoéhéni
kixin ti tjue̱héni la ko ti nkehe chaxín kuèntá mé tꞌayakohen ti jeheni.
12Kixin nchónhña nkehe jínahña kóheni
la hasta í tjachahyani tsꞌekini.
Ó kjuacha ti ijie̱ la í tꞌikonhñani jína.
A̱ntsí itsjé ti ijie̱ kjuasini ke ti ka̱xi̱héni
la imá kꞌóxrjé ti a̱séni.
13Itꞌéni Díos, xrja̱noáhá chrókjui̱nchekaáni.
Itꞌéni, xrákia tjoka tjínki̱tsani.
14Kixin chrókósuéhe̱ ti chojni nínkaon
la chrókjuachahya sin.
La kaín ti sin xritjeyá ti jeheni kixin tjinkaon sin
chrókjuinchekꞌitjáña sin ti jeheni la chrókósuéhe̱ sin, sáchrokjui sin
kixin tjenka̱yáxin sin sichꞌe sin ti nkehe jínahña.
15Ti sin tjanoá ti jeheni
la chrókósuéhe̱ sin sáchrokjui sin.
16A̱ndá tso̱chéhe̱ kaín ti sin tjeyá ti jaha,
la ko ti sin tjinkaon tsaá, la nkochríxín tsondáchro sin
kixin ijié ti kjuachaxin kuèntá, jaha Itꞌéni Díos.
17Kjónté nóaxi̱n itjeni, tꞌáváni
la jaha Itꞌéni Díos mé tꞌitjáñahña ti jeheni;
jaha la nkochríxín tjínki̱tsani la nchekaáni.
Méxra̱ Itꞌéni Díos, tjoka chrókjuínki̱tsani.
Currently Selected:
Salmos 40: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
