2 Timoteo 3

Nkexrín tsꞌejó ti chojni chjasintajni ti ña̱o tsjixixín

1Kja̱xin ticháxi̱n tso̱noha kixin ti ña̱o tsjixixín la kjuaxróxinhña tsꞌejó kaín chojni. 2La kaín ti chojni tsinkáchónkihya Ìnchéni la jehó tsotjinkaon sin tsꞌe̱to̱an sin, imá tso̱xríhi̱n sin chichaon, sinchenke sin, tsꞌándaxínhi̱n sin Díos, la sinchexiteyéhya sin itꞌé sin la ko ìñé sin, la tsochjéhya sin kjuasáya ti chojni tjinki̱tsa la ko tsjikosáyéhya sin Díos. 3La tso̱tjue̱hya kícho sin, tsi̱konòehña kícho sin, sichꞌiyehe kícho sin, tsjachahya sin tsꞌe̱tue̱hen sin a̱sén sin, imá tso̱jie̱he sin la ko tso̱nínkakohen sin kaín ti nkehe jína. 4Chaxínhña ti nkehe tsonixja sin kixin tjenka̱yáxinhña sin jína la ko imá sinchenke sin. Tsotjinkaon sin tsochónta sin kaín ti nkehe tjinkaon sin ke ti chrókuinkáchónki sin Díos. 5Tsja̱ko̱xi̱n sin éxi ijnko chojni tinkáchónki Díos, kjánchó chaxínhña tsinkáchónki sin ti kjuachaxin kuènté Díos.

Méxra̱ jaha la chrókꞌuitonhña ti chojni tjenka̱yáxin xi̱kaha. 6Kixin ti sin a la ixri sin nkojnko nchia la chꞌiyehe sin ti chojnichjin lo̱nti̱ tjasin ijie̱, a̱ndá jehe sin nchexiteyá sin kaín ti ndáchro a̱sén sin. 7Jehe sin nkochríxín tjinkaon sin tsꞌitja sin nkehe ni̱xin, kjánchó tienxínhña sin ti nkehe chaxín ndoa. 8#Ex. 7:11.*Éxi ti sin kꞌuékjinchexro̱a̱n, Janes la ko Jambres kꞌuénínkakohen sin Moisés, mé xi̱kaha ti sin tjako ijie la nínkakohen sin ti nkehe chaxín ndoá. La jehó nkehe jínahña tjenka̱yáxin sin la titekakonhña sin ti nkehe chaxín tinkáchónkini. 9Kjánchó tsjachahya sin sichꞌia sin kixin kaín chojni tso̱nohe kixin tjenka̱yáxinhña sin jína, éxi tsíkóhen ti yaá sin kꞌuékónínkakohen Moisés.

Ti nkehe kjuixixín kꞌue̱tue̱hen Pablo Timoteo

10A̱ndá jaha kuitekaoan ti nkehe kjuàkua. La ó noha nkexrín kjuakꞌé la ko ti ixra̱ kjui̱tꞌa janhan. Ó noha nkexrín kuinkachónkia Ìnchéni, la noha kixin tjokahya kónínka̱oan, la noha nkexrín tjua̱ha̱ chojni kjónté nínkakona sin, la kui̱to̱a̱hya ti ixra̱, 11#Hch. 13:14-52; Hch. 14:1-7; Hch. 14:8-20.*kjónté kjuínchekjasóte sin ti janhan la ó noha nkehe kóna ti chjasin Antioquía, Iconio la ko Listra kixin chrókꞌóñá sin ti janhan, kjánchó Ìnchéni kjuínki̱tsa kixin kohya nkehe kóna. 12Mé xi̱kaha kaín ti sin tjinkaon tjóá chrókꞌuejó la ko sinchexiteyéhe Cristo Jesús la ticháxi̱n tsjasóte sin. 13A̱ndá ti chojni jínahña la ko ti sin xrichꞌia mé tsꞌóna sin a̱ntsí jínahña la ícha sichꞌia sin la ko tsitekaon sin ti kjuachꞌia kuènté íjnko chojni.

14Méxra̱ jaha la chrókꞌuitjáñahña ti nkehe jína kꞌuitjá la ko ti nkehe kuitekaoan. Jaha la ó noha nkexro kjua̱ko̱ha. 15Kixin na̱xa̱ xja̱ntsiá kꞌuitjá nkexrín nixja ti xroon itén Díos, la tíha mé kjuínki̱tsa tso̱noha kixin Cristo Jesús tsaáxini kixin tinkáchónkini chꞌan. 16Kixin kaín ti nkehe chónta ti xroon i mé itén Díos, tíhi mé jína tsja̱ko̱he̱ni iso chojni, la tsꞌitjaxíni nkexrín jína chrókꞌuejóni, la ko tsjinki̱tsa ti jeheni tso̱noheni nkexrín chrókꞌuejóni ndoá. 17Ndá xi̱kaha ti nkexro chꞌehe ixra̱ Díos la tsꞌitja sin sichꞌe sin ti ixra̱ jína la ko tsja̱ko̱xi̱n sin ti nkehe chaxín.

Currently Selected:

2 Timoteo 3: poeNTplus

Highlight

Copy