Hebreos 7

Jesús mé ncha̱tꞌá éxi kꞌuékjakꞌe Melquisedec

1 # Gn. 14:17-20. *Melquisedec mé kꞌué rey kuènté chjasin Salem la ko ncha̱tꞌá kuènté Díos itjen nkaya nka̱jní. A̱ndá Abraham ti ó kja̱nxi̱n ti kjuajo̱nko ti sin rey, ndá Melquisedec la kjuixíhín chꞌan nti̱a Abraham la kjuíncheñao chꞌan kixin kjuacha chꞌan. 2A̱ndá Abraham la kjuajon chꞌan ti te̱xi̱n parte ti nkehe tsíkjacha chꞌan ti tsíkjikjajo̱nko chꞌan ti sin rey, la kꞌuáyéhe̱ ti ncha̱tꞌá Melquisedec. Ti ihni̱é Melquisedec mé tꞌaxrjexín kixin “ijnko rey jína”; la jehe chꞌan mé kꞌué rey kuènté chjasin Salem, la tíha mé tꞌaxrjexín kixin “ti rey tsjajon kjuaxróxin.” 3Melquisedec mé noehña sin nkexro ti itꞌé la ko ti ìñé chꞌan la ko nkexro tsíkꞌaxrjeníxin chꞌan; la noehña sin nkesá tsíkokjíhi chꞌan la ko nkesá tsíkꞌen chꞌan. Mé xi̱kaha tóyóhe̱ ti Xje̱en Díos kixin jehe chꞌan mé ijnko ncha̱tꞌá nkochríxín tsjakꞌe.

4A̱ndá ijie, tsjehéra kixin imá tjetoan Melquisedec kixin Abraham ti nkexro tsíkꞌaxrjeníxini la tsichjéhe chꞌan Melquisedec ti te̱xi̱n parte ti nkehe tsíkjacha chꞌan ti tsíkjikjajo̱nko chꞌan ti sin rey. 5#Nm. 18:21.*Éxi nixja ti ley tsíkꞌe̱to̱an Moisés, kixin ti sin ncha̱tꞌá tsíkꞌaxrjeníxin Leví mé chónta sin kjuachaxin tsjanchia sin kixin kaín chojni tsjajon ti te̱xi̱n parte ti nkehe tjacha sin, kjónté nkokón tsíkꞌaxrjeníxin sin Abraham. 6A̱ndá Melquisedec, kjónté tsíkꞌaxrjeníxinhña chꞌan Leví, la kjuanchia chꞌan ti te̱xi̱n parte ti nkehe tsíkjacha Abraham, ti nkexro tsíkꞌayéhe̱ ti nkehe tsíndáchro Díos. Ndá xi̱kaha Melquisedec kjuíncheñao Abraham. 7Méxra̱ kaín chojni nohe kixin a̱ntsí tꞌe̱to̱an ti nkexro ncheñao ijnko chojni, ke ti nkexro tóñao. 8A̱ndá ijie la ti sin tꞌáyéhe̱ ti chichaon tjajoni la chojni chóxin itsꞌen. Kjánchó ndáchro xroon itén Díos kixin Melquisedec mé ijnko nkexro na̱xa̱ tjetsjehe, kixin chrónkahya kixin ó ikꞌuén chꞌan. 9Mé tꞌaxrjexín kixin ti ncha̱tꞌá Leví la ko kaín ti ncha̱tꞌá tsíkꞌaxrjeníxin chꞌan, tꞌáyéhe̱ ti chichaon tjajoni ijie, la éxi kja̱xin sin chjéhe sin chichaon Melquisedec kixin ó tsíkje̱nka̱ Abraham, 10mé xi̱kaha kóhen kixin kaín ti sin kꞌuaxrjeníxin Abraham, la kjónté na̱xa̱ kókjíehya sin ti ó xéta Abraham ti ncha̱tꞌá Melquisedec, la éxi xráxín tjejó sin.

11Ti chjasin Israel kꞌuáyéhe̱ ti ley kjuajon ti sin ncha̱tꞌá levita, mé tsíkꞌaxrjeníxin sin ti ncha̱tꞌá Aarón. A̱ndá ti chaxín chrókjuacha ti ncha̱tꞌá levita chrókjuinchetjóá ti sin chrókjuinchexiteyéhe ti ley, la í ticháxi̱nhña na̱xa̱ chrókónoxín ókjé ncha̱tꞌá, tsíkꞌaxrjeníxinhña Aarón, éxi ti ncha̱tꞌá Melquisedec. 12Kixin ti chrókꞌuixinkí ti ncha̱tꞌá la ticháxi̱n chrókꞌuixinkí ti ley kja̱xin. 13Mé ti xroon itén Díos chronka nkexrín itjen Ìnchéni la tsíkꞌaxrjeníxin chꞌan ijnko nkexro kuènté Israel la kohya ninkexró tsíkꞌóna ncha̱tꞌá tsíkꞌaxrjeníxin ti sin a. 14Ó noheni kixin Ìnchéni tsíkꞌaxrjeníxin Judá, a̱ndá Moisés la chrónkahya ninkehó kuènté ti sin tsíkꞌaxrjeníxin Judá ti ó ndáchro chꞌan nkexro tsꞌóna ncha̱tꞌá.

