Santiago 2

Nkokón chrókjuikosáyeheni kíchóni

1Kíchóni, jahara nkokón chrókjuíkosáyehéra kaín chojni, ti chaxín tinkachónkira Ìnchéni Jesucristo chónta kaín kjuachaxin. 2Tjénka̱yáxinra; ti chrókꞌuixehen ijnko chojni rico ti tónkotséra, la chónta chꞌan kochꞌa̱ninko oro la ko chrꞌinkáya chꞌan ika náxrjón, ndá kja̱xin chrókꞌuixehen ijnko chojni nóa chrꞌinkáya ika ntaxin, 3a̱ndá ti chrókjuíkosáyehéra ti nkexro rico chrꞌinkáya ika jína, la chróndáchera chꞌan: “Jaha la tjakꞌétja̱xian ntihi”, a̱ndá ti chojni nóa la chróndáchera chꞌan: “Jaha la tjakꞌexián to̱tá méhe̱ o̱ tjakꞌétja̱xian nonte ó.” 4A̱ndá ti xi̱kaha si̱chꞌera, la nkokónhña tjikosayehéra kichuara la nduáhya tjénka̱yáxinra.

5Kíchóni, chrókuihínra tíhi: Díos tsíkjeyá ti sin nóa ntihi chjasintajni kixin a̱ntsí chrókuinkáchónki sin chꞌan la tsꞌáyéhe̱ sin ti kjuachaxin kuènté chꞌan éxi tsíndáchro chꞌan tsꞌáyéhe̱ kaín ti sin tjue̱he ti jehe chꞌan. 6A̱ndá jahara tjíkosayéhyara ti sin nóa, a̱ndá ti sin rico mé tjíkosayehéra. ¿Á jehya ti sin rico ti tjanchia sin ijie̱ sátjiko sin ti jahara ti tjejó ti sin tꞌe̱to̱an ní? 7¿Á jehya jehe sin ti tꞌándaxíhi̱n sin ti ihni̱é Cristo tinkáchónkini ní?

8 # Lv. 19:18. *A̱ndá jahara, ti chaxín nchexiteyára éxi tꞌe̱to̱an ti ley, éxi nixja ti xroon itén Díos ndáchro: “Chrotjue̱héra kichuara éxi tju̱éxinra a̱sánra”, la jína tjejonchexiteyára. 9A̱ndá ti nkokónhña tjíkosayehéra chojni, la tjásinra ijie̱ kixin nchexiteyáhyara éxi kꞌue̱to̱an Díos. 10A̱ndá ijnko nkexro titekaon kaín ti ley ndá kjuínchexiteyáhya ijnko nkehe, la mé chónta ijie̱ kixin kjuínchexiteyáhya kaín ti nkehe tꞌe̱to̱an ti ley. 11#Ex. 20:14; Dt. 5:18; Ex. 20:13; Dt. 5:17.*Kixin ti Díos tsíndáchro: “Chrokjuásinkoáhyara ijie̱ ijnko chojnichjin jehya ichjiánra”, la kja̱xin tsíndáchro: “Tꞌoñáhña kichuara.” A̱ndá ti nkexro kjuasinkohya ijie̱ ijnko chojnichjin, kjánchó kjuaya sin, la kjuínchexiteyáhya sin kaín ti nkehe tꞌe̱to̱an ti ley. 12Méxra̱ jahara jína chrónixjara la ko jína chrókjuáko̱xinra kixin ó nohara kixin Díos mé tsotsjehe á jína kuitekáonra ti itén chꞌan chrókuaáxini. Ndá ti náhí, la jehe chꞌan tsjanchia chꞌan ijie̱. 13A̱ndá ti tsi̱konòehñani kíchóni, la Díos kja̱xin tsi̱konòehña ti jeheni. A̱ndá ti tsi̱konoéhe̱ni kíchóni, la tsjachani tsꞌejóni jína ti ña̱o tsito̱exín iji̱é chojni.

