Salmos 17
17
David nixje̱he̱ Itꞌéni Díos
Salmo kuènté David
1Itꞌéni Díos, tihín kixin ndoá ti nkehe tjanchiani,
tjínki̱tsani ti ó tꞌéyani.
Tjakꞌe tihín ti nkehe chrónòani,
kixin irꞌuani la tꞌaxrjexínhña ninkehó kjuachꞌia.
2Jaha ó noha kixin kohya ijie̱ chrókjuasótexíni
kixin jaha la tsjehé kixin jína xritjakꞌeni.
3Jaha la noha nkehe tjenka̱yáxin a̱séni;
ti ó tie la jaha tjetsjehé ti jeheni.
Jaha tsjehé ti a̱séni la ko noha kixin
kohya nkehe jínahña kjuíchꞌeni
la ninkehó nkehe jínahña nixjahyani
4éxi nixja ti íso chojni.
Jeheni kuíto̱heni nti̱e ti sin tjenka̱yáxin nkehe jínahña
la kjuínchexiteyáni éxi kuéto̱an.
5Jeheni la a̱ntsí jína chréhe̱ni ti nti̱a kuèntá,
la ninkehó kuíto̱ehyani ti nti̱a.
6Itꞌéni Díos, jaha tꞌéya̱hani, kixin tjáte̱hé;
chrókjuákꞌe chrókuihín ti nkehe tjanchiani.
7Tjáko̱xián nkexrín imá tjue̱hé ti jeheni.
Jaha mé tjínki̱tsa kaín ti chojni titekaon ti jaha
ti ó siín chojni nínkakohen ti jehe sin.
8Tꞌayakonhéni éxi tꞌayakohén ti ikuan.
Tjakꞌèmáni chrínkí tsꞌueén ti itjá,
9kixin ti sin tjenka̱yáxin nkehe jínahña la tjinkaon sin
chrókjuinchekjasóte sin ti jeheni,
la nínkaon sin xritjeyá sin ti jeheni.
10A̱ntsí kꞌuánkí ti kjuanínkaon kuènté sin
la ihnke sin tꞌándaxíhi̱n sin ti jeheni.
11Chréhe̱ sin chjinaxón ti xritjakꞌeni;
la tjinkaon sin chrókjuáka̱ sin nonte ti jeheni.
12Jehe sin la éxi koxra̱ xritjeyá nkehe sinie,
éxi ijnko koxra̱ jie̱he tjemá kixin tsꞌóñá ti jeheni.
13Tꞌínkatjen, tjinki̱tsani, Itꞌéni Díos.
Jaha chrókuéto̱an chrókꞌuejóxin tochꞌin ti sin tjenka̱yáxin nkehe jínahña,
la ko ti espada kuèntá mé chrókjui̱nchekaáxiani.
14Ti kjuachaxin kuènté itjá chrókjui̱nchekaáxiani kixin nínkaon sin.
Xrákia tsjinki̱tsani, nchekaáni kixin ti chojni nduáhya tjenka̱yáxin.
Mé jehó tjenka̱yáxin sin ti nkehe siín chjasintajni
la ntihó itjen ti nkehe tsjacha sin
la ti nkehe chónta sin mé tsíto̱eko ti xje̱en sin la ko ti ìnté sin.
15A̱ndá jeheni la chaxín tso̱chéhe̱ni
kixin tsꞌikoni ti jaha ti ó tsoxechóni.
Currently Selected:
Salmos 17: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
