2 Timoteo 1

Pablo nixje̱he̱ Timoteo

1Janhan, Pablo, kjueyána Jesucristo kixin si̱tꞌaha̱ chꞌan ixra̱ éxi tjinkaon Díos, kixin tso̱xrja̱nka nkexrín tsjajon chꞌan ti kjuachón nkochríxín ti tsitekaoni Jesucristo. 2#Hch. 16:1.*Ikjian ti xroon i tsꞌayéhé jaha xje̱eni Timoteo. Itꞌéni Díos la ko Ìnchéni Jesucristo sintañaoan la ko tsi̱konoáha la tsotjahá kjuaxróxin.

Timoteo chróchronka kixin titekaon Jesucristo

3Xráxinka̱oan ti jaha ti ó nixja̱ha̱ Díos tie la ko ncha̱kotjin, la tja̱ha̱ kjuasáya Díos. La tjóá a̱sená tꞌa̱ha̱ Díos ixra̱ éxi kꞌuékjichꞌe ti sin kꞌuaxrjeníxian janhan. 4Nkochríxín xráxinka̱oan nkexrín tsja̱nka, la imá tjínka̱oan chrókꞌuíkua̱n ti jaha ínaá kixin tso̱chána. 5#Hch. 16:1.*Méxra̱ nona kixin kaín a̱sán tinkachónkia Jesucristo. La ko tjan náchri̱a Loida la ko ìná Eunice ti nkexro sa̱o kuinkáchónki Ìnchéni Jesús, la nona kixin jaha kja̱xin tinkachónkia chꞌan.

6Méxra̱ nta̱xraxinkaoan kixin chrókꞌuitjáñahña ti kjuachaxin kjuajon Díos kꞌuayéhé ti ó kjuákꞌetja tjaná ti ikjá. 7Díos la kjuajonhña chꞌan Ncha̱kuén chꞌan kixin tsochrakoni. Náhí. Kjuajon chꞌan kixin tsochóntani kjuachaxin, la tso̱tjue̱heni kíchóni la ko jína tsjenka̱yáxini. 8Méxra̱ chrókósuàhya chróchro̱nka kixin tinkachónkia Ìnchéni la ko kja̱xin chrókósuàhya kixin tjéchji̱na kixin xrja̱nká ti itén chꞌan. Kjónté chrókjuasótia la chrókjuàkua ti itan tsaáxini kixin ó kꞌuayéhé ti kjuachaxin kjuajon Díos. 9Díos kuaáxini la ko kjueyá chꞌan ti jeheni kixin tjóá chrókꞌuejóni. La jehya ti ixra̱ jína chrókjuíchꞌeni ndá chrókuaáni. Náhí. Díos imá tjue̱he ti jeheni la kjueyá chꞌan ti jeheni kixin tsinkáchónkini Jesucristo. Kixin ti na̱xa̱ kꞌónahña chjasintajni la tsíkjenka̱yáxin chꞌan xi̱kaha tso̱hen. 10A̱ndá ijie ó kjua̱ko̱xi̱n Díos kixin imá tjue̱he ti jeheni kixin ó kui Jesucristo ti nkexro tsaáxini. Jehe chꞌan kjuínchekꞌitjáña chꞌan ti kjuachaxin kuenté ti kjuachꞌén#1:10 kjuachꞌén muerte kixin xechón chꞌan, Kixin ti itan kuènté chꞌan mé chrónkaxín nkexrín tsochóntani ti kjuachón nkochríxín la xrokjuahya tsjeje̱.

11 # 1Ti. 2:7. *Díos kjueyá ti janhan kixin tsꞌóna ijnko apóstol kixin tsoxrja̱nkaxián ti itén chꞌan, kixin tsjákohá ti sin jehya judío. 12Mé xi̱kaha tjétjasótexián kaín tíhi, la tósuànahña kixin choxián jína ti nkexro tinkachónkia janhan. La ó nona kixin Ìnchéni chónta kjuachaxin tsꞌayakohen ti jeheni hasta tsjixrakájña ti ña̱o tsokjan chꞌan. Méxra̱ tja̱ha̱ chꞌan a̱sená kixin tsꞌayakohen chꞌan.

13Méxra̱ tꞌitjáñahña kaín ti nkehe jína kjuákohá. Titekaoan Ìnchéni la ko tjue̱hé kichua. 14Ti Ncha̱kuén Díos chóntani mé tsjinki̱tsa tꞌayakohén ti itan jína kꞌuayéhé.

15Ó noha kixin kaín ti sin tjejó Asia mé kuíto̱he sin janhan la ti chꞌin Figelo la ko Hermógenes kja̱xin kuíto̱he sin ti janhan. 16Kjánchó tjáncháha̱ Ìnchéni kixin tsi̱konoéhe̱ kaín ti sin tjejó ndo̱e ti chꞌin Onesíforo kixin jehe chꞌan la imá kjuínki̱tsana chꞌan la ko kósuèhya chꞌan ikui chꞌan ti tjéchji̱na. 17Ti na̱ntá kjuíji chꞌan chjasin Roma la kuíto̱ehya chꞌan kjueyá chꞌan ti janhan hasta kꞌuitja chꞌan. 18La tjáncháha̱ Ìnchéni kixin tsi̱konoéhe̱ ti nkexro a ti ña̱o tsokjan chꞌan la kja̱xin ó noha jína nkexrín kjuínki̱tsa chꞌan ti jeheni ti chjasin Éfeso.

Currently Selected:

2 Timoteo 1: poeNTplus

Highlight

Copy