2 Tesalonicenses 2

Ti itsi ti chojni kuènté ijie̱

1 # 1Ts. 4:15-17. *A̱ndá ijie kíchóni, ó nohara kixin ó itsi Ìnchéni Jesucristo la tso̱nkotséni ti itjen chꞌan; méxra̱ xi̱kaha xrja̱noáhára 2kixin chrókjuinkíhyara ti nkehe tjénka̱yáxinra, la ko chróchrakonhñara ti chróndáchro nkojín nkexro kixin ó kjuixraká ti ña̱o itsi Ìnchéni, la ko chróchrakonhñara ti nkojín sin sichꞌia tsondáchro kixin ncha̱kuén Díos chrónka tíha o̱ kꞌuáyéhe̱ sin ijnko xroon éxi jeheni tsíchrꞌáni, chrónka kixin ó kjuixin ikui Ìnchéni. 3Ti̱toéhyara kixin nkojín nkexro chrókjuitꞌayahara. Kixin ti na̱xa̱ tihya ti ña̱o la itsi itsjé chojni tso̱nínkakohen Díos, la ko itsi ijnko nkexro jínahña chónta ijie̱, sinchekꞌitjáña kaín ti nkehe jína. 4#Dn. 11:36; Ez. 28:2.*Ti nkexro jínahña i, la tso̱nínkakohen Díos la ko tso̱nínkakohen kaín ti nkehe tinkáchónki chojni, la tsꞌixehen nkaxehen ti ni̱nkué Díos tsꞌetja̱xi̱n la tsondáchro kixin jehe mé Díos la sichꞌéna a̱sén Díos.

5¿Á xráxinkákonhñara kixin xi̱kaha kꞌuéxrja̱nka ti na̱xa̱ kꞌuéjoni nkoko̱a ní? 6A̱ndá ijie jahara ó nohara ti nkehe na̱xa̱ tꞌinkákohe̱n kixin ti nkexro jínahña na̱xa̱ tihya, hasta tsjixrakájña ti ña̱o tsoxrajon kjuachaxin. 7Kixin ijie la ó imó ichꞌe ixra̱ ti kjuachaxin kuènté jínahña la na̱xa̱ tꞌitjáña kixin sáchrokjui ti nkexro tinkákóhen kixin ndá chaxín itsi ti nkehe jínahña. 8#Is. 11:4.*Ndá ti nkexro jínahña la itsi. Ndá ti ó itsi Ìnchéni Jesús, la ti itan tsꞌaxrjexín irꞌua chꞌan ó, tsꞌenxín ti nkexro jínahña, mé xi̱kaha Ìnchéni sinchekꞌitjáñaxín ti jínahña ti kjuachaxin ijié tsi̱ka̱o. 9#Mt. 24:24.*Ti nkexro a mé tsi̱ka̱o ti kjuachaxin kuènté ti Jínahña, la xi̱kaha tsochónta kjuachaxin sichꞌia la ko tsjasin kjuaxroan ijié, kjánchó jehó sichꞌiyaxón tíha. 10Mé xi̱kaha kaín nkehe jínahña sichꞌiyexín ti sin ó xráxín tsꞌitjáña kixin tjinkakonhña sin tsitekaon sin ti itan chaxín ndoá chrókuaáxin sin. 11Mé xi̱kaha tsíto̱he Díos ti jehe sin kixin tsitekaon sin kaín ti nkehe chaxínhña la ko kaín kjuachꞌia, 12kixin ndá tsjasóte kaín ti sin kuítekakonhña ti itan chaxín chrókuaáxin sin kixin a̱ntsí kóxríhi̱n sin ti ijie̱.

Ti nkexro kjueyá Díos kixin tsochonta kjuachón nkochríxín

13A̱ndá jeheni nkochríxín chróchjéheni kjuasáya Díos kixin ti jahara kíchóni tjua̱hára Ìnchéni. Ósé tsíkjeyá Díos ti jahara kixin chrókuaára la ti Ncha̱kuén chꞌan tso̱tjuáxinra, la ko ti itén chꞌan chaxín ndoá kuitekáonra. 14Mé xi̱kaha kꞌuéya̱hára Díos kixin chrókuaáxinra ti itén chꞌan tjakoni, kixin tsjachara tsꞌejora ti itjen ti kjuachaxin ijié kuènté Ìnchéni Jesucristo.

15Mé xi̱kaha, kíchóni, jína chrókꞌuejora, chrókꞌuitjáñahñara ti nkehe kjuakoni ti ó kꞌuéjoni nkoko̱a, la ko ti nkehe chrónka ti xroon ikjini kꞌuayéhéra. 16Ìnchéni Jesucristo la ko Itꞌéni Díos imá tjue̱he ti jeheni la ko kjuasáye chꞌan tjinki̱tsa chꞌan kixin tso̱chéhe̱ni nkochríxín la ko tsꞌejóchóheni itsi Ìnchéni. 17Jehe chꞌan tsjajon chꞌan kjuachéhe̱ la ko sinchefuerte ti a̱sánra la tsjajon chꞌan kjuachaxin kixin ndoá chrónixjara la ko kaín ixra̱ jína chrókjui̱chꞌera.

Currently Selected:

2 Tesalonicenses 2: poeNTplus

Highlight

Copy