1 Corintios 6

Chrokjuanchehya sin ijie̱ ti juez tinkáchónkihya Ìnchéni

1Ti nkojínra kjuájo̱nko̱ara nkojín kichuara, la, ¿nkekuènté chrókjuanchehéra ijie̱ ti juez tinkáchónkihya Díos? Ícha jína chrókjuira chróchenkara ti sin tꞌe̱to̱an kuènté ni̱nko kixin chrókjuincheyóxin sin. 2¿Á noahñara kixin ti sin tinkáchónki Díos la sinchekito̱exín sin iji̱é ti chojni chjasintajni ti ña̱o tsjixixín ní? A̱ndá ti xi̱kaha si̱nchekito̱exínra iji̱é kaín chojni chjasintajni la, ¿nkekuènté tsjáchahyara si̱nchekito̱exínra ti ijie̱ intsí kuènté chojni tinkáchónki Ìnchéni? 3¿Á noahñara kixin kja̱xin ti sin ángel la jeheni tsotsjeheni á ndoá tjejó sin o̱ náhí ní? A̱ndá nkojín kjuanínkaon intsí siín ntihi la, ¿nkekuènté xitjahya chrókjuásiyóxinra? 4Kixin ti xi̱kaha tjájo̱nkoára kichuara la, ¿nkekuènté tíkjanchehéra ijie̱ ti sin tꞌe̱to̱an jehya kuènté ni̱nko? 5Ndáxrja̱n tíhi kixin chrókósuàhara. ¿Á kohya ninkexró ntiha chónta kjuaxrexinkaon jína tsjacha chrókjuincheyóxin ti iji̱é nkojín ti kíchóni ní? 6Jahara la jehya jehó tjánjo̱nra, kja̱xin tjanchehéra ijie̱ ijnko juez tinkáchónkihya Díos.

7Ti xi̱kaha tjájo̱nkoára kichuara la tíha la ó jnko nkehe nduáhya tíha. ¿Á jehya a̱ntsí jína chrókjuaníhira kjónté nkojín nkehe nduáhya chrókjuitꞌahara nkojín chojni ní? ¿Á jehya a̱ntsí jína kixin chrókjuachara kjónté chrókjui̱nchekꞌitjáñara ichrén nkehe chontara ní? 8Kjánchó jahara la nduáhya tjejora kixin te̱ehéra ti sin kichuara.

9¿Á noahñara kixin ti nkexro ichꞌe ti nkehe jínahña la tsꞌáyèhya ti kjuachaxin tsꞌejó sin ti itjen Díos ní? Chrokui̱to̱éhyara chrókjuitꞌayahara chojni; chrókónohara kixin ti nkexro tjasiko ijie̱ ókjé chojnichjin jehya ichjién, ti nkexro tinkáchónki nkehe tsíkjano̱ña, ti nkexro tja̱che̱he̱ kícho, ti nkexro nkokón ndoa tjasiko ijie̱ kícho, 10ti nkexro teé, ti nkexro tjinkaon jehó tsochónta itsjé nkehe, ti nkexro tókoan, ti nkexro chꞌéna kjuachꞌia, la ko ti nkexro chꞌiyehe kícho la tjanchia itsjé chichaon, mé kaín chojni xi̱kaha ichꞌe la tsꞌáyèhya ti kjuachaxin tsꞌejó ti itjen Díos. 11Mé xi̱kaha isora la xi̱kaha kꞌuejora ósé. Ndá ijie ó kꞌuíjmára la Díos kjuínchetjóá ti jahara la ó xika ti iji̱ára kjuachaxíen ti ihni̱é Ìnchéni Jesucristo la ko kjuachaxíen Ncha̱kuén Díos.

Ti cuerpo ó tjóá

12 # 1Co. 10:23. *Jahara ndáchrora: “Siín kjuachaxin sichꞌeni kaín nkehe.” La chaxín tíha, kjánchó kaínhña nkehe jína. Chaxín ndáxrja̱n kixin jína si̱chꞌera kaín nkehe, kjánchó chrókui̱to̱éhyara kixin nkojín nkehe chrókꞌue̱tue̱hen ti jahara. 13Éxi ndáchro chojni kixin ti nkehe sinieni la tse̱eni ó sátsji, la ko ti tse̱eni la tsíkꞌóna kixin tsꞌinka ti nkehe sinieni. Kjánchó Díos la sinchekꞌitjáña yóí tíha. A̱ndá kꞌónahña ti cuerpo kuènténi kixin chrókjuasixíni ijie̱. Náhí. Ti cuerpo kuènténi mé kꞌóna kixin tsochjéxini Ìnchéni kjuasáya, kixin ti cuerpo kuènténi la kuènté Díos. 14A̱ndá Díos, chónta kaín kjuachaxin, ti nkexro kjuínchexechón Ìnchéni Jesucristo, mé xi̱kaha sinchexechón chꞌan kaíni kja̱xin. 15¿Á noahñara kixin ti cuerpo kuèntára la kꞌóna ni̱nko kuènté Cristo ní? Méxra̱ xrokjuahya kixin ti cuerpo kꞌóna ni̱nko kuènté Cristo la chrókꞌóna cuerpo kuènté ijnko chojnichjin chónta itsjé chojnindoa. Náhí. 16#Gn. 2:24.*¿Á noahñara kixin ti ijnko nkexro tso̱nkojié ijnko chojnichjin chónta itsjé chojnindoa la tsꞌóna sin nkoko̱a cuerpo ní? Éxi ndáchro xroon itén Díos: “Yóí sin la tsꞌóna sin nkoko̱a chojni.” 17A̱ndá ti nkexro tinkáchónki Ìnchéni, la jehe chꞌan la ko Ìnchéni mé tsꞌóna sin nkoko̱a chojni.

18Méxra̱ chrókui̱to̱héra, í chróchontahyara ijnko chojnichjin ókjé. Kixin ti íso ijie̱ tjasin chojni la jehya ti cuerpo kuènté sin nchekjasóte sin. A̱ndá ti nkexro tjasiko ijie̱ íjnko chojnichjin jehya ichjién mé nchekjasóte ti cuerpo kuènté. 19#1Co. 3:16; 2Co. 6:16.*¿Á noahñara kixin ti cuerpo kuèntára mé ti ni̱nko kuènté Ncha̱kuén Díos tjóá la ko tíha mé kjuajon Díos kꞌuayéhéra ní? Ti cuerpo chontara la jehya kuèntára, 20kixin Díos la tjete kꞌue̱naxín chꞌan ti jahara. Méxra̱ chrókjuíkosáyexínra Díos ti cuerpo kuèntára la ko ti a̱sánra kixin yóí tíha la kuènté Díos.

Currently Selected:

1 Corintios 6: poeNTplus

Highlight

Copy