Salmos 144
144
Chjéheni Díos kjuasáya kixin jína chrókjuákꞌe jeheni
Salmo kuènté David
1Jína itjen jaha ti Díos tsaáxini.
Jaha tjínki̱tsa ti itjani
kixin tsjachani tsjajo̱nkoni ti chojni nínkakohen ti jeheni.
2Jaha mé jína tjue̱héni
jaha mé tsjínki̱tsa ti jeheni.
Jaha mé éxi ijnko tja̱tꞌo̱ noi tsaáxini.
Jaha mé tjínki̱tsa kixin
tsjachani tsꞌe̱tue̱heni chjaséni.
3 #
Job 7:17, 18; Sal. 8:4. *Jaha, Itꞌéni Díos,
¿xá nkexro ti chojni kixin jaha imá tꞌayakohén sin?
O̱, ¿xá nkexro ti chojni kixin jaha imá xraxinkaoan sin?
4Ti chojni la éxi ijnko tsꞌáváxin ó.
Ti ña̱o chónta sin la éxi chrókꞌuatsínka ijnko itsꞌuan ó.
5Itꞌéni Díos,
jaha taki̱tjehé ti nka̱jní la tꞌinka̱jian
la ko takóxian ti ijna̱ kixin ndá tsꞌaxrje ihnchi.
6Jaha mé ichrꞌan ti tsjo̱nkíxín éxi ijnko flecha kuèntá xi̱kaha
a̱ndá ti sin nínkakohan la chrókuinká sin sáchrokjui sin.
7Tjéndoá itjá ndesi ti nkaya nka̱jní,
sinchekaáni tsakítsjexiáni ti tjiá nchónhña ìnta̱
la ko tsjinki̱tsani kixin tsjachahya ti chojni
tsíkji̱xi̱n ókjé chjasin.
8Ti irꞌua sin la síkaón kjuachꞌia,
Tja̱ya̱ itja sin chjina tꞌákje̱xi̱n sin Díos,
kjánchó nchexiteyáhya sin kaín ti nkehe ndáchro sin.
9Jaha, Itꞌéni Díos,
tsotsjeni ijnko isón ni̱xin
tsjikosáyaxiáni.
Jeheni tsotsjeni la ko itsꞌini ti isón salterio.
10Jaha kjuínki̱tsa ti sin rey la kjuacha sin
la jaha mé kjuínki̱tsa ti rey David,
ti nkexro tꞌaha ixra̱,
la kꞌuénxinhña chꞌan ti chika espada.
11Nchekaáni kixin kohya nkehe
sichꞌe ti chojni tsíkji̱xi̱n ókjé.
Ti irꞌua sin la síkaón kjuachꞌia,
Tja̱ya̱ itja sin chjina tꞌákje̱xi̱n sin Díos
kjánchó nchexiteyáhya sin kaín ti tsíndáchro sin.
12Jaha tjínki̱tsa kixin ti xje̱eni chrókꞌuánkí
éxi katsjo tsíkꞌánkí jína,
la ti xje̱eni chjin la chrókꞌóna
éxi ijnko columna náxrjón
tsíkꞌóna ti esquina tja̱tꞌo̱ ni̱nko.
13Ti nchia tꞌe̱nka̱chji̱nayáni noa la chrókaónxin
kaín clase noa chróchóntani
la ko ti iko chóntani la chrókótsjé va,
la imá chrókꞌuánkí va,
la nchónhña iko chrókꞌuixin ti nonte kuènténi.
14Ti koxi̱nte̱eni chróchónta itsjé xje̱en va
la kohya nkexro chrókueé ti jeheni sáchrokjuikoni ókjé
la ko kohya nkexro chrókꞌoyako chróchronka
kixin siín kjuaxikaon ti nti̱a kuènténi.
15Náxrjón ti chjasin chónta kaín tíha
la ko náxrjón ti chjasin tinkáchónki ti jaha, Itꞌéni Díos.
Currently Selected:
Salmos 144: poeNTplus
Highlight
Share
Compare
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
