Hebreos 5

1Díos mé kjueyá kaín ti ncha̱tꞌá tꞌe̱to̱an, la chojni ó tíha, la tꞌáyéhe̱ sin ti ixra̱ kixin tsonixjayákohe̱n sin ti chojni, la tsjajon sin iko itsꞌen la ko íso nkehe tsꞌáyéhe̱ Díos kixin tsꞌitjáñaxín ti ijie̱ kuènté chojni. 2Méxra̱ kja̱xin ti sin ncha̱tꞌá la imá ixra̱ nchexiteyéhe sin Díos kixin jehe sin la chojni ó, méxra̱ chrókóninkakuenhña sin ti chojni noehña la ko ti chojni tsíkjichròe. 3#Lv. 9:7.*Mé xi̱kaha jehe sin ticháxi̱n tjajon sin iko itsꞌen kixin ti ijie̱ chónta sin la ko kja̱xin tjajon sin nkehe kuènté ti íso chojni chónta ijie̱.

4 # Ex. 28:1. *La ninkexró xitjahya jehó sichꞌéna a̱sén ncha̱tꞌá tꞌe̱to̱an. Náhí. Jehó Díos mé tsjeyá nkexro tsꞌáyéhe̱ ti ixra̱, éxi ti ixra̱ tsíkꞌayéhe̱ Aarón. 5#Sal. 2:7.*Mé xi̱kaha Cristo, la jehya jehó kjuíchꞌéna a̱sén ncha̱tꞌá tꞌe̱to̱an. Náhí. Díos mé kjuíkosáyehe ti jehe chꞌan la ko kjuajon chꞌan ti ixra̱ éxi tsíndáchro chꞌan senó:

Jaha mé xja̱na;

la ko janhan mé kꞌóna itꞌá.

6 # Sal. 110:4. *Mé kja̱xin nixja ti xroon itén Díos:

Jaha mé ijnko ncha̱tꞌá tsjakꞌe nkochríxín,

éxi kꞌuékjakꞌe ti ncha̱tꞌá Melquisedec.

7 # Mt. 26:36-46; Mr. 14:32-42; Lc. 22:39-46. *Mé xi̱kaha ti ó kjuákꞌe Cristo ntihi chjasintajni la tsjánka chꞌan la ko itsen kjuanchehe chꞌan Díos, kixin Díos chrókjuinchekaá ti jehe chꞌan kixin chrókꞌuénhña chꞌan; la kuíhin Díos ti nkehe kjuanchia Cristo kixin jehe chꞌan kjuínchexiteyá chꞌan ti nkehe kꞌue̱to̱an Díos. 8Mé xi̱kaha Cristo, kjónté Xje̱en Díos, la kjuasóte chꞌan la xi̱kaha kjua̱ko̱xi̱n chꞌan kixin kjuínchexiteyá chꞌan. 9Méxra̱ ti kjuínchexiteyá Cristo, ndá kjuacha chꞌan la kꞌóna chꞌan ti nkexro tsjajon ti kjuachón nkochríxín tsꞌáyéhe̱ kaín ti chojni tsitekaon ti jehe chꞌan. 10Mé xi̱kaha Díos kjuíchꞌéna Cristo ti ncha̱tꞌá tꞌe̱to̱an éxi kꞌuékjakꞌe ncha̱tꞌá Melquisedec.

Jehya jína chrókuíto̱heni ti tinkáchónkini Ìnchéni

11Méxra̱ janhan chonta nchónhña nkehe chróxrja̱nkaxian kuènté tíhi, kjánchó imá ixra̱ kixin tiénxinhñara. 12#1Co. 3:2.*Ó itsjé nánó, la ó jína chrókꞌónara ijnko chojni tjako, kjánchó náhí, kixin na̱xa̱ ticháxi̱n tsoxrako̱hara ti nkehe xra̱hya kuènté itén Díos. La xíkjan kꞌónara éxi ijnko chájan noehña, ticháxi̱n itsꞌira itsjen kixin xitjahya sintera ti nkehe icha. 13Ti sin itꞌi itsjen la yóhe̱ éxi ijnko ixjan na̱xa̱ takí kixin na̱xa̱ noehña sin ti nkehe jína la ko ti nkehe jínahña. 14A̱ndá ti sin inie nkehe icha mé ti chojni nte̱to kixin ó nohe sin ti nkehe jína la ko ti nkehe jínahña.

Currently Selected:

Hebreos 5: poeNTplus

Highlight

Copy