15A̱ndá tíhi la a̱ntsí tienxíni kixin xraxinkaoni kixin ti ncha̱tꞌá ni̱xin la tóyóhe̱ éxi ti ncha̱tꞌá Melquisedec, 16kixin ti ó kꞌóna chꞌan ncha̱tꞌá la jehya kixin ti ley chrókꞌue̱to̱an. Náhí. Kꞌóna chꞌan ncha̱tꞌá kixin ti kjuachaxin chónta chꞌan la xitjahya tsꞌitjáña. 17#Sal. 110:4.*Méxra̱ chrónka Díos nkexrín itjen Ìnchéni, ndáchro:

Jaha mé ijnko ncha̱tꞌá tsjakꞌe nkochríxín,

éxi kꞌuékjakꞌe ti ncha̱tꞌá Melquisedec.

18Mé xi̱kaha ti ley kꞌue̱to̱an Moisés la í tꞌe̱tua̱nhña ijie kixin kanhñó kjuachaxin chónta la ko kjuachahya, 19Kixin ti ley kꞌue̱to̱an Moisés la kjuachahya kótjuáxin chojni. A̱ndá ijie chóntani ijnko nkehe a̱ntsí jína tinkáchónkini kixin tíha mé tjinki̱tsa tso̱chjineheni Díos.

Ti ncha̱tꞌá a̱ntsí tꞌe̱to̱an

20Ti ó ndáchro Díos kixin Cristo tsꞌóna ncha̱tꞌá la kꞌuákjenxi̱n chꞌan a̱sén chꞌan, a̱ndá ti iso ncha̱tꞌá la kꞌuákjenxi̱nhña chꞌan a̱sén chꞌan. 21#Sal. 110:4.*A̱ndá ti ó kónoxín Cristo la Díos chaxín ndáchro kixin tsoxiteyá tíha, la xi̱kaha ndáchro xroon itén Díos:

Itꞌéni Díos la ndáchro kixin tsoxiteyá tíha

la tsjinkíhya chꞌan ti nkehe tsíndáchro chꞌan:

“Jaha mé ijnko ncha̱tꞌá tsjakꞌe nkochríxín

éxi kꞌuékjakꞌe Melquisedec.”

22Méxra̱ Jesús ndáchro kixin ti nkehe ni̱xin tꞌe̱to̱an chꞌan la a̱ntsí jína ke ti nkehe senó. 23Chaxín itsjé ncha̱tꞌá kꞌuíxin kjánchó nkakꞌén sin la kjuachahya sin kꞌuejó sin nkochríxín. 24A̱ndá Jesús la tsꞌenhña chꞌan la ticháxi̱nhña íjnko nkexro tsꞌóna ncha̱tꞌá tsꞌe̱to̱an nkochríxín. 25Méxra̱ Ìnchéni mé tsjajon ti kjuachón nkochríxín tsꞌayéhé ti nkexro tso̱chjinehe Díos la ko nkochríxín itjen chꞌan chrónoéhe̱ chꞌan Díos kixin chrókuaá sin.

26Mé xi̱kaha Ìnchéni Jesús mé ti ncha̱tꞌá tꞌe̱to̱an ticháxi̱hini; jehe chꞌan mé ijnko nkexro imá tjóá, chóntahya chꞌan ninkehó ijie̱ la ko tjenkákjanhña chꞌan ti sin tjasin ijie̱, méxra̱ Díos kjuajon kjuachaxin sákjui̱ chꞌan nka̱jní la ntiha itjen chꞌan la a̱ntsí tꞌe̱to̱an chꞌan. 27#Lv. 9:7.*A̱ndá jehe chꞌan la jehya éxi íso ti sin ncha̱tꞌá, ticháxi̱n tsꞌóñá sin iko kixin tsochronòexín sin Díos kaín ña̱o, kixin ti ijie̱ chónta sin ndá chrꞌéxi̱n ti ijie̱ chónta ti íso chojni. Ìnchéni Jesús mé nkoko̱axón kjuajon chꞌan a̱sén chꞌan, ikꞌuén chꞌan. 28Ti ley chrónka Moisés la tꞌe̱to̱an kixin chojni na̱xa̱ chónta ijie̱ chrókꞌóna ncha̱tꞌá, a̱ndá chrꞌéxi̱n Díos ndáchro kixin ti Xje̱en chꞌan mé tsꞌóna ncha̱tꞌá tsꞌe̱to̱an nkochríxín kixin jína kjuínchexiteyá chꞌan.

Currently Selected:

Hebreos 7: poeNTplus

Highlight

Copy