Salmos 18
18
Ijnko nkexro tꞌe̱to̱an chjéhe Díos kjuasáya
Salmo kuènté David
1Itꞌéni Díos, jaha mé tánjua fuerza;
méxra̱ imá tjue̱heni ti jaha.
2Jaha mé tꞌayakonhéni la tjínki̱tsani la ko nchekaáni.
Díos kuènténi, jaha mé ti ixro̱ ijié kjuákꞌemáxini kixin tsaáni,
la ko jaha mé tjínki̱tsani kixin kohya nkehe tso̱heni.
Jaha mé chonta kjuachaxin si̱nchekaáni.
Jaha mé kjuákꞌemáxini kixin ti kjuachaxin ijié chonta.
3Itꞌéni Díos, jaha ti tsꞌayéhé kjuasáya,
kixin jaha si̱nchekaáni la tsjachahya ti sin nínkaon
sinchekꞌitjáña ti jeheni.
4Ti kjuachaxin kuènté kjuachꞌén mé kua̱ntátjen ti jeheni
éxi ijnko ihno̱ kꞌuísímáni.
Ndá chrakoni kixin xi̱kaha chrókꞌuitjáñaxíni.
5Éxi ijnko ihno̱ kꞌuísímáni
ndá xi̱kaha chrókꞌuenxíni.
6Imá kóxakoheni, ndá kꞌuéye̱he̱ni Itꞌéni Díos,
kꞌuéye̱he̱ni ti Díos kuènténi la kuíhin chꞌan ti itjen chꞌan nkaya nka̱jní.
¡Ti kꞌóyakoni mé kuíhin chꞌan!
7Ndá xrína̱hña imá kꞌuínki nonte,
sítꞌinki ti ijna̱
kixin imá kónínkaon Itꞌéni Díos.
8La ti xrito chꞌan mé kꞌuaxrjexín ihnchi
la ko ti irꞌua chꞌan mé kꞌuaxrjexín xrohi tsꞌitjáñaxín nkehe
la ko kꞌuaxrjexín xrinta síchrꞌákjen xrohi.
9Ndá ti nka̱jní la xitje̱he̱ la kꞌuinkajin Itꞌéni Díos,
la chrínkí to̱té chꞌan siín itji̱ tié.
10Ndá kjuákꞌekjen Díos ti ángel
la éxi xri̱nto̱ kjuaká chꞌan.
11Mé kꞌuixitie la í noxínhña itjen chꞌan
kixin siín nchónhña itji̱ tié chónta ichrin.
12Ti itjen Itꞌéni Díos la ti kjuachaxin kuènté chꞌan
la sítjónkíxín la tꞌinkaséñani ti itji̱
la kꞌuaniá toni la ko xrinta síchrꞌákjen xrohi.
13Kjónta ti nka̱jní kixin níxja Itꞌéni Díos imá tjetoan,
ndá xrína̱hña kꞌuaniá toni la ko xrinta síchrꞌákjen xrohi.
14Ichrꞌán Díos ti sítjónkíxín éxi flecha,
ndá ti sin nínkaon la chrakon sin, xika sin, sákjuí sin.
15Ndá kónoxín ti nonte chrínkí ti nda̱ñao
la ko ti tsíxrankíxixín chjasintajni,
kixin imá itsen níxja Itꞌéni Díos.
16La kjónté nka̱jní itjen chꞌan la kjuínchekaá chꞌan ti jeheni.
Ti itja chꞌan kuakítsjenkixín chꞌan ti jeheni ti nda̱ñao ni̱nka.
17Kjuínchekaáxin chꞌan ti jeheni ti siín ti chojni jie̱he nínkaon.
Tjenka̱yáxin sin imá chónta sin kjuachaxin ke ti jeheni.
18Itsé sin ti jeheni ti ña̱o tꞌáváni,
kjánchó Itꞌéni Díos kjuínki̱tsa ti jeheni.
19Kjuínki̱tsa chꞌan kꞌuaxrjexíni ti kjuaxikaon siín.
Kjuínchekaá chꞌan ti jeheni, kixin tjue̱he chꞌan ti jeheni.
20Xi̱kaha kjuínchekaá Itꞌéni Díos ti jeheni
kixin kóxríhi̱n chꞌan kixin jína titekaoni.
21Kixin jeheni chréhe̱ni ti nti̱e chꞌan
la nkochríxín kuíto̱ehyani ti Díos kuènténi.
22Jeheni la titekaoni kaín ti nkehe tsíndáchro chꞌan
la kuíto̱ehyani ninkehó ti nkehe tsíkꞌe̱to̱an chꞌan.
23Jína kjuínchexiteyéheni chꞌan
la ko kuíto̱heni ti nkehe jínahña.
24Mé xi̱kaha Itꞌéni Díos kjuínki̱tsa chꞌan ti jeheni
kixin tjetsjehe chꞌan kixin kohya ijie̱ kjuasini.
25Jaha, Itꞌéni, chaxín jína jaha la tjínki̱tsa ti nkexro jína.
Méxra̱ nchekjasótehya ti nkexro chóntahya ijie̱.
