2 Timoteo 2

Ijnko soldado jína kuènté Jesucristo

1Jaha xje̱eni, Díos imá tjua̱ha, kixin kuitekaoan Jesucristo, tjanchehe chꞌan kixin a̱ntsí tsjinki̱tsa chꞌan kaín ti nkehe tsinkáki. 2Ti nkehe kuihín níxja janhan nkayakon itsjé chojni mé xi̱kaha la chenka ti sin tsjéyá, ti sin chaxín tsjacha sichꞌe ti ixra̱, kixin kja̱xin sin xi̱kaha tsja̱ko̱he̱ sin íso chojni.

3Jaha la kjónté nchónhña chrókjuasótia, la chrókjuacha kixin jaha la éxi ijnko soldado jína kuènté Jesucristo. 4Nijnko soldado jína ichꞌe ixra̱ chrókjueyá ókjé ixra̱ kixin ticháxi̱n nkojinxón ixra̱ sichꞌe éxi tjinkaon ti nkexro tꞌe̱to̱an. 5Mé xi̱kaha ti ijnko chojni tjinkaon tsotsítán la xrokuahya tsꞌáyéhe̱ sin nijnko nkehe ti sinchexiteyéhya sin ti sin tꞌe̱to̱an. 6Ti nkexro ichꞌe ixra̱ ijnko nonte la chónta kjuachaxin sa̱o sinie ti nkehe tsꞌóna. 7Tjenka̱yáxian kaín ti nkehe ndáxrja̱n, la Ìnchéni tsjinki̱tsa tsiénxian kaín tíha.

8Xráxinkaoan kixin Jesucristo ti nkexro tsíkꞌaxrjeníxin ti rey David la xechón. Tíhi ti itan jína tsaáxini, tjétjàkua janhan. 9A̱ndá ti itan jína i, mé tjéchji̱naxián la tjétjasótexián la ko kjua̱kꞌe̱chro̱exin sin cadena ti janhan éxi ijnko chojni tsíkjàya, kjánchó ti itén Díos la tjechroexínhña cadena. 10Méxra̱ kjónté nchónhña tꞌatsínka janhan, la nta̱xiteyá kixin ti íso sin kjueyá Díos la tsochónta sin kjuachón nkochríxín ti tsitekaon sin Jesucristo.

11Tíhi mé ijnko nkehe chaxín:

Ti tsꞌenkoni chꞌan, la chrꞌéxi̱n tsꞌejókoni chꞌan.

12 # Mt. 10:33; Lc. 12:9. *Ti tsjasótexíni chꞌan, la tsochóntani kjuachaxin nkaya nka̱jní ti tꞌe̱to̱an chꞌan.

Ti tsondáchroni kixin chónhñani chꞌan la kja̱xin chꞌan tsondáchro chꞌan kixin chónhña chꞌan ti jeheni.

13Ti jeheni nchexiteyáhyani la jehe chꞌan la kjónté tjenchexiteyá chꞌan ti nkehe ndáchro chꞌan

kixin Díos la chꞌiyahya.

Ti nkexro jína ichꞌe ixra̱

14Nchexraxinkaoan sin kaín ti nkehe i. Díos la tjetsjehe kixin jaha tétue̱hén sin kixin chji̱ñéhña chrónixja sin ti nkehe ndásé, kixin ninkehó sínkíhya tíha, kixin ti xi̱kaha nixja sin la sinchekꞌitjáña sin ti sin tjejótihin. 15Méxra̱, chrókóxakohan chrókjui̱chꞌehé Díos ixra̱ éxi tóxríhi̱n chꞌan, la ndoá chrókjuàkua ti itan jína, la chrókósuàhya kixin kjuàkua ti itan chaxín. 16Sáchrókjuixián ti siín ti chojni chji̱ñé nixja kixin ti xi̱kaha nixja sin la a̱ntsí tsinkákꞌánkí ti ijie̱ chónta sin, 17la ti nkehe nixja sin la éxi ti ichin cancer sítinkáchrꞌenka. Mé xi̱kaha ti nkehe tjako ti chꞌin Himeneo la ko Fileto, 18kixin kuíto̱he sin ti itan jína la sákjuichroe sin, ndáchro sin kixin ó kjuixin kꞌuatsínka ti tsoxechón chojni, la xi̱kaha chꞌiyehe sin chojni la tjitóxi̱n sin ti nkehe tinkáchónki íso sin. 19#Nm. 16:5.*Kjánchó ti chojni tinkáchónki Díos mé éxi ti ixro̱ xránkíxixín ijnko tja̱tꞌo̱ tꞌinkíhya, éxi ijnko sello ti itén Díos ndáchro: “Ìnchéni mé chóxin ti chojni kuènté”, la kja̱xin ndáchro: “Kaín ti sin tinkáchónki Cristo ticháxi̱n tsíto̱he sin kaín ti nkehe jínahña.”

20Ijnko nchia ijié kuènté ti sin rico la kaínhña ti nkehe siín la tsíkꞌónaxín oro o̱ plata. Náhí. Kja̱xin siín nkehe tsíkꞌónaxín inta la ko nche̱tje̱. Ti nkehe tjete la ticháxi̱hin sin ti ña̱o tjetoan, a̱ndá ti nkehe tjetehya la nkochríxín ticháxi̱hin sin. 21Méxra̱ ti ijnko chojni tsíto̱he kaín ti ijie̱ la yóhe̱ éxi ijnko nkehe tjete chrókuicháxi̱hin Ìnchéni kixin sichꞌe sin ti ixra̱ kuènté chꞌan.

22Tito̱hé kaín ti nkehe jehya jína tjenka̱yáxin ti sin ndasoá. Chrokjuénka̱yáxian ti nkehe jína, la chrókuinkachónkia Cristo, la ko chrótjue̱hé kaín chojni la ko kjuaxróxin chrókꞌuejóko̱a kaín sin. Mé xi̱kaha chrókꞌuejó kaín ti sin kótjóá tinkáchónki Ìnchéni. 23Jaha chrókuahya kuentá ti nkehe itjo ti sin lo̱nti̱, tjenka̱yáxinhña jína kixin ó noha kixin xi̱kaha xra̱hya tsixin kjuanínkaon. 24Mé xi̱kaha ti nkexro chꞌehe ixra̱ Ìnchéni la chrókjuajo̱nkohya kícho. Ícha jína chrókjuinchejína a̱sén sin kixin jína chrókjua̱ko̱he̱ sin kícho sin la ko chrókjua̱ko̱xi̱n sin kixin tónínkakonhña sin. 25La nkojína chrónixje̱he̱ sin ti sin titekakonhña, kixin Díos chrókjuinki̱tsa chrókꞌuixinkí ti nkehe nduáhya tjenka̱yáxin sin la chrókónohe sin ti nkehe chaxín ndoá 26kixin chrókónohe sin nkexrín tsinkéhe sin ti nkehe tjasin ti Jínahña tjinkaon chrókjuichꞌiyehe ti jehe sin ndá chrókjuasin sin ijie̱.

Currently Selected:

2 Timoteo 2: poeNTplus

Highlight

Copy