Hebreos 4

Ti tso̱kꞌéhe ti sin tinkáchónki Díos

1Méxra̱ Díos tsíndáchro kixin tsjajon kjuachaxin tsꞌatsínkani tso̱kꞌéheni ti nonte tsjajon chꞌan. Méxra̱ tóxakoheni, kixin áchꞌe nkojinra chrókjuáchahyara chrókꞌuatsínkara ntiha. 2Kixin kja̱xini kuíhini ti itén Díos tsaáxini éxi kuíhin ti sin kꞌuejó senó, kjánchó jehe sin la ó chónkó kuíhin sin ti itan, kixin kjónté kuíhin sin, la kuitekakonhña sin. 3#Sal. 95:11.*A̱ndá jeheni kuitekaoni ti itan, la mé tsꞌatsínkani tso̱kꞌéheni ntiha. Mé xi̱kaha tsíndáchro Díos:

Kónínka̱koha̱n sin la ndátjan sin chaxín tsoxiteyá

kixin tsꞌatsínkahya sin tso̱kꞌéhe sin ti itjén janhan.

Mé xi̱kaha ndáchro Díos kixin kaín ti ixra̱ kjuénka̱yáxin chꞌan la ó kjuixin xiteyá ti ó kꞌóna chjasintajni. 4#Gn. 2:2.*Mé nkojín ti nixja ti xroon itén Díos chronka kuènté ti ya̱to̱xi̱n ña̱o, mé ndáchro:

Mé xi̱kaha kjuixihin Díos kaín ti ixra̱, landá kjuákꞌe chꞌan ko̱kꞌéhe chꞌan ti ya̱to̱xi̱n ña̱o.

5 # Sal. 95:11. *La ínaá ndáchro ti xroon itén Díos:

Tsꞌatsínkahya sin tso̱kꞌéhe sin ti itjén janhan, ichro Díos.

6Méxra̱ ijie na̱xa̱ tꞌitjáña kixin íso sin chrókꞌuixehen sin chróko̱kꞌéhe sin ntiha. A̱ndá ti sin ósé kuíhin ti itan chrókuaáxin sin, la kꞌuixenhña sin kixin kuitekakuenhña sin ti itan. 7#Sal. 95:7, 8.*Méxra̱ Díos kjua̱ko̱xi̱n íjnko ña̱o, mé ti ña̱o i, mé nixja̱xi̱n chꞌan ti nkehe tsíchronka David, éxi ndáchro ti xroon itén Díos:

Ijie ti chrókuihínra ti nkehe ndáchro Díos,

la chrókjui̱nchechahyara a̱sánra.

8 # Dt. 31:7; Jos. 22:4. *A̱ndá Josué la ti chrókjuacha chrókjuajon chꞌan nketí chróko̱kꞌèxín ti sin israelita ósé, landá Díos í ticháxi̱nhña na̱xa̱ chrónixja chꞌan kixin itsi íjnko ña̱o tso̱kꞌéhe chojni. 9Mé xi̱kaha na̱xa̱ siín kjuachaxin tso̱kꞌéhe ti chojni tinkáchónki Díos. 10#Gn. 2:2.*Méxra̱ ti nkexro tsꞌixehen tso̱kꞌéhe ti itjen Díos mé ó kjuixihin sin ti ixra̱ kjuíchꞌe sin, éxi Díos la kjuákꞌe ko̱kꞌéhe chꞌan ti ó kjuixihin chꞌan ti ixra̱ kuènté chꞌan. 11Ticháxi̱n kaín a̱séni chrókjueyáni nkexrín chrókꞌuixeheni chróko̱kꞌéheni ntiha, kixin ninkexró chrókꞌuatsínkahya éxi kóhen ti sin kuítekakonhña senó.

12Kixin ti itén Díos la mé tjechón la ko chónta kjuachaxin. Mé a̱ntsí taté ke ti chika espada ñájín#4:12 ñájín yoí lado taté espada de doble filo taté, kixin tíha la tsꞌixehen la tsichjéhe hasta nkaya a̱sén chojni. Mé xi̱kaha ti itén Díos tja̱ko̱xi̱n kaín nkehe tjenka̱yáxin chojni la ko kaín nkehe ndáchro a̱sén sin. 13La kohya ninkehó nkehe tsíkjichꞌéna Díos chrókjuákꞌe imó; kaín nkehe la noxín la tꞌikon Díos. Mé xi̱kaha ijnko ña̱o tso̱chjinani ti itjen Díos la tsochronkani nkehe ti ixra̱ kjuíchꞌeni ntihi chjasintajni.

Ìnchéni Jesús mé ti ncha̱tꞌá imá tjetoan

14Ìnchéni Jesús, ti Xje̱en Díos, mé ti ncha̱tꞌá kuènténi tjetoan, mé kꞌuíxehen chꞌan ti itjen Díos. Méxra̱ chrókuíto̱ehyani chrókuinkáchónkini ti jehe chꞌan. 15Mé xi̱kaha Ìnchéni mé ti ncha̱tꞌá kuènténi tjetoan, mé ti̱konoéhe̱ chꞌan ti jeheni la ko tjinki̱tsa chꞌan ti jeheni kixin fuertehyani. Jehe chꞌan mé kjuasótexín chꞌan nchónhña nkehe éxi jeheni, a̱ndá ti Jínahña kꞌuétjinkaon chrókjuachròe ti jehe chꞌan, kjánchó ninkehó ijie̱ kjuasinhña chꞌan. 16Méxra̱ chróchrakonhñani chrókóchjinani ti itjen Díos tꞌe̱to̱an kixin jehe chꞌan tsi̱konoéhe̱ chꞌan ti jeheni la ko tsjinki̱tsa chꞌan ti ó tichánxi̱hini nkehe.

Currently Selected:

Hebreos 4: poeNTplus

Highlight

Copy