Salmos 145
145
Kaín chojni tsjikosáyehe sin Díos
Salmo kuènté David
1Tsochrónkani kixin, jaha Itꞌéni Díos, imá chonta kaín kjuachaxin,
jaha mé Díos kuènténi la ko Rey kuènténi.
Tjikosáyahani ti ihni̱á nkochríxín.
2Kaín ña̱o tsjikosáyahani.
Tsjikosáyaxíni ti ihni̱á nkochríxín.
3Jaha Itꞌéni Díos, imá ijié ti kjuachaxin chonta;
jahuá mé chrókꞌuayehé ti kjuasáya.
Tsjachahyani tsienxíni kaín ti kjuachaxin chonta.
4Ti itꞌé ti chájan tsochenka ti xje̱en sin
ti ixra̱ tsíkji̱chꞌe, jaha Itꞌéni Díos.
Tsochenka sin kaín ti kjuaxroan tsíkji̱chꞌe jaha.
5Tsonixja sin kixin ti kjuachaxin kuèntá
la imá náxrjón
la ko jeheni kja̱xin nkochríxín tsoxraxinkaoni ti kjuaxroan ijié
kjuásian jaha.
6Kaín chojni tsonixja ti kjuaxroan imá ijié tsíkjasian
la jeheni tsochronkaxíni ti kjuachaxin kuèntá.
7Tsondáchro sin kixin imá jína ti jaha
la ko tsochronka sin ti nkehe jína tsíkjáko̱xián.
8Itꞌéni Díos, jaha la imá jína
la ko jaha imá ti̱konoéhé chojni
la ko tjokahya tónínkaoan
kixin imá tjue̱hé ti jeheni.
9Jaha la jína, Itꞌéni Díos, la tjínki̱tsa kaín chojni
la ko tꞌayakohén kaín ti nkehe kjui̱chꞌéna.
10Kaín nkehe kjui̱chꞌéna jaha chrótja̱ha kjuasáya
la ko kaín chojni tinkáchónki ti jaha chrókjuikosáyaha.
11Chróchronka sin ti kjuachaxin tétua̱nxián
la ko chrónixja sin ti ixra̱ ijié kjui̱chꞌe jaha.
12Kixin ndá chrókónohe kaín chojni
kaín ti ixra̱ ijié kjui̱chꞌe jaha
la ko kjuachaxin ijié této̱anxián.
13Ti kjuachaxin kuèntá la nkochríxín tsjeje̱hya.
Ti kjuachaxin kuèntá la tꞌe̱to̱an nkochríxín.
14Itꞌéni Díos, jaha tjínki̱tsa ti sin kꞌuitsínka
la ko ti sin náxrjónhña tjejó
la ko tjínki̱tsa tsꞌinkatjen ti sin tsíkꞌóxrjé a̱sén.
15Kaín chojni tjejótsjehe sin ti jaha
kixin jaha tsochje̱hé sin nkehe sinie sin.
16Taki̱tjehé itjá kixin
chrókjui̱ncheña̱oan kaín chojni tjejóchón.
17Itꞌéni Díos, jaha la jína la ko ti nti̱a kuèntá la ndoá
la ko kaín ti ixra̱ tsíkjichꞌe la jína tíha.
18Itꞌéni Díos, jaha la chjino itjen ti tjejó ti sin tsꞌeya̱ha
la ko jaha tjínki̱tsa ti nkexro kaín a̱sén nixja̱ha.
19Jaha sinchexiteyá ti nkehe tjinkaon ti sin tjiko̱sáyaha.
Jaha tihín ti tꞌéya sin la si̱nchekaá ti jehe sin.
20Itꞌéni Díos, jaha la tꞌayakohén kaín ti sin tjua̱ha.
A̱ndá ti sin tjenka̱yáxin ti nkehe jínahña la jaha si̱nchekꞌitjáña sin.
21Irꞌuani tsjikosáyaxian jaha, Itꞌéni Díos
la ko kaín chojni chrókjuikosáyehe ti ihni̱á
ijie la ko nkochríxín.
Currently Selected:
Salmos 145: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