Ti fe la ko ti ixra̱

14Kíchóni, ¿xá nke tso̱hen ti nkojinra tsondáchrora kixin tinkachónkira Díos, a̱ndá ninkehó nkehe jína tjáko̱xinhñara? ¿Á chrókjuacha chrókuaáxinra ti xi̱kaha ní? 15Chrokjuénka̱yáxinra tíhi: Ti chrókꞌuíkonra nkojín kíchóni ndoa o̱ kíchóni ichjin chóntahya iké o̱ chóntahya nkehe sinie, 16ndá jahara chróndáchera sin: “Sátjia nkojína la tꞌitsa̱ ika la ko inte jína”, a̱ndá ti kjuájonhñara ti nkehe tichánxi̱hin sin la ó chónkó ti nkehe ndáchrora. 17Mé xi̱kaha tso̱hen ti tinkachónkira Díos, ndá tjáko̱xinhñara ninkehó nkehe jína, la ti tinkachónkira Díos la éxi ijnko nkehe tsíkꞌen tíha.

18A̱ndá ti nkojín nkexro chróndáchro: “Jaha tinkachónkia Díos, a̱ndá janhan itꞌa̱ ti ixra̱ jína.” Tjáko̱xián ti tinkachónkia Díos kjónté chꞌehya ti xra̱ jína, la janhan tsjáko̱xia̱n ti tinkachónkia Díos kixin ti ixra̱ jína tjétꞌa̱. 19Jaha titekaoan kixin nkoko̱a Díos itjen, la jína tíha, kjánchó kja̱xin ti Jínahña titekaon kixin nkoko̱a Díos itjen la síxrànka̱, chrakon. 20Tꞌónahña ijnko chojni lo̱nti̱, kixin chróndáchrua kixin chaxín tinkachónkia Ìnchéni la chrókjuákoxian ti nkehe jína, ndá ti náhí, la ti tinkachónkia la éxi nkehe tsíkꞌen tíha. 21#Gn. 22:1-14.*Díos tsíndáchro kixin chaxín jína ti chꞌin Abraham, ti nkexro kꞌuaxrjeníxini ósé, kixin kjuínchexiteyá chꞌan ti nkehe kjuanchia Díos la chrókꞌóñá chꞌan ti xje̱en chꞌan Isaac chrókꞌuáyéhe̱ Díos. 22Chrókónoha kixin ti kuitekaon Abraham Díos la kjua̱ko̱xi̱n chꞌan kixin ti ixra̱ jína kjuíchꞌe chꞌan, la xi̱kaha chaxín kuitekaon chꞌan Díos. 23#Gn. 15:6; 2Cr. 20:7; Is. 41:8.*Mé xi̱kaha xiteyá ti ndáchro xroon itén Díos: “Abraham kuitekaon Díos la xi̱kaha ndáchro Díos kixin jína chꞌan”, mé xi̱kaha ndáchro Díos kixin Abraham mé amigo kuènté chꞌan.

24Mé xi̱kaha chrókónoha kixin Díos nchetjóá ti chojni kixin ti ixra̱ jína ichꞌe sin, la jehya kixin jehó chrókuitekaon sin chꞌan. 25#Jos. 2:1-21.*Mé xi̱kaha kóhen ti tjan Rahab, ti tjan kꞌuéchónta itsjé chojnindoa. Díos la kjuínchetjóá ti jehe tjan kixin kjuajon tjan kjuachaxin kuíto̱he ti sin israelita ndo̱e tjan ti kjuíjitsjehe sin chjasén tjan, la kjuínki̱tsa tjan sákjuixin sin ókjé nti̱a. 26Mé xi̱kaha éxi ti cuerpo chóntahya ncha̱kuén la tsíkꞌen, mé xi̱kaha ti titekaoni la tsíkꞌen ti ninkehó ixra̱ jína tja̱ko̱xi̱nhñani.

Currently Selected:

Santiago 2: poeNTplus

Highlight

Copy