2 Tesalonicenses 3
3
Chrokjuikosáyehe sin ti itén Díos
1A̱ndá ijie xrja̱noáhára, kíchóni, kixin chrókjuanchehéra Díos kixin chrókjuinki̱tsa chꞌan ti jeheni kixin tjoka sáchrokjui ti itén Ìnchéni chrókuihin sin nkuíxín, kixin chrókjuikosáyehe sin Díos éxi jahara xi̱kaha. 2Kja̱xin tjanchehéra Díos kixin chrókjuinki̱tsa chꞌan ti jeheni kixin kohya nkehe chrókóheni ti siín chojni jínahña nínkakohen ti jeheni, kixin jehya kaín chojni tinkáchónki sin Ìnchéni. 3Kjánchó Ìnchéni mé chaxín jína chꞌan la tsíto̱ehya chꞌan ti jahara, na̱xa̱ tsjínki̱tsara chꞌan kixin jína tsjakꞌera la ko tsꞌayakohanra chꞌan kixin kohya nkehe tso̱hanra. 4Ó noheni kixin Ìnchéni sinchexiteyá kaín ti nkehe ndáchro la ko tsjinki̱tsa chꞌan ti jahara kixin na̱xa̱ nchexiteyára kaín ti nkehe kꞌue̱to̱ani. 5Ìnchéni mé tsjínki̱tsara kixin tso̱nohara kixin Díos la tjua̱hára, la chrókjuachara chrokꞌuatsínkara kaín ti nkehe itsi éxi kjuacha Cristo.
Ticháxi̱n sichꞌeni ixra̱
6Kíchóni, tꞌe̱tua̱nxíni kjuachaxíen ihni̱é Ìnchéni Jesucristo kixin chrókꞌuaxrjekjanxínra ti sin tjinkakonhña sichꞌe ixra̱ la ko xrihya éxi kjuakoni. 7Ó nohara nkexrín chrókꞌuejora, chrókjuáko̱xinra éxi nkexrín kjuakꞌé kixin jehya chrókjuakꞌekoáni, la náhí. 8Jehya kjoniekoáni ti nio̱tja̱ kjuajon nkojín nkexro ndá kjue̱nka̱hyani. Kóxakoheni ncha̱kotjin la ko tie kjuíchꞌeni ixra̱ kixin tjínka̱konhña chrótjáhara ixra̱ chrókjuájonra nkehe chrókjonieni. 9Kjónté chóntani kjuachaxin chrókjuanchiani kixin chrókjuínki̱tsara, kjánchó kjuíchꞌeni ixra̱, la xi̱kaha kjua̱ko̱xi̱ni kixin kja̱xinra xi̱kaha chrókjui̱chꞌera ixra̱. 10Kixin ti na̱xa̱ kꞌuéjoni nkoko̱a ntiha la kꞌue̱to̱ani kixin ti nkexro tjinkakonhña sichꞌe ixra̱ la kja̱xin chrókjoniehña. 11Ó kuíhini kixin nkojinra la ninkehó ixra̱ chꞌehyara, a̱ndá kjuachꞌia ó xríko̱ara. 12Méxra̱ kjuachaxíen Ìnchéni Jesucristo tꞌe̱to̱axíni la ko chrónòani kixin chrókónínkakonhña sin chrókjuíchꞌe sin ixra̱ kixin chrókjuacha sin chichaon chrókꞌuite ti nkehe chrókjonie sin.
13Ndá jahara kíchóni, chrókꞌóxrjéhya a̱sánra, chrókjui̱chꞌera ti nkehe jína. 14Ti nkojín nkexro titekakonhña ti nkehe tꞌe̱to̱an ti xroon i, la tsjehéra jína nkexro tíha, ndá chrókꞌuitonhñara kixin chrókósuéhe̱ chꞌan. 15Kjánchó jehya kixin chrókjuajo̱nko̱ara chꞌan. Náhí. Chrokjui̱nchexraxinkáonra chꞌan nkojína éxi ijnko kíchóni.
Kjuixixín nixja Pablo
16Ìnchéni mé tsjajon ti kjuaxróxin la ko na̱xa̱ tsotjáhara chꞌan kjuaxróxin nkochríxín. Jehe chꞌan mé tsꞌayakohanra kaínra.
17Janhan Pablo, tjaná kji̱nxian ti nkehe nixjahára, tíha mé tsjatso̱anxínra kixin janhan ikjian kaín ti xroon ichrꞌán.
18Ìnchéni Jesucristo mé sintañaora kaínra. Mé xi̱kaha tso̱hen. Ó tjen.
Currently Selected:
2 Tesalonicenses 3: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
