2 Corintios 6
6
1Kaíni nkokón chꞌeheni Díos ixra̱, méxra̱ chrónòani kixin chrókꞌuitjáñahñara ti kjuachaxin kjuajon chꞌan kixin imá tjue̱he chꞌan ti jahara. 2#Is. 49:8.*Éxi ndáchro ti xroon itén Díos:
Ti ó kjuixraká ti ña̱o tsjínki̱tsa chojni la kui̱ha̱n ti nkehe kjuanchiara;
La ti ña̱o tsaá chojni la kjuínki̱tsa ti jahara.
A̱ndá ijie ó ikui ti ña̱o kjueyá Díos, ó ikui ti ña̱o tsaá chojni.
Pablo kjuasóte kixin chꞌehe ixra̱ Díos
3Tja̱ko̱xi̱nhñani ninkehó nkehe nduáhya kixin chrókꞌuántaxièxin chojni ti ixra̱ tjejóchꞌeni. 4Kaín ti ixra̱ ichꞌeni la tja̱ko̱xi̱ni kixin Díos chꞌeheni ixra̱. Méxra̱ tónínkakonhñani kjónté nchónhña nkehe tjasótexíni, kjónté ichrén nkehe tichánxi̱hini la ko kjónté ichrén kjuaxikaon siín, 5#Hch. 16:23.*kjónté kꞌuekoni, kꞌuejóchjinani, la nchónhña chojni kónínkakohen ti jeheni la kjónté itsjé ixra̱ ichꞌeni la kjuachani kotáchrin la ko kjinta. 6Tja̱ko̱xi̱ni kixin tjóá tjejóni, la noheni ti nkehe chaxín, tónínkakonhñani, nkojína nixjani la tja̱ko̱xi̱ni kixin chóntani Ncha̱kuén Díos, la ko kaín a̱séni tjue̱heni kíchóni. 7La tja̱ko̱xi̱ni kixin chaxín ndoá chrónkani ti itan kuènté Díos, la ko chóntani ti kjuachaxin kjuajon Díos. Ndoá tjejóchꞌeni ixra̱ kixin xi̱kaha tsjachani tsjajo̱nkoni ti nkehe jínahña. 8Iso sin la nkojína nixje̱he̱ sin ti jeheni la íso sin la náxrjónhña nixja, iso sin la jína tjejóni, ichro sin, la íso sin la tꞌándaxíhi̱n sin ti jeheni. Iso sin tꞌikon ti jeheni éxi chojni chꞌia kjónté ndoá chrónkani. 9Iso sin kjónté chóxin sin ti jeheni la ndáchro sin kixin chónhña sin ti jeheni, la ko íso sin tjinkaon chrókꞌóñá ti jeheni, kjánchó na̱xa̱ tjejóchóni. Kjónté tjate sin ti jeheni la tꞌóñáhña sin ti jeheni. 10Éxi tꞌáváni, kjánchó chéhe̱ni. Éxi nóani, kjánchó chjéheni chojni ti nkehe imá tjete. Éxi chóntahyani ninkehó, kjánchó chóntani kaín nkehe.
11Kíchóni, jahara tjejora chjasin Corinto, ndoá nixjahára la ninkehó tꞌa̱yáhyara la kaín a̱séni tjue̱heni ti jahara. 12Jeheni la imá tjue̱heni ti jahara, kjánchó jahara la tjáko̱xinhñara kixin tjue̱héra ti jeheni. 13Xrja̱noáhára éxi ijnko itꞌé xjan chrónoéhe̱ ti xje̱en kixin kja̱xinra chrótjue̱héra ti jeheni éxi tjue̱xíni ti jahara.
Jeheni mé ti ni̱nkué Díos tjechón
14Chrókónkojiéhyara ti chojni tinkáchónkihya Ìnchéni, kixin éxi ijnko yunta, ti nkokónhña la nkokónhña ichꞌe va ixra̱. ¿Nkexrín chrókóyóhe̱ ijnko chojni tinkáchónki Díos la ko ijnko chojni tinkáchónkihya Díos? La ko, ¿nkexrín chrókóyóhe̱ ti tꞌinkaséña la ko ti sítie? 15Nkexrín chrókꞌuixin kjuaxróxin ti itjen Cristo la ko ti Jínahña. Xitjahya tsꞌejóko kícho ijnko chojni tinkáchónki Cristo la ko ijnko chojni tinkáchónkihya Cristo. 16#1Co. 3:16; 6:19; Lv. 26:12; Ez. 37:27.*Xrokjuahya tsꞌiton ti ni̱nkué Díos la ko ti ni̱nko siín nkehe tsíkjano̱ña. Kixin jeheni mé ti ni̱nkué Díos tjechón, éxi tsíndáchro Díos:
Janhan tsjakꞌé la ko tsꞌájia ti tjejó sin,
janhan tsꞌóna ti Díos kuènté sin
la jehe sin tsꞌóna sin ti chjasin kuénta̱na.
17 #
Is. 52:11. *La kja̱xin xi̱kihi ndáchro Ìnchéni:
Tꞌaxrjékjanxínra ti jehe sin la ókjé tꞌejora.
Tjásinhñara ijie̱,
ndá janhan tsꞌayáha̱ ti jahara.
18 #
2Sam. 7:14; 1Cr. 17:13; Is. 43:6; Jer. 31:9. *La janhan tsꞌóna Itꞌára,
la jahara tsꞌónara xja̱na ndoa la ko xja̱na ichjin,
mé xi̱kaha ichro Díos chónta kaín kjuachaxin.
Currently Selected:
2 Corintios 6: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