26Jína jaha, la tjínki̱tsa ti nkexro jína.
A̱ndá nchekjasóte ti nkexro jínahña.
27Jaha nchekaá ti sin nóaxi̱n tjejó,
a̱ndá nchentsía ti sin tjenka̱yáxin kixin imá nohe.
28Jaha, Itꞌéni Díos, nchekꞌákjen ti lámpara kuènténi.
Jaha, Itꞌéni, nchekꞌinkaséña ti sítie itjeni.
29Ti kjuachaxin kuèntá mé tsjinki̱tsa tsjajo̱nkoni itsjé ti sin soldado,
la ko tsjinki̱tsani kixin tsochrikajiteni ti tja̱tꞌo̱ tinkákuénxin chjasin.
30Ti nti̱a kuènté Itꞌéni Díos la imá ndoá;
la ko ti nkehe ndáchro chꞌan la chaxín tsoxiteyá.
Tꞌayakohen chꞌan ti nkexro tinkáchónki ti jehe chꞌan.
31Jaha Itꞌéni Díos, jahuá mé ti Díos kuènténi.
Jahuá ti tsjacha tsꞌayakohéni.
32Ti Díos i mé tjajon fuerza.
Jehe chꞌan mé tjajon chꞌan ijnko nti̱a ndoá.
33 #
Hab. 3:19. *La kjuíchꞌéna chꞌan to̱téni éxi to̱té koxi̱jna̱
kixin jína sátsji̱ni chritaón ijna̱.
34Jehe chꞌan mé tjinki̱tsa chꞌan kixin tsjachani tsjajo̱nkoni ti chojni nínkaon.
La tsjajon chꞌan fuerza kixin tsꞌitji̱a̱ni ti arco kuènté flecha iye.
35Jaha mé kꞌuayakohéni la ko kjui̱nchekaáni.
Ti itjá chjina mé kjuínki̱tsaxiáni.
Kjuasáyá kjuínki̱tsani la kjuachani.
36Jaha mé kjui̱ncheteka ti nti̱a kuènténi
kixin tsoxrátóxinhñani.
37Chréhe̱ni ti sin nínkakohen ti jeheni la kjuachani itséni sin.
Ndá kjanhñani hasta kjuínchekꞌitjáñani ti jehe sin.
38Kjuínchekueni sin la í tsꞌayahya sin,
kꞌuitsínka sin chrínkí to̱téni.
39Jaha, kjuánjua fuerza kixin kjuachani kjuajo̱nkoni ti sin nduáhya tjejó,
ti sin nínkaon la ikjan sin, chrónoéhe̱ sin ti jeheni.
40Ti itjeni mé kuinkáxin ti sin nínkaon,
ndá xi̱kaha kjuachani kjuínchekꞌitjáñani ti kjuachaxin
kꞌuéchónta ti sin nínkaon.
41Kjuanchia sin nkexro tsjinki̱tsa
la ninkexró kjuínki̱tsahya ti jehe sin.
Kjónté kꞌuéye̱he̱ sin Díos la kjuáte̱hya chꞌan.
42Kjuínchekueni sin, la kꞌóna sin éxi inche sákjuíko xri̱nto̱;
la nkátjani sin éxi nche̱tꞌo̱ siín nti̱a.
43Jaha, kjui̱nchekaáni ti tjejó ti sin jie̱he.
Jaha kjuánjua kjuachaxin tsꞌe̱to̱ani itsjé chjasin
la ti chojni chónhñani la kjuíchꞌehe sin ixra̱ ti jeheni.
44Kuíhin sin la kuitekakohen sin ti jeheni;
kjónté ti sin tsíkji̱xi̱n ókjé chjasin la titekaon sin.
45Ti chojni tsíkji̱xi̱n ókjé la chrakon sin,
síxrànka̱ sin tꞌaxrjexín sin ti tjejómá sin.
46Itꞌéni Díos mé tjechón, ¡kjuasáye chꞌan kixin tjinki̱tsa chꞌan ti jeheni!
¡Ti Itꞌéni imá tꞌe̱to̱an mé tsaáxini!
47Itꞌéni Díos mé kjuínchekjasóte chꞌan ti sin kjuíchꞌe ti nkehe jínahña;
a̱ndá ijie kꞌue̱to̱an chꞌan kixin tsitekakohen sin ti jeheni.
48Jaha mé kjui̱nchekaáni
kjónté nínkakohen chojni ti jeheni.
Ti sin nínkaon kꞌuínkatjen,
la jaha Itꞌéni Díos, kjui̱nchekaáni, kjónté siín chojni jie̱he.
49 #
Ro. 15:9. *Méxra̱ ijie tjikosáyahani, Itꞌéni Díos
ti tjejó ti sin titekakonhña.
Méxra̱ itsjeni la tjikosayéheni ti ihni̱á.
50Jaha la imá kjuínki̱tsa kixin tsjacha ti rey kjuéyá
la ko nkochríxín tjue̱hé David la ko ti sin kꞌuaxrjeníxin chꞌan.
Currently Selected:
Salmos 18: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
