1 Pedro 5

Tsꞌayakoheni ti kolélo kuènté Díos

1Tjínka̱oan tsonixja̱ha̱ ti sin tꞌe̱to̱an ti ni̱nko tjejora, kja̱xin janhan této̱an ni̱nko éxi jehe sin, la ikua̱n kꞌuíko̱nxian nkexrín kjuasóte Cristo, la ko kja̱xin tsꞌayáha̱ ti kjuachaxin kuènté Díos éxi tsꞌáyéhe̱ íso sin ti ó itsi Ìnchéni. 2#Jn. 21:15-17.*Chrokꞌuayakohénra jína ti kolélo kuènté Díos kixin tíha ti ixra̱ kꞌuayéhéra. La nkojína chrókjuínki̱tsara sin éxi tjinkaon Díos la jehya kixin íjnko chojni chrókꞌue̱tua̱hanra chrókjui̱chꞌera ti ixra̱, la ko jehya imá chrókóxríhanra chrókjuachara chichaon. Náhí. Kaín a̱sánra chrókjui̱chꞌera ti ixra̱ jína. 3Chji̱ñéhña chrókꞌuétue̱hénra sin, tꞌayakohénra sin jína kixin jehya kuèntára ti jehe sin. Méxra̱ chrókóxakohanra chrókjuákohéra sin nkojína. 4Ndá xi̱kaha ti ó itsi ti Pastor chaxín tꞌe̱to̱an, ndá jahara tsꞌayéhéra ijnko corona náxrjón tjechóhen nkaya nka̱jní, tíha mé ijnko corona tsjeje̱hya.

5 # Pr. 3:34. *A̱ndá jahara ntasoíra chrókjui̱nchexiteyéhéra ti sin tꞌe̱to̱an kuènté ni̱nko la ko kaínra nkojína chrókjui̱nchexiteyéhéra kichuara la chrókjui̱nchenkehyara kixin:

Díos la tjinkakonhña ti chojni nchehnke,

a̱ndá ti sin nchenkehya mé tsjinki̱tsa chꞌan.

6 # Mt. 23:12; Lc. 14:11; 18:14. *Méxra̱ chrókjui̱nchenkehyara, chrókjui̱nchentsí a̱sánra, la chrókjui̱nchexiteyéhéra Díos kixin jehe chꞌan la chónta chꞌan kjuachaxin ijié, la ti ó tsokjan chꞌan la tso̱tjáhara chꞌan kjuachaxin. 7Chróchenkara Díos kaín ti kjuaxikaon chontara kixin jehe chꞌan la imá tꞌayakohen chꞌan ti jahara.

8Méxra̱ chrókóxakohanra jína chrókꞌuejora kixin ti Jínahña, ti nkexro nínkakohanra, mé éxi ijnko koxra̱ jie̱he xi̱kaha xritjeyá nkexro sinie. 9Jína chrókꞌuejora, chrókuinkachónkira Ìnchéni. Tjájonhñara kjuachaxin kixin ti jínahña chrókjuacha chrókꞌue̱tua̱hanra, la ó nohara kixin kuenté chjasintajni la kaín ti sin kichuara tjejótjasóte sin kixin tinkáchónki sin Ìnchéni. 10A̱ndá ti ó tsjixin tsjasótiara, kjónté kanhñó isé, la Díos sinchetjóá ti jahara la ko a̱ntsí tsjinki̱tsa chꞌan kixin tsjachara tsꞌejora jína. Méxra̱ Díos la tjua̱hára la kꞌuéya̱hára chꞌan kixin tsꞌejoko̱ara chꞌan nkoko̱a ti itjen Ìnchéni Jesucristo chónta kaín kjuachaxin. 11Méxra̱ tsochjéheni chꞌan kjuasáya kixin jehe chꞌan chónta chꞌan kjuachaxin tsꞌe̱to̱an chꞌan nkochríxín. Mé xi̱kaha tso̱hen.

Kjuixixín nixja Pedro

12 # Hch. 15:22, 40. *Chꞌin Silvano ijnko kíchóni jína mé kjuínki̱tsa chꞌan ikjian ti xroon í, kjónté kanhñó itsjé nixja ti xroon, la nta̱xráxinkaonra kixin kjuíntañaonra Díos la xi̱kaha kjua̱ko̱xi̱n chꞌan kixin chaxín tjua̱hára chꞌan. Méxra̱ jína chrókꞌuejora.

13 # Hch. 12:12, 25; 13:13; 15:37-39; Col. 4:10; Flm. 1:24. *Ti ni̱nko itjen Babilonia mé Díos kjueyá chꞌan ti jehe sin éxi kjueyá chꞌan ti jahara, mé nixjahára sin la ko kja̱xin nixjahára chꞌin Marcos, ti nkexro tꞌíkua̱n éxi xja̱na.

14Nixjehéra kichuara nkojína. La kjuaxróxin tꞌejora kixin tinkachónkira Jesucristo. Mé xi̱kaha tso̱hen.

Currently Selected:

1 Pedro 5: poeNTplus

Highlight

Copy