2 Corintios 5

1Ó noheni kixin ti cuerpo chóntani la éxi ijnko nchia siín ntihi tjoka tsjeje̱, kjánchó Díos mé kjuíchꞌéna ijnko nchia ni̱xin itjen nkaya nka̱jní tsꞌáyéhe̱ni, la tíha mé tsꞌitjáñahña, nkochríxín tsjakꞌe kixin jehya chojni kjuíchꞌéna. 2Méxra̱ ti na̱xa̱ tjejóni ntihi chjasintajni la náxrjónhña tjejóni tjasóteni la ó tjinkaoni ti cuerpo ni̱xin tsochóntani nkaya nka̱jní 3kixin ti ó tsꞌinkáyani ti cuerpo ni̱xin, la í tso̱tjóchínhñani. 4Ti na̱xa̱ tjejóchóni, chóntani ti cuerpo ntihi, la kjuaxróxinhña tjejóni, kjánchó tjinkakonhñani chrókuíto̱heni ti cuerpo ntaxin chóntani; tjinkaoni chrókóni̱xin tíha. Ndá í chrókꞌuenhñani la chrókuákjani ti kjuachón nkochríxín. 5Díos mé kjuénka̱yáxin chꞌan kixin tíhi sincheki̱to̱nhe̱n chꞌan ti jeheni, ndá kjuajon chꞌan ti Ncha̱kuén chꞌan kꞌuáyéhe̱ni kixin chrókónoheni kixin chaxín tsꞌáyéhe̱ni ti íso nkehe tsjajon chꞌan.

6Méxra̱ nkochríxín chéhe̱ni kjónté ó noheni kixin ti na̱xa̱ tjejóni ntihi, chóntani ti cuerpo, la na̱xa̱ tjejókohyani Ìnchéni. 7Mé xi̱kaha jeheni la tinkáchónkini Díos, kjónté tꞌikonhñani chꞌan. 8Méxra̱ jeheni la imá chéhe̱ni kixin ó tjinkaoni chrókuíto̱heni ti cuerpo chóntani kixin sáchrókjui̱ni ti itjen Ìnchéni kixin tsꞌejókoni chꞌan ntiha. 9Méxra̱ tóxakoheni ichꞌeni ti nkehe tjinkaon chꞌan, á na̱xa̱ chóntani ti cuerpo ntihi o̱ náhí. 10#Ro. 14:10.*Kixin kaíni ticháxi̱n tso̱chjinani ti itjen Cristo tꞌe̱to̱an kixin tsitòexín ti iji̱éni, ndá nkojnkoni tsꞌáyéhe̱ni ti nkehe tsjajon chꞌan éxi ti ixra̱ kjuíchꞌeni, á jína o̱ náhí, ti na̱xa̱ kꞌuéchóntani ti cuerpo chjasintajni.

Ti itan tjajon kjuaxróxin

11Méxra̱ jeheni tjinkaoni tsjikosáyeheni Ìnchéni la xi̱kaha tóxakoheni tja̱ko̱he̱ni íso chojni kixin chrókuinkáchónki sin chꞌan; Díos la ó chóxin ti jeheni la ó nohe chꞌan kixin ndoá nixjani; méxra̱ tjinkaoni kixin jahara chrókónohara tíhi kja̱xin. 12Jehya tjinkaoni chróchronkani ínaá kixin jína ichꞌeni ixra̱. Náhí. Ndáchroni tíha kixin chrókóchàxinra kixin jeheni la ndoá chrónkani. La xi̱kaha tso̱nohara nkehe tsjate̱hera ti nkehe ndáchro ti sin imá nchehnke kixin imá nohe, kjánchó chaxínhña nohe. 13Ti ndáchro chojni kixin loconi la xi̱kaha ichro sin kixin imá tjinkaoni chrókjuichꞌeheni Díos ixra̱. A̱ndá ti náhí la jína nixjani kixin tjinkaoni chrókjuinki̱tsani ti jahara. 14Ìnchéni Cristo la imá tjue̱he ti jeheni la jehe chꞌan tꞌe̱tue̱hen chꞌan ti jeheni, kixin ó noheni jína kixin nkoko̱a nkexro kꞌuenyákohe̱ni kaíni, la kaíni tjejóni éxi ikꞌuéni kja̱xin. 15Mé xi̱kaha Cristo kjuenka̱yákohe̱n ti jeheni kixin jeheni tsꞌejóchónxini ti jehe chꞌan, la xi̱kaha jehya chrókjuinchexiteyéheni ti nkehe tjinkaon a̱séni. Náhí. Chrókjuíchꞌeni ti nkehe tjinkaon Cristo kixin jehe chꞌan kꞌuenyákohe̱n chꞌan ti jeheni la ko xechón chꞌan ínaá kixin tsaáxini chꞌan. 16A̱ndá ijie la tjenka̱yáxinhñani nkexrín itjen íjnko chojni éxi tjenka̱yáxin ti chojni chjasintajni. Senó la kuékꞌikoni Cristo éxi ijnko chojni chjasintajni, a̱ndá ijie la xi̱kahña tjenka̱yáxini. 17Méxra̱ ti nkexro tinkáchónki Cristo la kꞌóna ijnko chojni ni̱xin; kaín ti nkehe ntaxin la ó kjuixin kꞌuatsínka, a̱ndá ijie la kaín kꞌóna ni̱xin.

18La kaín tíha mé ti ixra̱ kjuíchꞌe Díos kixin kjuajon chꞌan ti kjuaxróxin la jína chrókꞌuejókoni chꞌan kixin Cristo kꞌuenyákonhe̱n ti jeheni. A̱ndá ijie la jeheni kꞌuáyéhe̱ni ti ixra̱ tsochenkani íso chojni kixin chrókjan sin chrókuitekaon sin Díos ínaá. 19Noheni kixin Díos la ichrꞌán ti xje̱en kꞌuenyákohe̱n ti jeheni, ndá xi̱kaha tjinkaon chꞌan kixin kjuaxróxin chrókꞌuejóko chꞌan ti chojni siín chjasintajni, la chróxraxinkakonhña chꞌan kaín ti ijie̱ kjuasin sin. A̱ndá jeheni mé kꞌuáyéhe̱ni ti ixra̱ kixin tsochenkani chojni ti itán i. 20Cristo ichrꞌán ti jeheni kixin tsonixjahára la chrónòa chꞌan kixin chrókuihínra ti itan tsochronkani. Méxra̱ kjuachaxíen Cristo la tjanchahára kixin kjuaxróxin chrókꞌuejoko̱ara Díos. 21Cristo kjuasinhña ninkehó ijie̱, kjánchó Díos kꞌuíkon ti jehe chꞌan éxi ijnko nkexro chónta ijie̱, la kjuasótexín chꞌan ti ijie̱ kꞌuéchóntani kixin jeheni la jína la ko tjóá chrókꞌuejóni.

Currently Selected:

2 Corintios 5: poeNTplus

Highlight

Copy